台灣組合

Ta̍k禮拜2 kap拜6, 秀琴tō ē駛3點鐘ê山路, kā山頂種ê菜載落來平地市場賣, tō tī goán khiā-ke附近ê市場, 因為tiāⁿ kā i買菜, choaⁿ-á án-ne來se̍k-sāi. I主要賣高山高麗菜, tâm木耳, 香姑, koh有chi̍t-kóa tng tio̍h時ê菜蔬, i賣菜無像平地人hiah-nī gâu計較, kè-siàu mā chiâⁿ a-sá-lih, seng-lí chiâⁿ好, chiok chē人lóng kā i交關kúi-nā冬--a.

Góa lóng等i菜賣kah差不多ê時chiah去chhōe i khai-káng. 秀琴嫁去竹東, in ang mā tī竹東賣i山頂種ê菜. I有歲頭ê Yaba長期替i tī山頂種菜, 秀琴ta̍k禮拜chiūⁿ山chhò菜載菜, in ang lóng m̄ chiūⁿ山, i 1 ê cha-bó͘人tio̍h chiūⁿ山kng菜, 載菜, koh tio̍h落山賣菜, 操kah雙手ê關節lóng腫--起-來, tio̍h注射止疼, 腰mā做kah變形--去, kui身軀酸疼, i講i bē-sái倒, 因為山頂ê親人lóng tio̍h靠i keng--leh.

In ang對chē-chē tāi-chì bē諒解, 對山頂ê親人mā有bē-chió怨chheh, in ang-á-bó͘ sui-bóng tòa tàu-tīn, m̄-koh lóng sûi人過sûi人ê生活. 秀琴bat hō͘ in ang phah--過, ang-á-bó͘關係chiâⁿ bái, i山頂ê親人koh-khah需要i. In大姊倒tī安養院bē tín bē動, i tio̍h la̍p費用, in sun-á有chia̍h毒, 生--落-來ê gín-á koh無châi-tiāu照顧, 秀琴choaⁿ-á kā gín-á chhōa tī身軀邊. Cha-bó͘-gín-á hioh-khùn日mā ē來kā姨婆tàu-saⁿ-kāng, 是chiok bat tāi-chì ê gín-á. 因為人客lóng kioh是i是秀琴ê cha-bó͘-kiáⁿ, 若聽tio̍h叫姨婆, 人客ē hò͘ⁿ-hiân beh問gín-á老母ê tāi-chì, 顛倒hō͘ cha-bó͘-gín-á心內無爽快, 為tio̍h避免chit款情形, i tī人客面頭前lóng叫秀琴「ma-ma」, 私底下chiah叫「姨婆」.

Chit ê cha-bó͘-gín-á kap goán cha-bó͘-kiáⁿ年歲sio-óa, góa tiāⁿ kā cha-bó͘-kiáⁿ ê冊chah去hō͘ i看, hit工招i來goán tau, kéng chi̍t-kóa cha-bó͘-kiáⁿ ê ang-á hō͘ i, i chiâⁿ歡喜mo͘hkui堆tńg--去, 講i chiâⁿ kah意, beh chah tńg去kap in小弟分享.

Góa感覺原住民lóng khah ē-tàng無私來付出, 對家族成員ē互相tàu-saⁿ-kāng, chhiâⁿ-ióng親chiâⁿ ê gín-á是chiok sù-siông ê tāi-chì, 飼a叔, 叔伯ê gín-á, 表姊, 表兄, a姨, a舅ê gín-á, in正經khah無私. 顛倒是平地人, 除去兄弟姊妹無生, pun人飼ê情形, 真hán-tit beh chhiâⁿ-ióng m̄是ka-tī生ê gín-á, 看--來, 平地人ê文化iáu是khah kē-lō͘自私.

A-khîm 1 piàn tī出版社編tio̍h 1本探討軍中意外事件ê冊, án-ne來se̍k-sāi Lò-kha--ê.

10冬前Lò-kha--ê in小弟tī金門做兵, 落部隊1月日後, 厝內soah接tio̍h gín-á ê死亡通知. 部隊主官講gín-á tī部隊適應不良, ka-tī想bē開跳海自殺.

厝, hiông-hiông崩--去. 世界, kui-ê變形--去.

