Tī 2~3百年前, 教育無親像chit-má chiah-nī普遍, 言論自由ê風氣mā無時行, 若講tio̍h hit-ê時代, 連科學研究ê發表kiám-chhái lóng會有危險, m̄-koh tī hit時chūn ê Hu-lán-se (Francais)哲學家Bo͘-lú-thé-leh (Voltaire, F. Arouet) bat講過1句話:「Góa雖bóng無贊成 lí ê看法, m̄-koh góa拚死mā beh維護 lí講話ê權利.」Lán chit-má生活t„ kúi-ā百年後ê開放社會內底, 無koh再有人因為言論發表來hông蹧躂--a, koh再加上教育ê chhui-sak, ta̍k-ê人lóng koh khah有才tiāu thang好思考kap發表ka-tī ê意見, m̄-koh Bo͘-lú-thé-leh大概想lóng想bē到kong, tī chit款ê環境內底, 有法tō͘講出ka-tī ê意見, koh講有道理ê人, 無的確soah顛倒無 i phoe--ê hiah-nī chē.
Lán若kā言論ê傳播比phēng做1-ê市場, án-ne市場內應該是有各樣ê言論商品teh hoah賣, 隨人tio̍h-ài用隨人ê理性來去分析kap判斷, 決定beh接納iah是拒絕無kâng ê意見, tī 1-ê公開ê市場內底, 做seng-lí--ê kap交關ê人若kā話講hō͘明, 自然就m̄驚死豬á肉吊kôan價.
總--是lán若斟酌kā看chit-ê市場chit-má ê運作, 就會發見好貨罕得有人teh賣, mā罕得有人beh買, 反tò-tńg是hiah-ê a-sap-put-luh--ê, soah搶市搶kah hō͘-tēng kiōng-beh hông踏lám--loeh. 講來講去, 根本ê起致恐驚是chit-ê「言論市場」內底, bat貨ê買貨人已經ná來ná oh chhōe--a.
是án-chóaⁿ lán teh-beh chhōe無bat貨ê人--a-leh? 除了人心內底kiám-chhái iáu有過去政治戒嚴ê烏影, 來hō͘人驚講出頭就損角以外, chit-ê時代對siáⁿ-mih tāi-chì lóng tio̍h追jiok速度ê hit款速食文化, hām「後現代」hit款斷裂無chiâu-chn̂g ê思考方式, 應該是siōng大ê因端.
Tī chit-ê情形內底, mài講beh維護別人講話ê權利--a, chiâⁿ chē人根底連ka-tī ê kha步都khiā無siáⁿ會在--leh, 問in相信siáⁿ-mih, koh是為tio̍h siáⁿ-mih, ke̍k-ke是人hoah tòe leh hoah niā-tiāⁿ, che就kài-sêng sì-kòe滿滿是ê「hang肉kah」(hamburger) kāng款, the̍h--來隨吞食落腹, 無愛去操煩料理ê tāi-chì, 去食tio̍h sián mā無teh致意.
Ùi另外1-ê角度來看, chit-hō哲學家精神tng teh lek-sè, koh真符合標準化, 大量生產ê商業型態, 是非khiau直lóng會tàng chhìn-chhìn-chhái-chhái, 橫直大聲--ê, 主流--ê就是大部份人ê意愛; 過去壓迫思想啟蒙--ê是獨裁ê政權, 是kāu-khoe-hâi ê教廷, sòa--落-來今á日, chit-ê角(kioh)竟然hō͘ 1-tīn受過真好ê教育ê中產階級來出演, 看--起-來實在有iá°害, lán kan-taⁿ thang理解講: 無的確tī商業社會內底, 做外交, 顧關係chiah是生存ê cháng頭.
有1-ê故事講1-ê gâu做官ê人, lóng m̄-bat kā人pháiⁿ聲sàu--過, 有1工有1-ê人來chhōe i參詳tāi-chì, 講官府有1項政策做kah無siáⁿ súi-khùi, chit-ê官員聽kah真téng-chin, koh直直講 i講kah chiâⁿ有理; 過無kúi日á, koh有另外1-ê人mā來講kāng 1項tāi-chì, m̄-koh是teh o-ló官府做kah jōa好tú jōa好, 官員oan-nā斟酌kā聽, 講 i分析kah真實在; 人客走了後, 邊--á teh tàu-saⁿ-kāng--ê看bē做--得, óa來thuh chit-ê官員講:「Lí nah會sái lóng sa無立場, mā無lí ka-tī ê想法, 人講東 lí就應東, 人講西 lí就應西!」 Chit-ê人chi̍t講煞, kan-taⁿ看chit-ê官員ná tàm頭ná teh lián嘴鬚講:「Mh, lí講了實在真好, koh真有道理, mh, 有iáⁿ是án-ne, góa lóng同意.」
現代m̄知有jōa chē人親像án-ne teh反起反倒, bē-su寄意故事內底hit隻bi̍t-pô, 日óa雞, 暝óa狗, toh位有贏面就tòe leh走. 有人比論講:「M̄驚bi̍t-pô sì-kòe是, chhap-cháu明明大鼻4 kha 1-tīn豬, 顛倒自封bi̍t-pô koh teh揚氣.」想看māi, Bo͘-lú-thé-leh今á日若iáu有tī--leh, kám bē氣kah半sió死?
留言列表