Góa chiok久chìn前就熟sāi這個cha-bó͘ gín-á. 就是熟sāi i siuⁿ久, góa根本就bōe記得ka-tī是tang時, tī siáⁿ-mih所在tú--tio̍h-i-ê, i應該mā bōe記--得-a. M̄管án-chóaⁿ, chiah chōe冬來, i一直是góa上好ê朋友.
若是beh講 i生了siáⁿ款, góa會ēng kā lín講, i對ka-tī kui身軀lóng真滿意. 像i就chiâⁿ kah意ka-tī ê頭毛, lio̍h-lio̍h-á chham kóa咖啡色, bōe-su thiâu-tî染--過hiah súi; góa soah感覺he是電siuⁿ chōe kái頭毛, kā頭毛電kah黃--去-a. Iah koh有i ê目chiu--lah, 明明無siáⁿ-mih特殊, i就硬beh講目chiu仁是咖啡濁--ê, kap ta̍k-ê無siâng. Che mā無算siáⁿ, i上愛展i hit雙kha, 有1 kái i看góa穿té褲, 竟然kā góa講:「Aih! Góa ê kha腿是直kah ná蘆荀--leh, jōa-á súi--leh, lí ê nah差chiah chōe?」真正會hō͘ i氣--死.
人súi iáu無夠, koh愛穿súi-súi, 用--ê mā愛súi. Súi人nah會ēng--leh無súi衫? M̄-chiah講, i上興買新衫, 出門一定tio̍h穿kah ná電影明星chiah甘願, góa這個無siáⁿ會hiáu妝--ê, khām i行做夥bōe-su少奶奶邊--á ê cha-bó͘-kán--leh.
Súi人nah會ēng leh無súi mi̍h? In厝tiāⁿ-tiāⁿ tìn 1-kóa chhāi leh看súi, 無影khah好用ê mi̍h: 像1個kan-taⁿ形體好看, soah入無2毆茶ê茶kó͘; 1盒phang-phang-phang, soah洗bōe清氣ê tê-kho͘...想beh叫i改--o͘? 免siàu想--lah, cha-bó͘ gín-á lóng án-ne, ka-tī歡喜上要緊, nah會chhapchhap別人hiah chōe?
Lí問góa i kám有男朋友? I早就結婚--a, 就親像一般ê cha-bó͘ gín-á, i若是講tio̍h khah早ê愛情故事, 目chiu就sih--leh sih--leh, 親像天頂ê星kāng款, 其實i講來講去, mā是teh講khah早jōa-á chōe人o-ló i súi, jōa-á chōe人teh kah意--i. 當初對i有意愛ê cha-po͘, m̄是ian-tâu就是有錢, hôaiⁿ-ti̍t ta̍k-ê lóng好, 顛倒是chit-má做in ang--ê這個無好. I tiāⁿ-tiāⁿ都án-ne講:「Hit-ê時chün, ta̍k-ê lóng講góa有車有厝bòai ti̍h, 有好日子bòai過, kan-taⁿ-á beh kéng 1個siáⁿ-mih lóng無--ê......」「Lí án-ne kám m̄是千kéng萬kéng, soah kéng-tio̍h賣gêng-géng--ê?」「無法tō͘--lah, kah意--ê就是kah意, 無kah意--ê就是無kah意, góa chín也無後悔, 有這個ang góa已經chiâⁿ滿足--a.」
真ka-chài i無後悔, 若無, 今á日就無góa Tiūⁿ-liāu Gî坐tī chia寫這篇文章hō͘ ta̍k-ê看--lo͘h, 雖然這個cha-bó͘ gín-á tiāⁿ-tiāⁿ烏白買mi̍h-kiāⁿ, 3不5時koh會se̍h-se̍h唸, 講góan老pē是賣gêng-géng--ê, iah m̄-koh i猶原是góa siōng愛ê人, 這個cha-bó͘ gín-á就是góa siōng親愛ê mama--lah!
留言列表