In老母háu kah un tī thô͘-kha:「Chùn-liông......Chùn-liông......nah ē án-ne......Chùn-liông......góa ê心肝kiáⁿ......」懷胎10個月ê kiáⁿ, la̍k尿la̍k屎io大hàn, soah做兵做kah死--去, 做老母--ê bē-su心肝hông割1塊肉落--來.

In老父tiām-tiām流目屎, 尾後puh 1句:「Lóng是siuⁿ sēng kiáⁿ, chiah ē ka-tī想bē開......」

Atolan backpacker homestay

作家朋友搬sóa去Atolan第10冬--a, kiàn-pái làng 1~2年á若有去台東lóng ē tòa i hia. 今年i特別hō͘ goán tòa i經營ê backpacker homestay, 1間隱密koh樸實ê kē厝á. 朋友sòe chit間厝, 內外結構lóng無tín動--tio̍h, tòa tī chia時間bē-su se̍h tńg去到過去, ná像gín-á時代tòa ê庄腳舊厝, siōng特別--ê是外口joa̍h kah hō͘人叫m̄敢, 厝內soah chiâⁿ涼, kap厝後kui遍ê樹林有關係, kan-taⁿ開電風tō chiâⁿ好khùn--a. Hit暗tó tī舊厝內底, góa ê心靈chiâⁿ平靜, 第1 pái感覺tio̍h環境ê energy, 心內有聲teh kā góa講: eng暗ē-sái khùn真落眠(piān-nā出外chhiâng-chāi khùn bē去). 舊厝有影是有性命--ê!

透早cheng-sîn, cha暝hit股氣流iáu是hō͘ góa感覺神奇, 決定koh ke tòa 1暗. 中tàu kap作家in ang-á-bó͘約tàu-tīn chia̍h-tàu, 聽in講Atolan最近ê改變, in ê backpacker homestay seng-lí, koh有in飼hō͘人pàng-sak ê狗á貓á ê tāi-chì, mā有舊年魏德聖導演the̍h〈倒風內海〉ê劇本來Atolan chhōe in ê大新聞. I寫ê小說teh-beh phah做電影--a, goán chiâⁿ替i歡喜!

Chia̍h飯飽, goán koh去in新ê舊厝——貓厝, kan-taⁿ提供hō͘愛貓ê人客tòa. Che是in款hō͘ khioh--tńg-來ê貓á tòa ê「藝術厝」, 因為chìn前ê厝主是畫家, 厝內壁頂lóng iáu有i畫ê圖. Chit間厝kāng款有滿滿ê energy.

Ùi世俗ê觀點來看, 朋友ê厝hoān-sè ē hông嫌講siuⁿ過簡單koh破koh舊, m̄-koh若mài論物質面ê享受, i ê厝有滿滿ê energy kap感情, 1種超越物質, 直接kā長久受物化ê心靈hoah cheng-sîn ê力量, 享受單純ê滿足.

8月18, 為tio̍h大埔thiah厝事件發起ê「kā國家還hō͘人民」抗議行動, 演講台頂直直強調「今á日tō beh thiah政府」, soah tī大合唱了後宣佈活動結束; 接續kā群眾chhōa去「佔領」內政部辦公室大廳, koh直直強調是「非暴力ê公民運動」.

商品化包裝, 媒體效果kap網路世界ê自我聯想, koh有符合所謂中產階級khùi口ê思考, 對現此時ê社會型態造chiâⁿ ê改變已經chiâⁿ明顯, taⁿ soah hām社會運動mā hō͘ chit款思考牽leh行, 運動ê「反體制」性質, 運動對社會結構ê深度批判, mā ta̍uh-ta̍uh-á hō͘ chit款浮面ê思考khàm--過-a.

Chit kúi冬來, kúi場khah大規模ê社會運動動員, bē-chêng-bē tō煩惱ē造chiâⁿ社會成本, bē-chêng-bē tō teh避免造chiâⁿ社會負面觀感. Kúi-nā冬前反集會遊行惡法ê遊行, 直直強調ài有秩序, m̄-thang影響交通, m̄-thang吵tio̍h人; 今年8月初3『萬人送仲丘』ê白衫軍暗會, 發起者siōng iāng--ê是群眾chiâⁿ守秩序, 活動結束現場無留pùn-sò.

社會運動若是無對統治體制造chiâⁿ壓力, 若是無造chiâⁿ一定ê社會成本, 發動群眾chiūⁿ街頭, koh驚妨害tio̍h別人ê方便, án-ne運動kám是pìⁿ做是teh消磨群眾ê不滿?

