真久無寫文章, 頂1篇寫「Piáⁿ」, chit篇寫食茶, 看--來góa實在真ài食, iau鬼gín-á.
今á日是活動頭1工, ta̍k-ê ná親像lóng真無閒, góa mā是, kui場看góa án-ni liù-liù走, bē-su有chiok chē tāi-chì做, m̄-koh檢討--落-來, ná像mā無做tio̍h siáⁿ, heh heh, 食茶ê時soah食bē chió, 算算--leh mā食kúi-lō百kho͘, aih--iah! 無食tio̍h ò-giô真phah-sńg. Tú-chiah知影A-thêng是1983年次--ê, chiah 18歲niā-tiāⁿ, 實在看bē出--來.
以上, 就是góa今á日無siáⁿ感想ê感想.
◎第7屆世界台語文化營(2001/8/17-19)專刊
Thai-thêu: Súi-kó ngiong-pân mai? Â-pak!
Â-pak: Khon he mak-ke súi-kó nâ!
Thai-thêu: Ke kiûng-chêu ki-tô͘ chhien?
Â-pak: 1 kîn 10 ke ngiùn.
Thai-thêu: An kui ô! Ngiong-pân kín-lòi kín kui?
Â-pak: Ya yû phièn-ngì ke nâ.
Thai-thêu: Phièn-ngì ke he mak-ke?
Â-pak: Pa̍t-é, thô-ma-tó, kâm-é.....chhiòn-phu he phièn-ngì ke!
Thai-thêu: Ke he that-nai-e mai-loi sṳ̍t-ke!
Â-pak: Mo iau-kin, ngâi súi-kó chhin hò-sṳ̍t!
今á日暗會是「台語.com」放送ê節目, 有2 ê主持人tī節目中講真chē台灣俗語, iáu有答嘴鼓, hō͘ góa學tio̍h真chē chiok趣味ê mi̍h-kiāⁿ, in tùi台語傳播ê熱情mā真hō͘ lán感動.
Tùi理想ê堅持是孤單ê 1條路, tī leh hia ê時chūn, góa顛倒感覺ta̍k-ê lóng是為tio̍h台語teh phah-piàⁿ, 雖然有ê tùi台語ê拼音有無kâng ê想法, m̄-koh有無kâng ê想法mā好, 台語ê思考是ta̍k-ê共同ê phah-piàⁿ目標khah重要.
愈來愈感覺chit 2工hō͘ góa真chē ê感動.
◎第7屆世界台語文化營(2001/8/17-19)專刊
7--月, 天氣tng熱, hō͘學校派去「SOGO百貨店」實習, gún 10 ê人gōng-gōng-á坐tī Office等主管, 有人chiok歡喜會tàng ta̍k工se̍h百貨店, m̄-koh góa soah感覺真可惜, 因為ta̍k年7--月, 是góa上無閒營隊ê時間, koh ài去SOGO做No-pay ê工, 心內真m̄願.
Tī ta̍k層樓se̍h來se̍h去, 專櫃小姐粉boah kah真kāu, 因為gún lóng穿紅背心, soah hō͘人講gún是1 tīn公司派--來ê SPY, 有夠sêng『紅衛兵』--ê.
上thiám--ê是,『卡友來店禮』hit kúi工, 竟然有3萬人走來領20 kho͘ ê雨傘, 害góa lù Card lù kah手tiù-kin. Góa看tio̍h「siáu貪ê人性」kap百貨店現實ê 1面.
1個月ê時間過了真緊, góa se̍k-sāi真chē男裝, 女裝, 內衫, gín-á衫kap大肚衫, mā se̍k-sāi 1-kóa趣味ê mi̍h-kiāⁿ, 像gín-á ê『矯正鞋』1雙ài 5000 kho͘, 大肚衫mā有『哺乳內衣』hām防『磁波』ê衫, 鞋á皮有6~7種, 有phang味ê khùn衫, che lóng是平常人無了解ê所在, tī百貨店內底, beh學--ê實在真chē, 看人ê目色是góa ê感想.
雖然chit kái是第2 kái來參加營隊, m̄-koh tùi chit-ê活動koh chiok有興趣--ê, 看tio̍h 1-kóa se̍k-sāi ê人, ná像tńg去庄kha看tio̍h親人kāng款, mā真歡喜hām真理大學ê學生合作做工作人員, 今年ê飯菜比舊年khah好食, 上無, m̄是外省á菜.
