Ta̍k暗身軀洗好, beh khùn chìn前, lí總--是ē kéng 1本che-che hō͘--lí ê gín-á冊, ài góan講故事hō͘ lí聽.
有1暗, lí kéng--ê m̄是che-che hō͘--lí ê冊, ka-tī走去冊房, the̍h 1本Karl Marx ê傳記, 手kí冊皮, 直直問góan chit ê留chhùi-chhiu koh pháiⁿ看面ê伯公是siáng? Koh beh góan講i ê故事hō͘ lí聽. Góa m̄知beh án-chóaⁿ用lí chit-chūn ē-tàng理解ê話講, lí soah koh走去換1本Lenin ê傳記來, 問講he是siáng? Ko͘-put-chiong tō choaⁿ-á kek頭殼來講hō͘ lí知.
Marx iah是Lenin lóng是hō͘ góa真尊敬ê人, in出身ê家庭lóng不止á好過, m̄-koh看tio̍h世間ê艱苦人hō͘權力者欺負chau-that, in無法度吞忍, in用kui世人ê khùi力beh kā造chiâⁿ chiah-ê無合理ê源頭擊hō͘ tó, thang hō͘ lán ê社會koh-khah公平, koh-khah合理.
Tī lán chia, 大部份做父母--ê lóng ǹg望ka-tī ê gín-á真乖, 真khiáu, 真gâu o̍h才藝, 真gâu讀冊..., tō準父母ē-tàng hō͘ gín-á jōa-nī-á好ê成長環境, hō͘ ka-tī ê gín-á人生chhím beh起行tō贏人thiám-thiám, m̄-koh 有1 ê問題soah lóng無法tō͘走閃--tit: 到底góan chit代留hō͘--lín-ê是siáⁿ款ê社會, siáⁿ款ê生存空間?
Chit-chūn, 有1 tīn學生tī台北街頭抗議kúi-nā工--a, beh阻擋1 ê好gia̍h到盡pōng ê土霸王, kā lán主要ê新聞媒體lóng la̍p tī i手頭. 前kúi工á, lán kui家伙á有出門去參加勞工運動發起ê抗議, tī lán chia, 權勢者欺負, 壓制弱勢ê tāi-chì直直發生, lán ài kā lán ê不滿hām憤怒表達--出-來, 用lán ê khùi力來kā阻擋, bē-tàng kek tiām-tiām, 容允chit款tāi-chì pìⁿ做sù-siông.
Góa bat看過1份手稿資料, 60外冬前228事件ê時, China來ê ah-pà兵仔無tiuⁿ無tî chông入去台北雙連1 ê庄頭, kui庄cha-po͘ lóng lia̍h-lia̍h做chi̍t-hóe, 當場1 ê 1 ê現chhèng殺, 其中1 ê in bó͘手牽cha-bó͘-kiáⁿ, beh出來看發生siáⁿ tāi-chì, 1 kha chiah hāⁿ出門chhùi, sûi kā cha-bó͘-kiáⁿ ê chhùi om--leh, 目chiu金金看in ang tī面頭前hông phah--死. 自án-ne來kā lán thún-ta̍h ê人, 到taⁿ iáu踏tī lán頭殼頂kā lán sōan尿.
Lán ê話有1句講:「人lia̍h, 厝拆, 雞á鴨á lia̍h kah無半隻.」Chit款khok-hêng ê tāi-chì到taⁿ iáu不時teh發生.
Tòa tī台北ê溪洲部落hām三鶯部落--ê, 是ùi花蓮搬徙來ê Pangcah, in用in ê青春kap勞動力成就台北chit ê大都市, khui政府--ê soah beh拆in ka-tī tah ê厝, beh kā in趕離開hit ê khiā起ê所在, thang好hō͘財團pìⁿ khang pìⁿ lián thàn大chîⁿ.
為tio̍h符合大財團, 大企業ê khùi-kháu, hōaⁿ政府--ê kho͘地beh做工業區, 怪手駛入去teh-beh收成ê田地, kā kui phiàn tiū-á thūn-thūn--死. Tòa hia ê 1 ê o͘-bah-sáng soah án-ne傷心絕望, tī ka-tī khiā起ê所在結束ka-tī ê性命.
