6月中, 我ùi花蓮出業來到台北. Tī花蓮4冬, 早就慣勢hia ê空氣, hia ê環境, 不時to騎hit台1輪走50 ê O͘--ê ùi海岸線(台11線) iah是195田地路1路phe--落-去, 沿路hō͘我se̍k-sāi ê光景siàn--leh, 山kap海ê氣味tī我ê身軀邊se̍h-á-se̍h, 平靜phong-phài ê性命ùi chia成長.
來到台北, soah bē慣勢ta̍k工神經線peⁿ-ân-ân ê生活. Ta-lian--去ê空氣, o͘-ta-sán ê溪水, ká-ná hō͘石頭肉粽霸佔ê和平港, lóng是臭hiàn ê氣味. M̄-koh tī chia, soah有1-kóa "臭賤" ê草á teh puh芽, 發íⁿ.
「Mài koh gōng-sîn--a-lah, 營隊通知tang時會好?」
身軀邊ê人teh催--a, tú ùi A蓮港搬徙來台北, hit種lak底ê心情iáu無時間thang調整, 就sûi chông入去TGB第5屆全國高中生台語生活營ê籌備khang-khòe. 今年ê工作人員除了góan chit-tīn mahchih--ê, tī 4--月koh有chih接1-kóa真理大學台灣文學系ê朋友, 互相談kúi遍了後, ta̍k-ê kha-báng khóan-khóan--leh, 相招tī 7/3出發去新竹.
Chit屆ê籌備khang-khòe, 有召集人Uichì teh ho̍at-lo̍h, koh有Tekhôa顧前顧後, 進行gah chiâⁿ順事. Chiah-ê工作人員ká-ná天頂7彩ê khēng, ta̍k-ê有無kāng色水kap任務, 互相cover, 互相配合, chiâⁿ做1條飛tī台灣天頂ê布á橋.
初4暗, Tekhôa kap Tiôngseng主持ê工作人員討論時間, hō͘新加入ê人koh khah了解狗牌公學校ê意義, chhiâu出對chit ê營隊ê認知hām責任, mā hō͘ góan ta̍k-ê開始思考ka-tī tiàm chit tè土地ê性命beh án-chóaⁿ延續.
初5 ē-tàu點半, 學員來--a.
「Ta̍k-ê面á nah會lóng臭臭, koh bòai講話......」
「Án-ne chit kúi工beh án-chóaⁿ chhōa?」
「Lín ài去kap in講話ā!」
「Bòai--lah, 我驚pháiⁿ人, in看--起-來lóng chiok sêng lô͘-môa--ê.」
「Hāi--a, chit屆ê學員nah會lóng chit款pháiⁿ面神--ê......」
Tú到位ê學員, 面臭kāⁿ-kāⁿ, 看gah ta̍k-ê lóng chhoah--著, koh來ê活動, 工作人員chhōa gah艱苦chē-kòa, 一直到暗時開講chiah khah輕鬆. 原來in lóng是hō͘ sī-tōa押--來-ê, 有1 ê學員koh是前1暗chiah知影in老母替i報名, 錢to交--a, mā bē-sái無來, in心肝內án-ne想.
Koh來chit kúi工, 上課, chhit-thô, 食飯, 開講......lóng照起工ûn-ûn-á進行, 學員mā 1 ê 1 ê liâu落去營隊氣氛內底, 話愈講愈chē, hiâu底ê個性mā thián現現.
上尾á暗ta̍k-ê分享tī營隊chit kúi工ê心情, 雖bóng學員tāi先lóng m̄是甘願來--ê, m̄-koh tī chit 5工, ta̍k-ê ùi chheⁿ-hūn人變chiâⁿ朋友, 會sái講心事, 談理想, mā有機會用無kâng ê角度看世界, 總--是sńg gah chiâⁿ快樂.
Chit 3冬生活營lóng tú著風颱, m̄-koh吹bē倒tng teh puh-íⁿ ê草á. 風颱過了, 7彩ê布á橋koh khah明, 飛tī ta-lian臭hiàn ê台灣天頂.
留言列表