「包裝」,「行銷」甚至「品牌」chiah-ê商品消費市場操作ê概念, m̄-tāⁿ ta̍uh-ta̍uh-á影響社會型態轉變ê趨勢, 運動siōng原初, siōng基本ê核心關懷kap思想, 價值, mā ta̍uh-ta̍uh-á hō͘消費式ê商品概念替代kah cháu-cheng--去.

洪仲丘事件, 大埔事件, 核電爭議, 服務貿易協議......chiah-ê議題, chit-chām-á tī lán ê社會引起chiâⁿ大ê議論, chiâⁿ月日來mā tī台北街頭有kúi-nā場抗爭. Tī chiah-ê議題爭議--nih, lán kám是mā有發現, tī lán極力反對kap不滿時勢走向ê同時, lán soah mā直直chhu tùi lán m̄願接受ê hit ê方向去? Lán不滿hoān不滿, kàn-kiāu hoān kàn-kiāu, 不滿soah, kàn-kiāu soah, lán kám是mā tiām-tiām tòe leh行? Lán mā無正經beh用lán ê心思kap khùi力來思考: 若無, lán到底tio̍h行tùi siáⁿ-mih向去? Lán到底tio̍h án-chóaⁿ chiah thang好行tùi hit ê向去?

洪仲丘事件、大埔事件、核電爭議、服務貿易協議......這些議題，這陣子在社會上引起很大的議論，幾個月來在台北街頭也有好幾場抗爭。在這些議題爭議中，我們是否也有發現，當我們極力反對並不滿時勢走向的同時，我們卻也朝向不願接受的那個方向走去？我們不滿歸不滿，咒罵歸咒罵，不滿完，咒罵完，我們是不是正悄悄地跟著走？我們沒有認真地花心思和力氣去思考：不然，我們到底要走往哪個方向？我們到底要如何朝向那個方向？

[目錄]

重神無重人ê投機教育／怪力亂神的投機教育@Sò͘-hūi

寫hō͘奴隸á kiáⁿ (12)／寫給奴隸子(12)@海á尾

最近koh開始ta̍k月日ê身體無爽快, 頭殼疼, 艱苦kah無法度chia̍h mi̍h-kiāⁿ, hām lim水to ē想beh吐, góa soah án-ne來回想tio̍h goán a母hit-kóa有治療效果ê簡單料理. 無chhōe tio̍h se̍k-sāi ê味覺, soah tī圖書館看tio̍h《留味行》chit本冊, 看冊名tō知影內容是beh走chhōe已經離開ê親人ê料理味覺, 是瞿海源ê cha-bó͘-kiáⁿ瞿筱葳得tio̍h雲門流浪者計畫ê贊助, 去考察in a-má食譜ê故事. I順in a-má徐留雲1937年ùi上海, 經過香港kap越南去到雲南, koh入去到重慶hām宜賓ê逃難(走路)路線, 續尾koh ùi南京, 杭州, 上海到台灣, 走chhōe ka-tī kap家族食譜味覺ê旅程. 路途中a-má ê口頭記tì kap作者親身訪問--過ê ta̍k城鎮, 70冬前後ê光景kap人事lóng無kâng--a, kan-taⁿ在地限定ê料理iû-goân tī--leh, bē-su kan-taⁿ味覺有法度thàng過歷史, kā過去ê歲月重現--出-來.

Tńg來到ka-tī ê生活經驗mā是án-ne. 人講思念ē tī夢中出現, m̄-koh a母除去chhím離開ê時bat完整來到góa ê夢--nih, hit pái夢中tī火車頂i koh是m̄-bat--góa-ê, 了後夢中i ê形影總--是霧霧bē明, 知影i來tī夢中soah看bē tio̍h i ê形影. 現實生活mā kāng款是án-ne, 對i ê面容jú來jú bē清, kan-taⁿ chhun斷氣, 插管, 死亡時ê面容是清楚--ê, choaⁿ-á無siáⁿ敢去想hiah-ê畫面, chhun--ê tō是味覺ê記tì, kan-taⁿ有透過走chhōe hit款記tì--nih ê料理香味, chiah感覺ē tio̍h i iáu tī--leh.