為tio̍h少數人ê利益, 權勢者ngē beh用核電廠發電, ē傷害身體健康kap安全ê核廢料soah hiat去Tao khiā起ê紅頭嶼, 無論kúi 10冬來Tao án-chóaⁿ抗議, 權勢者總--是堅持hiah-ê核廢料真安全, m̄-koh tī紅頭嶼, 有chiah出世無jōa久ê iù-iⁿ-á, soah檢查tio̍h頭殼內生癌, m̄知tio̍h án-chóaⁿ來開展i接續ê人生.
Tī lán tòa ê chit ê所在, 官方配合beh炒地價kap房價ê建設公司, kā無應該起厝ê所在, ngē thūn平起kui phiàn kui phiàn ê大樓, koh àn-sǹg beh tī bē-tàng開發ê溪埔地起大路, thang好hō͘ in ê投資大thàn-chîⁿ.
有jōa chē替頭家phah-piàⁿ 1世人ê o͘-bah-sáng kap o͘-jí-sáng, hō͘頭家辭頭路, m̄-nā the̍h無tio̍h資遣費, hām kúi-nā月日該得ê薪水mā lóng討beh tńg--來, kan-taⁿ ē-sái目chiu金金人傷重, 怨嘆ka-tī pháiⁿ命底......
有jōa chē擋bē過生存壓力ê人, 看bē tio̍h活--落-去ê ǹg望, chhōa in ê gín-á chò-hóe結束性命, 離開chit ê惡質ê世間?
Koh有jōa chē hō͘ chit ê體制ê教育thai掉ê少年家, pìⁿ做不良á, bông-bông biáu-biáu 1日過1日......
有權有勢有châi-tiāu--ê hoah水ē kian-tāng, 拳頭母比bē過--人-ê tio̍h kù-chāi人jiô, kù-chāi人thún! Phòa-siùⁿ ê環境, 是非義理行bē通ê社會, 無chîⁿ無勢tō無尊嚴ê性命, che tō是góan chit代留hō͘ lín ê生存空間!
Góan bē期待lí thèng好比別人khah gâu khah khiàng, bē要求lí tōa-hàn了後gâu讀冊thàn大chîⁿ, tī góan留hō͘ lín ê chit款社會--nih, beh出頭beh有出脫, tio̍h-ài敢踏起lih別人頭殼頂; m̄-koh lán kám有法tō͘容允chit款m̄-tio̍h無應該ê tāi-chì?
顛倒頭來, góan ǹg望lí ē-sái像Marx iah是Lenin chiah-ê世界級ê人kāng款, 看tio̍h無公平, 無合理ê tāi-chì, ē不滿, ē siūⁿ-khì, ē憤慨, góan ǹg望lí 知iáⁿ, bē-sái kā人欺負, mā bē-sái容允拳頭母大粒ê人欺負別人, 無合理, m̄-tio̍h ê tāi-chì, lán bē-sái tiām-tiām kù-chāi i發生, m̄-nā án-ne, lán koh thèng好用lán ê khùi力去kā阻擋, 去kā改變.
Góan ǹg望lín留hō͘ lín ê後1代--ê, m̄是像góan留hō͘--lin ê chit款無志氣koh m̄免有骨氣, hō͘人看soe-siâu ê社會!
