「Phia̍k! Phia̍k!」「Kán! Nah會點bē to̍h?」風有夠透, 前幾工iáu teh出大炎日, 今á日soah變天, 烏陰gah落bi-bi-á雨, m̄知leh kôaⁿ siáⁿ-mih意思--ê?
「Phòng!」火to̍h--起-來-a, bē記ê he是「九五」--ê, lài-tah uh--起-lih就會sái--a, liam-mi-á 『陳水扁』3字已經烏mì-mà看lóng無--a.
Hiah-nī大ê廣場, to̍h這pha火, 真緊就kho͘ chiok chē人óa--過-來, ta̍k-ê lóng chiok好玄--ê, 探頭問講:「Ah是teh燒sáⁿ?」有人keh-sī góan teh燒hit-tīn China人ê mi̍h-kiāⁿ, tòe leh chhoh, iân-nā khian mi̍h-kiāⁿ落去燒.
這chūn, 有人認出he是『扁帽』, 外kho͘圍koh有1個大kho͘--ê teh hoah:『怎麼有人在燒民進黨的東西』, 群眾聽著這句話soah起phùi面:「Kā phah hō͘ hoa--lah, nah會teh燒Chhiân-sùi-piàn(陳水扁) ê帽á? 是燒m̄-tio̍h nih.....ah, 這tīn人是頭殼pháiⁿ--去o͘?」
這款聲一直ùi外口溢--入-來, chham像海水kāng款, 我ná像hō͘ 1 kho͘ koh 1 kho͘ ê湧束tiâu--ê, tiām-tiām m̄知beh án-chóaⁿ, 目chiu無神, bē tín bē動, 耳孔邊phi̍h-pho̍k跳ê心跳聲竟然聽gah hiah-nī清楚, TOUCH著心內ê驚惶, 我擋bē-tiâu--a.