Lok 12 kho͘坐ba-suh(bus),
揀 1個上好ê位beh來看世界
Ta̍k-ê m̄知leh趕狂siáⁿ-hòe
O͘-tó͘-bái chhǹg-chhǹg叫
Ká-ná iau-hò͘-hò͘ ê狗á
Phīⁿ-tio̍h食mi̍h就beh chông--過
In ta̍k-ê lóng kioh-sī會tàng啃tio̍h in beh ài ê mi̍h-kiāⁿ
富裕ê生活, 幸福ê家庭
In m̄知iáⁿ, 到尾--á lóng是空
富裕ê生活變做銀票ê奴隸
追求物質siōⁿ過頭
Hō͘ lán社會道德公平lóng烏有
無血無目屎
Chiah-nī惡質ê環境
Beh án-chóaⁿ有幸福ê家庭
In m̄知iáⁿ, lóng m̄知, kiōng beh想通ê時
有ê kek m̄知, 有ê想講beh gōng做伙gōng
Beh拚siáng khah無情, góa ōan-nā bē輸
無m̄-tio̍h, i會贏, m̄-kuh尾--á會發現
Chiok孤單, koh對不起ka-tī
Góa tī ba-suh--nih
Tiām-tiām-á看, 有時chūn對in大聲hoah
叫in mài koh gōng--a, mài koh騙ka-tī--a
無人beh chhap--góa, 顛倒koh催愈緊
無要緊, 戲棚kha khiā久就是lí ê
總有1工, góa會做ba-suh ê ùn-chiàng
載lín去自由ê所在
總有1工, góa會落車kā in lóng擋--落-來
Chhōa lín來去幸福歡喜ê所在
請先 登入 以發表留言。