台灣組合

Tú-chiah我hit個讀chiok chē哲學(pholosophy)冊ê姑丈來, 本chiâⁿ無想beh hām i討論社會議題, 是i問起我chiah kap i講--起-來-ê. Hām i意見bē合, 無想beh加講, i soah硬beh kap我戰.

尾--á, i講我lóng受著別人影響, koh kā我khau洗, 叫我1 tǹg食40 kho͘就好, chhun--ê lóng寄付hō͘ siáⁿ-mih óaⁿ-ko台語團體; i koh講siáⁿ-mih in軍公教jōa可憐, in隔壁ê做工á人lóng幾nā間厝, i強調講各人有各人ê命.

Chèⁿ bē贏--i, 就kā講我會去實踐, i soah koh khàu-iau:「Chiâⁿ拚--leh, lán chiah試看māi...」

嘴--nih講ka-tī真民主真Open, 無beh反對我ê理想, 其實i講hiah chē, 就是beh kā我講:「Mài gōng--a! 做he a̍h無一定會成功, nah tio̍h hiah無chhái工!」

總算了解siáⁿ-hòe號做「hō͘人看無」, A-chhoan竟然會tàng擋hiah久, m̄是無才tiāu, 若beh, 早就有官thang做--a! Lán ài互相鼓勵, 繼續行--落-去! Kham-pá-teh!

姑丈講, 鄭南榕nah會hiah gōng, 燒燒--leh ah無khah-cho̍ah, 活--leh無khah好? 像施明德án-ne會tàng做hiah chē tāi-chì...... Kán, 死都m̄知án-chóaⁿ死--ê!

Hō͘ i bú 1下khi-mó͘-chih有夠bái! I koh講有閒就加關心厝--nih ê人, 社會政治問題無去參與mā無要緊. Kán, 我tī時無teh關心厝--nih-a?

心肝頭起tū-lān, 就kā chhiàng:「你讀hiah chē Pholosophy(哲學), 用he來分析社會問題, ah, 講kah kui堆, kan-taⁿ chiú tī ka-tī厝--nih, án-ne是會tàng解決siáⁿ問題!」

I soah起phùi面, 講我Logic無清楚, i上清楚, 講lóng chiok gâu講, ah, 實踐--leh? Kán! Kan-taⁿ會曉用sī大ê身份kā我壓!

思考無夠明, kiàn-pái lóng hông牽leh行.

I講我活tī過去活tī悲情, i無來lā-kiáu ê時, 我lóng真歡喜, 竟然講用羅馬字是hām台灣社會脫節. 倒底是i歷史讀無透, iah是我看siuⁿ明?

是án-chóaⁿ連聽都無愛聽? Lóng i kā我安排就好, 倒底是siáng ê人生? 我會koh khah kò͘謙, chèⁿ he lóng無效, 講jōa chē tio̍h-ài做jōa chē!

──《TGB通訊》第25期(2001/10)