A母ê料理手路有夠讚, 好kah 4 ê cha-bó͘-kiáⁿ lóng m̄-bat料理(hāu-seⁿ koh-khah免講), tī灶腳goán kan-taⁿ ē-tàng洗碗. 家--nih chia̍h飯桌頂無冊--nih作者in tau hiah-ê傳承中國數百年ê名菜, lóng是chi̍t-kóa無súi名ê日常手路菜, mā hoān-sè是ka-tī kan-taⁿ知影chia̍h, 根本tō m̄知hiah-ê菜名. A母sui-bóng無飯店tô͘-chí hit款好看頭ê功夫, 料理上ê色mā無tiāⁿ-tio̍h完美, m̄-koh手路菜ê phang kap味tō bē輸--in-a, siōng hō͘ góa無法度pàng bē記ê滋味, lóng是siōng簡單ê菜色, 像破布籽tīm肉kap炊卵. 破布籽tīm肉, tō是用破布籽kap ká肉, 加豆油落去tīm做pìⁿ kui-tè, kiáu飯siōng好chia̍h, tō ná像有ê人厝--nih lóng ē chhoân ê肉燥kāng款. 炊卵koh-khah簡單, tō kan-taⁿ卵加水koh加豆油, 炊好色緻是淺咖啡色, khah cha̍t, 無像日本式ê炊卵hiah滑軟, kap白飯kiáu-kiáu--leh bē-su是『燉飯』, jōa-nī-á好chia̍h--leh, chēng細hàn到大hàn chit ê味m̄-bat變--過. 當然--lah, a母mā有thang phâng chiūⁿ桌ê手路菜, m̄-koh hit-kóa菜ê味lóng siuⁿ過複雜, 複雜kah記bē-tiâu in ê滋味, mā真oh koh去分辨出特別ê氣味.

除去日常ê 3 tǹg料理, 一直無法度pàng bē記ê滋味tō是雞湯kap冬粉湯. 厝內有4 ê cha-bó͘-kiáⁿ, a母tiāⁿ-tiāⁿ tīm雞湯kā goán補, siōng特殊ê滋味tō是i ka-tī kek ê烏棗酒. I離開了後, 妹妹bat想beh煮烏棗酒tīm雞湯, kā有可能khǹg ê所在lóng chhiau--過, mā無chhōe tio̍h hit罐獨門ê烏棗酒, 雞湯ê滋味tō kan-taⁿ sûi人ùi ka-tī ê記tì--nih去走chhōe.

冬粉湯ê滋味總--是tī身體無爽快ê時出現, ta̍k pái hioh-khùn tńg--去已經過chia̍h暗ê時間, iah是無siáⁿ chhùi-táuê時, lóng是冬粉湯來溫暖góa ê胃腸. A母ê冬粉湯tō kan-taⁿ冬粉加卵kap芹菜珠á, 有tang時á chham kóa肉絲, 無用高湯, kan-taⁿ lām鹽kap味素, 清清chiáⁿ-chiáⁿ m̄-koh chiok好chia̍h. I破病ê時半暝有時á ē peh起來ka-tī煮冬粉湯, 想beh煮hō͘ i chia̍h, i soah lóng堅持ka-tī煮, hoān-sè是góa煮kah siuⁿ pháiⁿ chia̍h--a, mā hoān-sè是i想beh維持做老母ê責任kap尊嚴! Chit款堅持一直到i無法度koh落眠床chiah soah. 到taⁿ góa iáu是chiokhò͘ⁿ-hiân i是用siáⁿ款魔法, 免高湯, kan-taⁿ鹽kap味素tō thèng好hō͘簡單ê冬粉湯有好滋味, chiah簡單ê料理soah án-chóaⁿ試to試bē來.

前kúi工á下班tńg到厝, 看tio̍h goán bó͘坐tī膨椅teh聽歌, góa mā tòe leh haiⁿ kúi句, goán bó͘問--góa:「Lí nah ē-hiáu唱?」Góa應講:「Che chiok久ê歌--a, nah ē bē-hiáu唱?」I聽了真意外, khah早i lóng m̄-bat聽--過, 看歌詞chiâⁿ寫實, hō͘ i kioh是是新歌. I聽--ê是董事長樂團唱ê〈Lóng bē pháiⁿ-sè〉, chiūⁿ網路查, chit條歌是1999年發行--ê, 到taⁿ有15冬--a, 15冬前歌詞--nih teh批判ê台灣人kap政治人物, 到taⁿ iû-goân「lóng bē pháiⁿ-sè」, 是當初時寫歌詞ê人gâu, iah是台灣人siuⁿ賤?

