台灣組合

M̄知影ta̍k-ê kám有這個感覺, 就是庄kha人chiok興迎鬧熱--ê; 像góan庄有3年1 kái ê「giâ王」, 就是góan不止á期待ê日子.

2000年Lán-lâng(舊曆) 3月17, 是góan庄ê「giâ王」. 這kang是拜5, góa tú-á好無課, 拜4 e-po͘就kho̍k火車tńg屏東, 到厝--nih mā暗時10點--a.

Tńg去厝ê路--nih kap a-pa bóng話, i講應該ài講「迎王」, 就是迎王爺ê意思. Chit-má庄--nih ê人lóng講「giâ王」, góa想, 應該是走音iah是簡化ê關係.

A-pa koh講, 王爺是玉皇大帝派來凡間巡視--ê, 這kho是徐府王爺, ta̍k-kho ê王爺lóng無kâng, 請神ê地點mā無固定. 這kái tú-á好3庄kāng 1-kang giâ王~góan庄彭厝kap隔壁庄新庄á, 仕絨.

Án-ne講--起-來, m̄就ài有chiok chē王爺, 無nah有法tō͘應付chiah-nī chē庄ê giâ王? Beh nah會有hiah-nī chē王爺--leh? Kám講góa死了後mā會hông招去做王爺?

3月17這kang, 透早2點就ài去請神, kiàn-pái請神ê地點lóng tī溪á邊, góa mā m̄知影是án-chóaⁿ? 這kái是tī里港1間砂石á場內底ê溪á.

Góa這個tòe-sôm--ê, kui暝無睏, au到點半就坐bē-tiâu--a. 這chūn, 外口已經有人tih tín動, mā聽tio̍h廟公tih放送, 催ta̍k-ê緊來廟埕準備.

行到廟埕, oah! Chiok chē人lóng出--來a, 陣頭mā準備kah差不多--a, 6頂王轎chhāi tī hia, 1-kóa人tih款炮kap煙火, chiok鬧熱--ê.

請神ê過程一直到早起8點半chiah算結束.

Giâ王chit-kang, ta̍k戶中晝kap暗時lóng會辦桌請親chiâⁿ朋友, che是góan chia--ê gín-á上興--ê.

Hioh晝soah, e-po͘ 2點半開始ûn境, 就是ûn庄(巡庄)ê意思.

Chhōa頭--ê是開路鼓, koh來是陣頭, 這kho kan-taⁿ chhun龍陣, 宋江陣kap 2個大鼓陣, 無踏蹺kap駛犁á--a.

陣頭後壁就是王轎, 童乩khiā tī轎頂kôan, 陣頭會tī ta̍k戶門口舞弄, 這chūn, 人會準備紅包hō͘--in, 算是鼓勵kap感謝ê心意. 王轎就無的確會停--落-來, m̄-koh五元帥有入來góan tau畫符á, kám是有災厄?

一直到5點外chiah un了beh入廟, 入廟是kui個giâ王上熱ê時chūn. 雖bóng陣頭愈來愈少, m̄-koh ia̍h是kāng款鬧熱, 出外phah拚ê人lóng會tńg--來, 平常時á罕tih看--tio̍h-ê, 這chūn mā lóng走--出-來-a.

庄kha人無siáⁿ-mih閒錢, m̄-koh góan hia ta̍k-kho giâ王lóng有款chiok chē炮kap煙火--ê, kiàn-pái若看tio̍h炮á tih放, 就ká-ná看tio̍h錢1把1把tih iā--leh.

Góan這間廟拜--ê是謝府元帥, 聽講in有5個兄弟á, kan-taⁿ三元帥kap五元帥有童乩. Góan a-pa就是三元帥ê童乩, 自細漢góa就對童乩chiok好玄--ê, m̄-koh lóng m̄敢問--i.

Góa讀國中ê時, 有1 kái ká-ná問i講, 起tâng tih操kám會疼iah是有siáⁿ-mih感覺這款問題, i隨徙對別ê話題去, 無應--góa. 自hit-chūn開始, góa就koh khah無勇氣問i che--a.

這kái去請神, tī hia tih請元帥落--來, beh迎王爺上岸ê時chūn, soah請lóng無, ta̍k-ê tī hia等kui-po͘久, góa就走去góan a-pa邊--á, 問i發生siáⁿ-mih tāi-chì, i kan-taⁿ講ài等--1下, góa就koh走對別jiah去. 過無jōa久, i就起tâng--a.

尾--á, 想想--leh, ka-tī實在chiok pe̍h-lān--ê, hit-chūn看i ka-tī khiā tī hia, 應該就知影i有感應--a, góa koh白癡白癡走去問i發生siáⁿ-mih tāi-chì.

Chit-má, góan庄--nih ê大tāi-chì就kan-taⁿ chhun giâ王kap 5月初5神明生日, chia--ê活動是聯絡kap維持村民情感ê主要力量. 真ka-chài, 庄á人koh chiok重視giâ王--ê, 無hō͘ i無--去, 若無, góan這庄早就崩--去-a.

這kái giâ王發生chiâⁿ chē笑詼tāi, mā有1-kóa意外. 等3年, án-ne 1-kang就過--去-a, chiok bē過giàn--ê, aih...koh ài等3年chiah會sái koh感受tio̍h giâ王ê溫暖.

──《TGB通訊》第9期(2000/6)