台灣組合

大學ta̍k冬hioh熱kap hioh-kôaⁿ, góa lóng真愛參加營隊. 1方面是想beh ke學習1-kóa有趣味ê課程, 順續mā借機會sì-kè去看看--leh, 想beh tī大學期間kā台灣se̍h thàu-thàu......

Ta̍k-kái營隊, góa lóng tiām-tiām-á坐tī台á kha, 用崇拜ê眼神看台á頂大kha ê講師, thián--開ê白色簿á紙內底, lóng是認真記錄in講ê話. Hit-chūn, 可能án-chóaⁿ想都想bē到有1工góa mā會有機會tī台á頂講話.

今年ê「世界台語文化營」tī高雄舉辦, TGB ê成員是工作人員, 所以TGB tī新竹ê『幹訓』tú過無2工, góan就tī透風落雨ê風颱天, 1路ùi淡水駛暝車來到高雄. 高雄ê日頭kāng款真熱情, 生活ê步調mā無北部hiah沉重, 是tām-po̍h-á迷人ê城市; góa用真輕鬆ê心情準備beh開始營隊ê生活.

想bē到, tú到高雄ê第1工暗時, Tek-hôa就kā ta̍k-ê「宣佈」: 本來TGB負責ê「羅馬字教學」, 因為場地空間無法tō͘分組ê關係, 所以góan有1節課ê時間ài上台講話. 討論ê結果, Tōa-thâu-liân, Ui-chì, Chiau-hông kap góa lóng ài上台. Ui-chì是主持人, 第1部份Chiau-hông先紹介「TGB學生台灣語文促進會」; 續--落-來Ui-chì講「是án-chóaⁿ beh寫台文」; Tōa-thâu-liân教「羅馬字」, góa用Hak-fa做補充; siōng尾--á góa ài分享「寫台文ê經驗」, chit部份其他人mä會tàng chò-hóe分享.

自知iáⁿ chit項「任務」了後, góa原本輕鬆出日頭ê心情, 1時soah烏陰--起-來. 想tio̍h beh tī hiah-nī chē大人(內底koh chiâⁿ chē老師) 面頭前講話, koh ài坐tī hiah-nī kôan ê台á頂hiah久ê時間; koh再講, che是宣傳TGB ê好機會, 若是góa講kah làu-khùi就害--a, 真正愈想就愈驚......自細hàn, góa就chiâⁿ gâu緊張, ta̍k-kái老師點名ài講話, góa就驚kah phi̍h-phi̍h-chhoah, 膽是比niáu鼠á koh khah細. 大學tiāⁿ-tiāⁿ tú-tio̍h ài「口頭報告」ê課程, 不得已一定ài講話ê時chūn, 上台chìn前góa就會開始胃疼, 緊張到chiâⁿ無lō͘用ê程度.

上台hit工, góan chhēng「狗牌公學校」ê烏衫行去台á頂, góa本底chiok緊張--ê, 胃mā開始tiuh-tiuh疼, m̄-koh看Tōa-thâu-liân, Ui-chì, Chiau-hông in lóng chiok冷靜--ê, koh看tio̍h Taco tī台á kha一直替góan加油, 就khah無hiah驚--a. 台á頂ê時間過kah特別慢, góa ê目chiu lóng m̄知beh看toeh, kan-taⁿ一直看第1排1 ê chiok認真聽góan講話ê日本留學生(cha-bó͘-gín-á), koh有看tio̍h坐tī角á ê Tek-hôa án-ne niâ. Ui-chì kap Chiau-hông講了就換Tōa-thâu-liân教「羅馬字」--a, góa ài用Hak-fa講kúi ê詞, 第1 kái tī hiah-nī chē人面頭前講Hak-fa, hit種感覺chiok特別--ê, 雖bóng緊張m̄-koh mā真歡喜.

Góan hit節課結束了後, 有真chē sianpai lóng來kā góan鼓勵, mā有人主動來問TGB ê消息. 透過chit-ê機會, 有愈來愈chē人知iáⁿ TGB, mā ta̍uh-ta̍uh-á關心chit-ê團體, hit種開始hō͘人注意ê感覺真正chiok好--ê.

Chit-kái上台講話ê經驗mā hō͘ góa學習真chē, 用Hak-fa講羅馬字是siōng親切ê記tì, tī營隊期間tiāⁿ-tiāⁿ tú-tio̍h有人來kap góa講Hak-fa, in對Hak-fa ê關心kap重視hō͘ góa真感動, mā hō͘ góa 1種溫暖ê感受. Góa mā發覺, 緊張ê個性可能是半生成--ê, 總--是, 膽mā是會tàng訓練--ê, ùi錄音「Phah-phú-kng」到高雄ê上台講話, 過程中間ê緊張kap驚惶lóng tńg換做後1 kái ê勇氣, 鼓勵ka-tī kā想法講--出-來, hō͘ ka-tī 1 kái比1 kái koh khah chē成長ê機會.

──《TGB通訊》第35期(2002/9)