Góa感覺ka-tī親像lā-hiō. M̄-nā góa án-ne想, 連góa ê學生mā有chit種感覺.
2001年ê X'mas, gín-á hō͘ góa 1張Card, Card頂kôan是1隻chhiaⁿ-iāⁿ ê lā-hiō.
Chit ê gín-á是一般老師認定ê hit種「問題學生」, to已經國一--a, m̄-koh講話ê聲sàu kap動作soah親像國校á 5年--ê. M̄-chiah in導--ê tiāⁿ-tiāⁿ公開kā罵, koh用siōng gōng ê教育方式──kā i kap其他ê同學隔離, hiah-ê學生看老師án-ne做, mā tòe老師kā i pháiⁿ.
Hit ê老師m̄知影gín-á ê老母chit-má tī病院準備beh開刀, gín-á m̄知影beh án-chóaⁿ, chiah ē有「退化作用」──心理kap行為表現lóng退tńg去國校á ê階段.
有1日, gín-á kap同學冤家, hō͘老師叫去「教師室」, koh khà電話hō͘ in老母, góa看tio̍h gín-á電話gia̍h--leh, 1句話mā無講, kan-taⁿ目屎kho̍k-kho̍k流. 續--落-來, 老師koh khà電話chhōe gín-á ê老父. In老父是基層ê鐵路工人, 到學校ê時kui身軀全酒味, 入--來tō想beh巴gín-á, ka-chài góa手擋tiâu--leh, koh kap i講chi̍t-kóa有--ê無--ê, 先轉移i ê憤怒, gín-á kan-taⁿ tī邊--á流目屎.
「Lí koh m̄乖乖á聽話, 爸爸tō beh來娶越南新娘, lí kám m̄知影爸爸無bó͘ mā是chiok艱苦--ê.」In老父ná像teh講心事hō͘ góan聽, in導--ê看--tio̍h mā驚出tāi-chì, tō kā i giú去邊--á講話. Góa o̍at頭看gín-á, kā i講:「聖詩, lí ài堅強, 老師mā是án-ne行--過-來-ê, 目屎流--過了後tio̍h-ài堅強--o͘h!」I目屎kâm--leh kā góa tìm頭. Tō親像lā-hiō kāng款.
Hit工, góa騎o͘-tó͘-bái來到『秀巒瀑布』, Bunun ê祖先tō是盤過中央山脈來到chia建立『秀巒』『古風』『卓楓』3 ê部落, 其他ê Bunun koh ǹg南行, 一直到台東. Bunun ê祖先開墾ê路草早tō hō͘『攔沙壩』切斷, 根本m̄知影án-chóaⁿ入--去, ka-chài頭殼khiáu ê Bunun tī正手pêng樹根ē-kha pa̍k 1條soh-á, góa chiah peh ē起--lih.
Góa順『秀姑巒溪』一直ǹg前行, 沿路lóng是清涼通光ê溪水kap活跳ê魚á, 感覺chiok爽快--ê. 行到1粒大石頭邊--á, góa teh想: Bunun phah獵ê人行到chia, mā ē tī chia hioh睏--1-ē neh. Chit ê時chün, góa看tùi天頂, 看tio̍h 1隻lā-hiō. 烏色ê身軀, 一直來回teh飛, 親像teh看顧lán chit-tè土地.
Góa總算知影性命力tī toh位--a! Tī lán chit-tè島嶼有hiah-nī chē物件需要lán去學習, 相對來講, hit-pêng大中國ê『奇珍異寶』koh算siáⁿ-mih? 所以, góa koh行tńg來原來ê所在, lā-hiō慢慢消失--去-a, iah m̄-koh, góa ê心已經kap chit-tè島嶼黏tàu-tīn, góa mā親像lā-hiō kāng款, 飛tī kôan-kôan ê天頂, 看顧lán ê土地, 看顧lán ê gín-á.
留言列表