*      *      *

細hàn時做tāi-chì phû-lōng-kòng, 烏白hut ê人, chhiâng-chāi ē hō͘ a公a-má in hit輩人罵講:「親像siáu狗cheng墓khòng.」Góa一直m̄知影che是siáⁿ-mih意思, khah大hàn chiah知影「siáu狗cheng墓khòng」講--ê是, tio̍h siáu狗病ê siáu狗ē去lòng墓牌, lòng kah流血流滴來死--去. Sui-bóng知影意思, m̄-koh iáu是m̄-bat親目chiu看過「siáu狗cheng墓khòng」. Taⁿ有機會--a, 台灣人koh kā siáu狗病ùi China chah--來-a, 頂1回siáu狗病tī台灣大爆發是1946年, 老一輩看過「siáu狗cheng墓khòng」. 新1代ê台灣人目chiu kan-taⁿ看tio̍h chîⁿ, 為tio̍h thàn-chîⁿ, kā種種傳染病ùi China chah tńg來台灣, chit款ê爽, 爽tio̍h lí艱苦tio̍h góa, lán tī 60外冬後koh親目chiu看tio̍h「siáu狗cheng墓khòng」ê時, kám講心內無chi̍t-sut-á反省? Kám講lán看無kap China人來去造chiâⁿ ê毀滅?

前幾天下班回家，看到阮某坐在膨椅上聽歌，我也跟著唱了幾句，阮某問我：「你怎麼會唱？」我說：「這很久的歌了啊，怎麼不會唱？」她很驚訝，原來她以前沒聽過，看歌詞很寫實，她以為是新歌。她聽的是董事長樂團唱的〈攏袂歹勢〉，查了一下，這首歌是1999年發行的，距今已經15年了，15年前被寫進歌詞批判的台灣人和政治人物依然「攏袂歹勢」，是當初寫歌詞的人厲害，還是台灣人太賤？

*      *      *

是án-chóaⁿ保護ka-tī ê家園是hiah-nī-á無奈? 是án-chóaⁿ維護ka-tī ê生存尊嚴是hiah-nī-á心酸?

4月中, lán khiā tī台北總督府頭前「無愛告別東海岸」ê遊行群眾內底, 1 ê koh 1 ê東部海岸部落ê代表, tī台á頂講起官商聯合beh搶in khiā起ê土地, in直直強調保護家園ê決志, jú講jú激動, jú講jú心酸, ná講目屎soah ná滴--落-來......

In是tòa tī台東到花蓮海岸線ê Pangcah, hiah長ê海岸線, in世世代代tòa tī hiah-ê óa近海kîⁿ ê部落, in ê生活kap祭典mā lóng kap海有chiâⁿ深ê關連. Chit kúi冬來, 東海岸kúi-nā ê保留自然狀態ê海岸hō͘官商看chiūⁿ目, 直直beh kā BOT, 起觀光飯店kap遊樂區, chiah-ê部落有ê choaⁿ-á無法度koh óa近海kîⁿ, 有ê hām部落tio̍h-ài thiah厝搬sóa.

Goán bat chhōa lí去--過ê士林王--家, in tī hia khiā起kúi-nā 10冬--a, 有seng-lí人看chiūⁿ hia ê土地beh來都市更新, in無同意, 官方soah kā in強制thiah厝......

Lán chia平地一直休耕, kā種choh趕tùi山邊甚至山頂, 造chiâⁿ山崩thô͘ li̍h. 平地本底ê農地, 政府beh交hō͘財團去kho͘地做工業區兼炒房地產, chi̍t世人tī hia khiā起, kap土地pa̍k chò-hóe ê人soah tio̍h離開ka-tī ê所在, m̄走--ê, teh-beh收成ê稻á, soah hō͘政府ê怪手半暝來lu平......

Ta̍k冬lán-lâng 3--月ê「迎媽祖」, 已經chiâⁿ做台灣民間民俗慶典ê大tāi-chì, tī台灣ûn境割香iáu無夠, chit-má koh siáu kah tùi無神論ê中國去, beh ùi中國請關公來台灣ûn境. 先mài講據在民間利用神明連結兩岸一體ê政治操作, kan-taⁿ講kā神像kap信徒chhōa去無神論ê國家, 進行信仰ê朝聖行為, chit ê現象本身tō hàm kah有chhun.

