Ta̍k暗身軀洗好, beh khùn chìn前, lí總--是ē kéng 1本che-che hō͘--lí ê gín-á冊, ài góan講故事hō͘ lí聽.
有1暗, lí kéng--ê m̄是che-che hō͘--lí ê冊, ka-tī走去冊房, the̍h 1本Karl Marx ê傳記, 手kí冊皮, 直直問góan chit ê留chhùi-chhiu koh pháiⁿ看面ê伯公是siáng? Koh beh góan講i ê故事hō͘ lí聽. Góa m̄知beh án-chóaⁿ用lí chit-chūn ē-tàng理解ê話講, lí soah koh走去換1本Lenin ê傳記來, 問講he是siáng? Ko͘-put-chiong tō choaⁿ-á kek頭殼來講hō͘ lí知.
Marx iah是Lenin lóng是hō͘ góa真尊敬ê人, in出身ê家庭lóng不止á好過, m̄-koh看tio̍h世間ê艱苦人hō͘權力者欺負chau-that, in無法度吞忍, in用kui世人ê khùi力beh kā造chiâⁿ chiah-ê無合理ê源頭擊hō͘ tó, thang hō͘ lán ê社會koh-khah公平, koh-khah合理.
Tī lán chia, 大部份做父母--ê lóng ǹg望ka-tī ê gín-á真乖, 真khiáu, 真gâu o̍h才藝, 真gâu讀冊..., tō準父母ē-tàng hō͘ gín-á jōa-nī-á好ê成長環境, hō͘ ka-tī ê gín-á人生chhím beh起行tō贏人thiám-thiám, m̄-koh 有1 ê問題soah lóng無法tō͘走閃--tit: 到底góan chit代留hō͘--lín-ê是siáⁿ款ê社會, siáⁿ款ê生存空間?
Chit-chūn, 有1 tīn學生tī台北街頭抗議kúi-nā工--a, beh阻擋1 ê好gia̍h到盡pōng ê土霸王, kā lán主要ê新聞媒體lóng la̍p tī i手頭. 前kúi工á, lán kui家伙á有出門去參加勞工運動發起ê抗議, tī lán chia, 權勢者欺負, 壓制弱勢ê tāi-chì直直發生, lán ài kā lán ê不滿hām憤怒表達--出-來, 用lán ê khùi力來kā阻擋, bē-tàng kek tiām-tiām, 容允chit款tāi-chì pìⁿ做sù-siông.