*辦公室規範
「陳秘書長, lí chit份“辦公室規範”寫kah chiâⁿ好. Lán基金會是有規模koh有制度ê組織, lán ài hō͘人知影社運團體tō是ài án-ne bú chiah ē成功. 最近góa看秘書處有khah散形, chit份“辦公室規範” lí ài嚴格執行. Lán會--nih ê職員lóng ài有犧牲奉獻ê精神, hō͘台灣早1日出頭天.」
蕭董--ê是退休公務員, i kap朋友合股開ê生物科技公司thàn大chîⁿ, ta̍k-ê choaⁿ-á án-ne叫--i, chit-má i注神tī愛台灣基金會ê業務發展, mā建立人力管理制度.
「Góa了解, góa ē要求ta̍k-ê tio̍h遵守. 無, góa先出去無閒--a.」陳秘書長目神笑笑, kā蕭董--ê tìm chi̍t-ē頭了行--出-去.
「各位組長, lán後半年ē ná來ná無閒, 為tio̍h掌握計畫案ê進度kap執行效率, lán ùi 7月初1開始照chit份“辦公室規範”行. 請各組組長tī ta̍k月日ê月底, kā各組ê “工作人員管理記錄表”交hō͘行政組ê紀組長, thang列入去sûi人ê考績.」
陳秘書長m̄-tāⁿ kā chit份「辦公室規範」copy hō͘ ta̍k ê工作人員, koh特別hoan-hù組長配合執行.
7月初1, 辦公室規範實行頭1工.
「Chiah頭1工niâ, lí tō遲到--a, góa看lí皮ài peⁿ khah ân--leh.」李秘書椅á iáu-bōe坐--落, koh iáu teh喘--leh, 紀組長tō chông來教示.
「失禮, 後pái góa ē準時.」李秘書頭lê-lê, ná做m̄-tio̍h tāi-chì ê gín-á. 前1暝i khang-khòe趕到12點chiah下班, chái-khí cheng-sîn ê時, 知影ka-tī khùn過頭, 緊cha̍h計程á piàⁿ--來, iáu是òaⁿ 10分鐘chiah到位. 照規範第3條, tio̍h扣薪水, chit月日ê全勤獎金免講mā nó͘-sut--a.
7月11, soah連陳秘書長mā遲到.
「秘書長遲到, 紀組長nah m̄敢去kā ge, kan-taⁿ tèng lán ē-kha手人.」中tàu chia̍h飯時間, 秘書處kúi-ê人tàu-tīn tī辦公室邊--á ê咖啡店chia̍h-tàu. Ta̍k-ê chhi-chhi-chhū-chhū.
「Siōng好mài另工換紀組長ka-tī遲到.」若有hit工, 廖秘書想beh當場hō͘紀組長pháiⁿ看.
「拜託--ê, i koh講siáⁿ陳秘書長是先去無閒其他ê tāi-chì chiah ē khah òaⁿ入來辦公室, 遲到tō遲到, beh phô͘ mā m̄是án-ne.」李秘書想tio̍h hit工hō͘紀組長án-ne講tō siūⁿ氣.
「Góa有問紀組長講陳秘書長kám ē hông扣chîⁿ, i講陳秘書長是免lù卡--ê, 所以mā無遲到iah扣chîⁿ ê問題.」黃秘書插話講.
Ta̍k-ê聽chi̍t-ē bē做--得, 一直chhoh.
「Chia̍h人頭路看人目色--lah! Hioh-khùn時間beh過--a, 緊chia̍h-chia̍h--leh好tńg去上班--a.」黃秘書提醒ta̍k-ê.
* * *
陳秘書長沿路ná唱歌ná踏kha踏車ǹg基金會ê向去.「升官」了後, i ta̍k工上班ê心情lóng chiâⁿ好.