過去台中大甲鎮瀾宮去北港朝天宮, tńg大甲路--nih經過彰化chit段, 總--是ē發生「搶轎」ê事件. Éng-kòe khah chē是地方角頭為tio̍h搶地頭來搶轎, lō͘尾soah連地方法院mā來半途「cha̍h轎」koh跪koh拜, 無論是beh求ka-tī官位jú做jú大, iah是sa媽祖保佑kap彰顯公義做藉口, 實在lóng hō͘ lán感覺siuⁿ過hàm-kó͘. 司法機關無強調獨立kap公正ê辦案精神, soah來拜神拜佛, chiah-nī迷信ê hàm-kó͘顛倒是破壞機關ê形象; 一般大眾對司法本底tō chiâⁿ無信任, 普遍認為法院有chîⁿ判生, 無chîⁿ判死, chit-má法院ê執法官cha̍h轎拜媽祖, 是beh kā人民宣示講m̄-nā ài「chîⁿ」, koh tio̍h靠chē-chē好運? 拜神chiah thang好求tio̍h好運?

法院ê hàm-kó͘開先例, 縣政府為tio̍h選舉, mā kā縣內ê媽祖廟lóng聯合--起-來, ta̍k冬辦媽祖ûn境, hō͘ koh-khah chē人nǹg轎腳, 學校koh叫學生排隊chò-hóe nǹg, 有學生nǹg過轎腳了後, 講ǹg望媽祖保庇考試ē-tàng 100分, 學校ê課本kám m̄是教lán ài phah-piàⁿ chiah有好收成? Chit-má nah ē pìⁿ做拜神nǹg轎腳來求好成績--leh?

政客利用宗教bú選舉, 教育者soah mā tòe leh khí-tâng, che是siáⁿ-mih款ê信仰? 是siáⁿ-mih款ê教育? Tī民間風俗, 若有人吊tāu自殺ē送肉粽, 表示kā lah-sap-mi̍h kap怨氣送出海, 傳說講送肉粽ê隊伍經過ê所在ē有lah-sap-khùi, khah強ngē ê庄頭tō ē要求隊伍se̍h路bē-tàng入庄, 學校mā ē宣佈叫學生hit ê時chūn m̄-thang出門, tio̍h tiàm tī厝內, 大門kap窗á mā tio̍h關hō͘ ân. 舊年有人tī道東書院內底吊tāu自殺, 道東書院tō kap鎮公所chò-hóe主辦送肉粽, 結果iáu是有庄頭ngē boài hō͘隊伍經過. 道東書院是過去ê漢學堂, 是傳授智識ê所在, chit-má soah chhōa頭teh傳播迷信.

最近國民黨ê林益世, 李朝卿kap賴素如chiah-ê人因為o͘-se案件hông收押, 交保了後第1件tāi-chì tō是hāⁿ火爐去pháiⁿ運, 犯錯kám m̄是ài檢討? Nah ē pìⁿ做teh怨嘆ka-tī無夠好運, beh緊kā pháiⁿ運勢hò͘走, kám講若求神拜佛得tio̍h好運勢, tō thèng好為非sám做?

Ài án-chóaⁿ教kiáⁿ? Lán用siáⁿ款態度teh陪伴gín-á成長? Lán teh教示gín-á--ê ē造chiâⁿ siáⁿ結果? 為tio̍h lán ê方便, 為tio̍h lán beh省hùi-khì, 為tio̍h避免別人ê指責, 除去滿足gín-á ê物質需要, lán kám有正經考慮tio̍h in精神上kap心理上ê發展? Lán引chhōa gín-á符合「社會期待」ê做法, kám是顛倒壓制kap限制in性命發展ê可能性? Ùi lán ka-tī ê成長經驗, lán到底kám有反省--tio̍h?

要怎麼教導孩子？我們用什麼態度在陪伴孩子成長？我們管教孩子的同時會造成什麼結果？為了我們的方便，為了我們省麻煩，為了避免別人的指責，除了滿足孩子的物質需要，我們有真正考慮到他們精神上和心理上的發展嗎？我們引導孩子符合「社會期待」的做法，是否反而壓制並限制他們生命發展的可能性？從我們自己的成長經驗，我們到底有反省嗎？

[目錄]

人kap蛇ê對話／人與蛇的對話@Gio̍k-hōng

Iú孝／孝順@Phek-iàn

Phòng-kam chiok早tō離開故鄉來到都市討thàn.