每晚洗完澡，準備睡覺前，你總是會挑一本姐姐給你的童書，要我們講故事給你聽。
有一晚，你挑的不是姐姐給你的書，自己跑去書房，拿了一本馬克思的傳記，手指書皮，一直問我們這個留大鬍子、面目兇惡的伯公是誰？還要我們講他的故事給你聽。我不知道該怎麼用你這時候能夠理解的話說，你卻又去換了一本列寧的傳記，問那是誰？我只好想辦法來說給你聽。
馬克思或列寧都是讓我很尊敬的人，他們出身的家庭都不錯，但看到這個世間的艱苦人被權力者欺壓，他們卻無法忍受，他們用一輩子的力量要把這些不合理的源頭打倒，好讓我們的社會更公平、更合理。
在我們這裡，大部份為人父母者都希望自己的孩子又乖又聰明，很會學才藝，很會讀書……，即使父母能夠給孩子再好的成長環境，給自己的孩子人生起跑點就贏別人一大截，但有個問題卻無法迴避：到底我們這一代留給你們的是什麼樣的社會、什麼樣的生存空間？
此時，有一群年輕學生在台北街頭抗議好幾天了，要阻擋一個超級有錢的土霸王，將我們主要的新聞媒體一把抓。前幾天，我們一家伙才曾出門去參加勞工運動發起的抗議，在我們這裡，權勢者欺負、壓制弱勢的事層出不窮，我們應將我們的不滿和憤怒表達出來，用我們的力量去阻擋，不能沉默地容允這種事變成正常。
我曾看過一份手稿資料，60多年前228事件時，支那來的鴨霸兵仔無緣無故衝進北雙連一個庄頭，整庄的男人都被抓起來，當場一個一個槍斃，其中一人的妻子手牽小女兒，正要出來看發生了什麼事，一腳才剛跨出家門，趕緊將女兒的嘴摀住，眼睜睜地看著丈夫在面前被打死。那時候來欺壓我們的人，至今仍踏在我們頭頂對我們撒尿。
我們有一句話說：「人掠，厝拆，雞仔鴨仔掠kah無半隻。」這種蠻橫無理的事到現在依然時常發生。
住在台北溪洲部落和三鶯部落的，是遠從花蓮搬來的阿美族人，他們用青春和勞動力造就台北這個大都市，開政府的卻要強拆他們自己搭建的房子，要靶把他們趕離開那個地方，好讓財團想方設法賺錢。
為了滿足大財團、大企業的胃口，掌理政府的圈地要做工業區，怪手開進即將收成的田裡，把整遍稻子挖。住在那裡的一個歐巴桑卻因此傷心絕望，在自己的地方結束自己的生命。
為了少數人的利益，權勢者應用核電廠發電，會傷害身體健康與安全的核廢料卻丟到達悟人住的蘭嶼，無論幾十年來達悟人怎麼抗議，權勢者總是堅持那些核廢料無毒無害，然而在蘭嶼，卻有剛出生沒多久的幼兒，檢查出腦內有腫瘤，不知該如何開展他的人生。
在我們住的這個地方，官方配合大炒房地產的建設公司，把不應該蓋房子的地方強力鏟平，蓋起一整遍的大樓，還計畫要在不該開發的溪埔地鋪大馬路，好讓投資者大賺特賺一番。
有多少為老闆打拚一輩子的歐巴桑和歐吉桑，被老闆辭退，不但拿不到資遣費，連被積欠好幾個月的薪水都追討無門，只能眼淚往肚裡吞，怨嘆自己的命運。
有多少禁不住生存壓力的人，看不到活下去的希望，帶著他們的孩子一起結束性命，離開這個惡質的世間？
又有多少被這個體制淘汰掉的年輕人成為不良仔，茫茫然地過一天算一天……
有權、有勢、有辦法的人喊水會堅凍，拳頭母比不過人就只能任人宰割！破相的環境，是非義理行不通的社會，沒錢沒勢就沒有尊嚴的生命，這就是我們這一代人留給你們的生存空間！
我們不期待你比別人更厲害，也不會要求你長大會讀冊、賺大錢，在我們留給你們的這種社會裡，要出頭有成就，就必須敢踏上別人的頭往上爬；但我們能夠容忍這種不對也不應該的事嗎？
相反地，我們希望你能夠像馬克思或列寧這些世界級的人一樣，看到不公平、不合理的事，會不滿、會生氣、會憤慨，我們希望你了解，不能仗勢欺人，也不能容許拳頭大的人欺負別人，不合理、不對的事，我們不能默許它發生，不只如此，我們還應該用我們的力量去阻擋、去改變。
我們希望你們留給你們的下一代的，不是像我們留給你們的這種沒有志氣、不需骨氣、被人看不起的社會！
留言列表
