7 月初 3 風颱大雨, 雖 bóng 阻擋 tio̍h kúi ê 朋友落南, TGB同窗會 iáu 是照常 tī 台南聚會, kúi-nā ê 朋友是頭 1 pái 見面, ná 開講 ná 互相了解, 氣氛真緊 tō 燒 lo̍h--起-來, ta̍k-ê mā ǹg 望散 tī 各地 ê 朋友, ē-tàng ta̍uh-ta̍uh-á kā 聯絡 ê 線路牽牽--起-來.
Chit 暗聚會, 地頭 Ûi--á 兄專工紹介 teh phah 記錄片 ê A-kai 兄 kap 眾人熟 sāi. A-kai 兄講 ê 話, hō͘ góa chiâⁿ 深刻 ê 感觸.
A-kai 兄 chhím 到 tō 問 ta̍k-ê siáng koh ē 記得詹益樺, i 講 hiah-ê 做官--ê kap 學者頭人不時講 tio̍h 鄭南榕, 無人 beh 肯定詹益樺, 因為詹益樺無社會地位, m̄-chiah bē-sái 講--得, 肯定詹益樺 ē 影響 in chiah-ê 頭人 ê 權威, 利益 kap 地位, i 強調 che 是 lán ài 反省 kap 思考--ê.
尾--á i 愈講愈激動, 問 ta̍k-ê 認為民進黨政府 kám 有 iáⁿ 是本土政權? 民進黨政府 kám 正經是台灣人立場? Kám chiaⁿ 實有替勞動階級 phah 拚? I 講, 台灣 hō͘ 外來者統治 hiah 久--a, 準 chit-má 是本土政權, kám m̄ 是 tio̍h 全力來落實本土化 kap 主體性 ê 意識 kap 政策, 是 án-chóaⁿ ta̍k 項主張 to tio̍h phah 折 koh 再 phah 折? 是 án-chóaⁿ 不時 to tio̍h 先考慮既得利益者 kap 外來權力者? 民進黨政府根本 m̄ 是本土政權, 根本 m̄ 是台灣人 ê 政府, in 是「奴才政府」!
I mā 批判台北智識 kho͘-á hiah-ê 所謂 ê「左派」, 講 kah 嘴角全 pho, 正經 tú--tio̍h tō 知. I phah ê 記錄片主題 lóng 針對勞動者, hiah-ê「左派」tiāⁿ-tiāⁿ sa i ê 作品去放, 放--落了後--leh? Kám 有 beh「牽教」無產階級? 對像 i chit 款 ê 無產階級 kám 看有目地? 無學歷無社會地位--ê tō m̄ 是 kiò-siàu, che tō 是 hiah-ê 人 ê 階級立場!
Siông--哥 ùi 日本讀冊 tńg--來, chit-má tī 宜蘭草地 choh 田, 藉 chit ê 機會 kā i tī 日本 ê 體驗分享 hō͘ ta̍k-ê, koh 講 tio̍h i 性命 ê 轉變 kap 堅持, 鼓舞 ta̍k-ê 堅持 tio̍h ê 做法, 做久 tō 是 lán ê.
Gio̍k-hōng 姐自我紹介 ê 時, Siông--哥 hoah 講:「原來 lí tō 是《A祖‧A公》ê 作者......」Gio̍k-hōng 嘴--nih 唸講 chhìn-chhái 寫--ê, 無想講 koh 有人 teh 讀. Siông--哥應講, lán 心內有理想, lán mā 無 teh kā hiah-ê 權力者信 táu, 雖 bóng lán chit chūn 無發言權, m̄-koh 文字 tō 是 lán ê 武器, 有思想 hām 實踐力 ê 文字影響真驚--人, 社會 ē 因為 lán ê 堅持 ta̍uh-ta̍uh-á 改變.
Góa mā beh 借用 Siông--哥 chit 段話來鼓勵 TGB ê 少年家, 免煩惱世界一直行 tùi kap lán tò-péng ê 方向去, chò lí kā tio̍h ê 道理寫--落做--落, 做久 tō 是 lán ê !
請先 登入 以發表留言。