熟sāi Chheng-siông兄是tī 2001年初, 台灣人名做A-siông--ê, ká-ná lóng 高chhiâng hàn大, 不止á粗勇. Tī羅東車頭初見面, 人kôan koh sán, 縛tn̂g頭鬃, iù-siù iù-siù ê Siông--哥, hām góa設想--ê chiám然無kâng, 心肝頭tiuh--1-ê, che bē-su teh暗示運動chit-chōa路--nih ê Surprise hām Shock.
Hit-chūn接觸運動chiah 10個月, 一切iáu真刺刻, kui工kan-taⁿ想beh體驗chit-ê世界, beh挑戰不公不義, 心phu̍t-phu̍t-tiô, bē-su隨時beh應戰, 坐bē tiâu, 無châi-tiāu消化整理ka-tī ê想法.
尾--á hioh熱, 青年社招beh體會農村ê生活, tú-á好Siông--哥hia有1 khu田, 就安排去i hia tàu做, tām i hia tòa kúi-nā工, 談真chē.
年初到chit-chūn發生kài chē tāi-chì──反核遊行燒『扁帽』, 批施明德, koh熟sāi真理大學ê朋友.
過hit-ê熱--人góa就3年á--a, 運動hō͘ góa看tio̍h人會tàng有無kâng ê選擇, m̄-koh ka-tī beh面對ê時無hiah簡單. Hit款經驗, 就ná chhan像peh山, 樹á chiok ōm--ê, 花,草mā lóng真súi, tī罕得有人行kha到ê chit遍樹林á, beh繼續行--落soah會tám-tám, 雖bóng看sianpai無照人ê約束, 活kah chiah-nī súi, chiah-nī自然, m̄-koh山kha ê人soah一直tām hia hoah-hiu, 講行hit條路chiâⁿ危險, 行hit條路是siáu--ê, 就án-ne, 到底beh相信ka-tī經驗--tio̍h-ê, ah是beh聽人講, 照人ê規矩行? Hit-chūn góa深深teh思量chit-ê問題.
種作ê時, 踏tio̍h塗, 踏tio̍h lo̍k-kô͘-môai-á, 真真正正感觸tio̍h大自然teh喘氣, che原本是真sù常ê tāi-chì chiah tio̍h, m̄-koh góa chēng出世就hō͘現代科技包tiâu-tiâu, tio̍h到chit-chūn chiah lio̍h-á Touch--tio̍h. 其實che hām接觸運動了後ê心理變化chiok kâng, 本chiâⁿ照ka-tī ê意思行就kài自然--leh, siáng知iáⁿ lán自bat tāi-chì就hông教講事事項項tio̍h照理性kap體制行, soah bē記得身軀siāng自然ê感覺, 年久月深, pìⁿ做m̄知beh án-chóaⁿ回應ka-tī ê感覺, m̄知án-chóaⁿ chiah會tàng輕鬆過日.
Tām羅東hām大自然chhit-thô ê經驗, hō͘ góa koh khah清楚ka-tī ê本性是siáⁿ, 是siáⁿ款烏雲tah tī頭殼頂, 為tio̍h beh過khah歡喜ê生活, góa ài kā烏雲póe--走, hō͘日頭chhiō--落, 本我chiah會得tháu-pàng.
尾--á tńg去『都市叢林』──台北, 便若心內有siáⁿ-mih結tháu bē開, góa就會去大自然chhōe靈感, 去感受「人」原本ê所在.
Hām Kiàn-tì ê互動, Tiông-seng phòa病......ta̍k-pái都keng kah chiok thiám--ê, 怨恨積kah beh起siáu, kiōng-kiōng beh放棄ê時, ǹg山kha 1 ē看, 無chhái peh到chia--a, lín-pē chiah m̄願認輸, gia̍h頭看日頭, góa chit-ê中tàu出世ê gín-á, 就bē-su得tio̍h力量, góa koh tńg去水--nih走chhōe hit-ê感覺, 總--是想beh peh上山頂看thàng世界, ah是藏落水底聽心內ê聲, 這款ê意念愈吸引góa行--落-去. Tiāⁿ-tiāⁿ, 想beh擋tiāⁿ ê隔tńg工, 會愈想beh khàng--起-lih.