「想起過去tī庄腳種田ê日子, 真正是做kah hō͘人ē驚. 做田人m̄-nā看天chia̍h飯, koh tio̍h ǹg人chia̍h飯. 價siàu好ê時, ta̍k-ê搶leh種, 量chē價siàu tō落, 收無工chîⁿ ê時tō kui-khì pàng leh hō͘爛, kui園pháng-tiāu. 人講菜土菜金, 無論價siàu好iah bái, 中盤行口lóng有固定beh thàn ê利sûn, 種作ê風險kap損失soah獨獨生產者teh承擔, 人講菜蟲菜蟲, tō是án-ne. 政府m̄-nā無支持, koh tàu chàm 1腳beh滅農, 鼓勵人pàng hō͘土地pha-hng--去, chiah koh發休耕補助. Tī台灣, ùi土--nih生--出-來ê mi̍h-kiāⁿ是chiah-nī無價值! Choh-sit人是chiah-nī lak-sui! Lí kā看toh 1口灶有châi-tiāu kan-taⁿ靠種田過日子, lóng mā tio̍h出去做工chiah有法度.」

Phòng-kam講起ka-tī ê過去......

Phòng-kam in tau有1甲地, 是a祖ê a祖留--落-來-ê, 到in a公時代, iáu是靠chit 1甲地飼活in kui口灶ê人. Tī Phòng-kam 8歲ê時, a公過身, Phòng-kam in老父繼承choh-sit ê生活, m̄-koh choh-sit jú來jú ngē-táu. 政府講米siuⁿ chē, 鼓勵農民換種高經濟價值ê作物, in tau ê 1甲地ùi水田變ta園, 換種過hoan-bé, 毛豆, 芎蕉, 蓮霧. Phòng-kam chēng iáu-bōe讀國校á tō ài tòe leh去園khau草, pōng水, tàu choh-sit.

Tī Phòng-kam國中一年beh升二年ê hioh-joa̍h, in a-pa tī園--nih chōaⁿ藥á, soah昏--去, thèng-hāu人發現ê時, 送病院急救已經bē-hù--a.

Lí chhím ē-hiáu行, ē-hiáu走跳hit ê時chūn, lán若chò-hóe出去散步, tī公園草埔, lí chhiâng-chāi sńg kah thǹg鞋thǹg衫, koh tī thô͘-kha iah是草埔liàn過來liàn過去.

Tī hiah-ê所在, 其他gín-á若像lí án-ne tī草埔走pio, lán m̄是看tio̍h大人tòe tī後piah趕緊beh阻擋, 無, tō是hīⁿ-khang邊聽tio̍h大人se̍h-se̍h念:「Bē-sái走, ē poa̍h-tó!」「Bē-sái tó tī thô͘-kha, 衫ē kō lah-sap!」「Thǹg鞋腳ē烏--去!」「Lí若koh hiah大聲hoah-hiu, lán tō sûi來tńg!」

參加共學了後, lán不時tī北部chit ê大都市ê公園á chhit-thô, lín chit-tīn gín-á ē peh樹á, ē khian石頭, ē sńg花sńg草á, kā bán來so-so--leh phīⁿ-phīⁿ--leh, lín ē大聲hoah-hiu, tú tio̍h有phùn水區ê所在, lín m̄-taⁿ歡喜kah chông入去sńg水, 有時á koh ē thǹg光光tī thô͘-kha nòa.

久--來, tiāⁿ有路--過ê人看bē過, 有ê當場勸lán, 有ê ē罵出chhùi, koh念講goán chiah-ê父母無teh教, 有ê直接報警察來阻擋lán.

Lō͘尾góa tī網路查, chiah知影有1 ê〈公園管理自治條例〉, 內底規定tī公園bē-sái peh樹á, bē-sái踏入去草埔, bē-sái bán花bán草, bē-sái ó͘ thô͘, bē-sái大聲hoah-hiu, bē-sái thǹg光光, 有ê所在koh禁止tī公園內底騎腳踏車, 有水池iah是phùn水區ê所在, 邊--á mā lóng ē chhāi 1支牌á講「禁止sńg水」.