無想tio̍h講tī thǹg皮樹吐出清純花蕊ê日子, soah puh 1件hō͘ i頭殼疼ê tāi-chì. 新來--ê邱秘書kā i náu講nah會來上班1月日--a勞健保koh iáu-bōe保.
「Lán ê “辦公室規範”內底第3條寫kah清清楚楚, 工作人員ê勞健保是3月日試用期通過了後chiah有加保, lí chit-má吵che kám tio̍h?」
「“辦公室規範”內底第1條tō寫講基金會照勞基法行, 照講是員工開始上班hit工tō ài辦hō͘好勢--ê. Koh再講, hit-chūn面試ê時無講有3月日ê試用期, koh-khah無講tio̍h thèng-hāu試用期過了後chiah beh加保.」
「規定m̄是góa訂--ê, kā lí面試--ê mā m̄是góa. 升秘書長chiah無kúi月日, soah ài góa去chhit-kha-chhng......」陳秘書長心內teh吐大氣.
下班了, 陳秘書長招邱秘書chò-hóe chia̍h暗.
「其實3月日liam-mi tō到--a, lí mā tio̍h體諒基金會án-ne ê規定, 若無, 人來來去去, 有ê做無1月日tō bòai做--a, liam-mi加保liam-mi退保, chiok hùi-khì--ê. Che khah早bat發生--過, 基金會m̄-chiah ē規定3月日後若有beh繼續做chiah加保.」陳秘書長ûn-ûn-á解說hō͘邱秘書聽.
「Che m̄是kúi月日ê關係. Tio̍h照phín照行!」邱秘書踏chiok ngē.
「其實lín chit-má入--來-ê ke好chiok chē--a. 像góa ùi基金會chhím成立做到taⁿ, góan hit-chūn nah有siáⁿ-mih福利, koh-khah免講有勞健保. 到kah基金會khah有經費ê時chiah敢開chhùi討, 結果hit-chūn ê理事長kā góa講góa若無計較退休金, 勞保tō免保--a. Lán mā想講lán做che是teh做理想, 免計較hiah chē. Lán ê工作人員mā是chit kúi冬chiah有勞健保--ê.」陳秘書長繼續kā安tah.
無想tio̍h講邱秘書jú聽風火jú to̍h.
「In hiah-ê做教授做醫生做律師ê人免煩惱退休金, chiah叫人mài計較, che是siáⁿ óaⁿ-ko道理? 基金會若無sûi kā góa加保, góa tō kā tāi-chì iā hō͘媒體去報!」
「先mài hiah siūⁿ氣--lah. M̄是kan-taⁿ lí án-ne, ta̍k ê新來ê工作人員lóng是3月日後chiah加保--ê. Lí若1月日後tō加保, án-ne對其他ê人kám m̄是chiâⁿ無公平?」
「Lán kám ē-tàng講1套做1套? Chhùi--nih講kah真好聽, siáⁿ-mih人權, siáⁿ-mih保障勞工權利, 實際上soah teh剝削ka-tī ê勞工! 若bòai kā góa加保, lán chiah試看māi!」
「M̄-thang hiah chhóng-pōng--lah, 無, góa替lí kā蕭董--ê爭取看māi--lah.」
陳秘書長tú-tio̍h踏chiah ngē ê人mā chiâⁿ頭殼疼. Eng暗tńg去到厝sûi khà電話hō͘蕭董--ê.
隔tńg禮拜, 邱秘書無做--a. 蕭董--ê khai-chîⁿ消災, chit種chiah káu-kòai--ê mā bē留--得. 事後iáu是有2~3 ê記者來teh問, ngē hō͘蕭董--ê ah--落-來, tāi-chì chiah無piak--開.
「加保事件」tī秘書處ná chi̍t-chūn ká-lê-á風, 來ê時bú kah kui-ê秘書處pìn-piàng叫, m̄-koh liam-mi tō平靜--落-來. Ta̍k-ê繼續無閒「愛台灣指數」ê計畫.
留言列表