今年是góa第 3 pái主辦台灣高中生台語生活營, chit pái ê人chin chió, m̄-koh學員ê表現lóng hō͘ góa chiok感動--ê. Ta̍k-ê人ê名, 生做siáⁿ款, góa lóng有chiok深ê印象, 但是beh lóng kóng--出來, 恐驚chit份通訊會無夠寫.
1993年hioh-jo̍ah, góa khà電話去報名hit年ê台語生活營. Hit piàn營隊ê工作人員比學員khah chē. Ta̍k組ê組頭chin phah-piàⁿ chhōa學員. 工作人員mā chin熱心kap學員開講. Ta̍k暗lóng kap in講到beh天光chiah去khùn.
Kap góa開講ê工作人員lóng有ka-kī對社會ê看法, in kā góa kóng in心內美好ê台灣, koh有in beh為台灣做siáⁿ.
Kap in講chiah chē, góa得tio̍h學校老師無教lán ê物件, góa mā知影學校老師提chin chē假ê物件kā lán騙.
Tī iáu未參加台語生活營chìn前, góa lóng感覺台語無siáⁿ路用. 去了後chiah知影台語ē-sái做ê tāi-chì chiok chē chiok chē--ê.
台語ē-sái kóng社會ê tāi-chì, ē-sái kóng學校ê物件, koh知影有人用台語做i 1世人ê志業, in hō͘ góa--ê是góa tī學校用北京話chhōe chiok kú lóng chhōe無ê出路. Tī in hia chhōe tio̍h對土地ê關心, 對台灣ê愛, m̄-koh siōng要緊--ê是看tio̍h in teh phah-piàⁿ, góa chhōe tio̍h góa ka-kī, 知影góa chit世人beh創siáⁿ!
留言列表