老師kā gún講
無lân ê魚m̄-thang chhńg
In ê肉chiok毒
無血ê mi̍h mā m̄-thang食
In ê肉
猶原是無目屎
老師ná講gún捧碗ná食
雖bóng gún已經知影
Tú leh食ê mi̍h
自cha-hng來到台語文化營teh使用華語, 到今á日講台語講kah真liú-lia̍h, 是góa生到chiah大漢以來, 上順口ê 1工.
Góa學習tio̍h 1 ê方法會sái去phah-piàⁿ學台語, he就是: 同化身軀邊ê人, 台語就會變成傳染病, 1 ê傳1 ê, che是góa chit工ê親身體驗, 無自覺台語就變做góa唯一ê語言.
Khah-su別人講北京語, m̄-koh若是ka-tī本身一直phah-piàⁿ, góa想góa會成功--ê, 而且chit pái來參與, hō͘ góa更加想beh對羅馬字下功夫.
希望有1工會sái用羅馬字寫出góa人生ê chit條路.
◎第7屆世界台語文化營(2001/8/17-19)專刊
今á日góa用chiok歡喜ê心情, ùi新莊來到chia, 伴tio̍h chái起時á ê日頭, 走chhōe心目中ê新世界, kui日ê khang-khòe, 無薪水, 無hioh-khùn, soah有koh khah chē錢mā買bē tio̍h ê成就感, tī chia做義工, góa chhōe tio̍h心中ê新世界.
雖然góa台語無liàn-tńg, m̄-koh góa愛台灣, 愛台灣ê『小吃』, koh khah愛i生存ê動力~台語.
無tiāⁿ̄-tio̍h toh 1工, lán ê下1代bē-hiáu koh講母語, 無koh再傳續lán ê文化, m̄-koh lán m̄免失志, 因為tī這個世界上ê ta̍k ê所在, lóng有像lán chit款為台語, 為文化tī leh phah-piàⁿ ê人, 就算chit-má ê社會環境kan-taⁿ重視外語ê教育, ta̍k-ê ê心內kāng款存在對母語ê ǹg望.
◎第7屆世界台語文化營(2001/8/17-19)專刊
Gia̍h筆起--來, 本來想beh繼續寫góa ê iau鬼故事, m̄-koh目chiu前tú-tú好有khǹg 1 tè洪瑞珍老師ê演唱TAPE, 標題就號做「心悶」, góa chit-mā就心悶悶--a.
Tī leh今á日(8/18) ê「TGB趕緊報」出--來了後, góa真緊就kā看了, kan-taⁿ有1種感覺, che根本就是TGB ê「ta̍k-ê來hó͘-lān」篇, m̄是無歡喜ta̍k-ê愛台語文, kan-taⁿ是因為beh寫hō͘「TGB通訊」chiah死chòaⁿ ê文章, ta̍k-ê ná像強烈teh表示愛台文愛kah chiok深, chiok重, soah無真實感.
是án-chóaⁿ m̄敢真實面對ka-tī ê想法, 用上實在ê筆, 寫實在ê感動, m̄是koh khah好?
Góa m̄是teh打擊ta̍k-ê ê心, mā m̄驚lín看--tio̍h會無歡喜, kan-taⁿ感覺話若無講--出-來, ta̍k-ê lóng bē進步, án-ni niā-tiāⁿ.
◎第7屆世界台語文化營(2001/8/17-19)專刊
E-po͘, khiā tī財經學院, tùi真理ê大門看--過, 微微ê風吹--來, 大學生teh開講, gín-á teh chhit-thô, koh有粉鳥tī塗kha行. Chiah-nī súi ê光景, hō͘ góa暫時bōe記1 kóa煩惱.
來chia做工作人員第2工--a, 雖bóng真thiám, m̄-koh, 有1 tīn關心台語文ê sianpai kap少年人, tī chia teh認真學習phah-piàⁿ, ta̍k-ê lóng tàu-tīn用台語teh溝通, 真自然ê感覺.
Tng teh享受美好ê氣氛hām空間ê時chūn, 目chiu前發生1 chān交通事故, 2 ê人為tio̍h真細節ê tāi-chì講bōe好勢, 汽車sió-khóa khê--tio̍h就siáng lóng bòai讓siáng, m̄知teh固執siáⁿ?
講母語是真自然ê tāi-chì, m̄-bat看過母語koh需要人chiah辛苦teh chhui-sak--ê. 是án-chóaⁿ像講台語chiah重要ê tāi-chì, 堅持ê人無夠chōe?
E-po͘ ê日頭真溫柔, ǹg望chit種tiⁿ-tiⁿ ê感覺, 會化解所有ê問題.