今年hioh熱chìn前, góa決定beh行運動ê路, koh來tio̍h chim-chiok思量beh行siáⁿ-mih路, 頭前有Tek-hôa, Siông--哥, Sêng-ûi兄, Chū-kèng兄, 川伯--á. 初初góa想beh變做川伯--á án-ne, 尾--á感覺i ná像行kah kài thiám kài寂寞, góa kám beh án-ne? Koh來, 想beh變做Tek-hôa chit形, m̄-koh kám有合góa ê性地hām趣味? Chheng-siông兄ká-ná mā bē-bái......總--是góa teh chhōe toh 1枝thiāu-á thang óa thang學, 想tio̍h人tī日本ê Siông--哥, 都ah tòa tī草地所在, koh 1 kái, góa ài來去大自然chhōe chiah-ê元素.
Tī日本第1瞑, 談tio̍h台北ê情形kap góa ka-tī ê狀況, Bí-hông姐á就先thuh破góa 1項: mài要求別人, 做運動是做ka-tī爽--ê, 若招無人soah起怨chheh, kám m̄是真無值? Che mā表示無teh行ka-tī ê路!
Siông--哥koh提醒--góa, i 10冬前mā無想tio̍h今á日會行到chit-lō khám-chām, 寫會出1~2本á冊來, 免煩惱, hit時, in頭前都ah無人teh chhōa, 今á日i摸到chia, góan踏tī i ê肩kah頭應當會看koh khah hn̄g chiah tio̍h, mài想beh kā ka-tī調做某mih形, chhōe tio̍h ka-tī, chhōe出ka-tī ê Style m̄-chiah tio̍h; 「The Key」就是把握現在, mài想講做che有前途--無, 若做會歡喜就ta̍uh-ta̍uh-á thuh, 做bē爽快chiah koh換別項, 像peh山, ta̍k-ê人行ê路無tiāⁿ-tio̍h kāng款, 總--是ná thuh ná thuh, 會koh khah接近山頂.
續--落-來ê kúi暝, lóng眠夢tio̍h tām台灣teh煩惱ê tāi-chì, ká-ná teh篩teh濾毒teh內洗. 尾--á Siông--哥chhōa góa去海邊á, 去溪邊, 去peh山, góa koh再體會--tio̍h. Peh山ê時, Bí-hông姐á有身peh bē起--lih, Siông--哥就叫góa ka-tī ná行. 頭前ê路愈來愈súi, 有lā-hiō koh有烏鶖, m̄-koh行無jōa久góa就停--落-來se̍h翻頭, 驚有熊有虎會kā góa咬, 現實ê生活kám m̄是án-ne? 行別人安排好ê路hōan-sè khah妥當, m̄-koh行危險--ê, ka-tī kéng ê路kám就無穩當無意義?
Tām Okayama(岡山, tī日本) ê旭川(是1條溪á) hia chhōe tio̍h靈感. 水--nih ê世界聽bē tioh世間ê紛紛擾擾, khah簡單聽tio̍h ka-tī心內ê聲. 旭川差不多130米闊, 到中央ê時水kan-taⁿ到胸坎, góa看koh khah過hia有人tī--leh, 就大膽kā siû--過, siû-á siû, siû-á siû, 好hioh--1-ē, siáng知踏bē tio̍h底, góa無心理準備, chhoah--tio̍h-a, 頭nǹg出水面, 緊suh 1嘴空氣, 沉--落, kha手亂--去, koh探頭出--來, kán, 死--a!
離岸邊koh chiâⁿ hn̄g, chia ê光景chiah súi, kám講ài tī chia結束? 經驗--過ê tāi-chì, 1 pha 1 pha tī頭殼內掃--過, 無望--a, góa準備beh接受, peh山, siû水kap運動lóng是góa ka-tī kéng--ê, 死tām性命ê本源, 死tām走chhōe ka-tī ê路--nih無siáⁿ thang怨嘆.
Chit時chūn tāi-chì開始變化, 水無teh kā góa khiú--a, kha手mā回復自然, 求生存ê本能開始作用, phia̍t, 緊phia̍t, koh有chiok chē tāi-chì iáu-bōe經驗--ê, góa beh tńg--去!
手tah tio̍h岸邊ê石頭, góa tńg--來-a, góa無háu, góa知--a, 有chiok chē Confuse tī chit-chūn hiông-hiông明瞭--a, 會驚是因為góa beh抵抗水, 抵抗水hām身軀和諧ê狀態, 做運動會tiuⁿ-tû, 是用siuⁿ chē頭殼, góa現就看到i ê美麗, soah beh koh逃? Beh koh走閃? Beh當做無chit回事, 當然mā hō͘水淹--死, tng góa kā理性khǹg 1邊, 用身軀去感覺, 顛倒是出路, góa無beh逃--a, góa無驚死亡, góa活--落-來-a, 無煩惱運動kám thuh會起--lih, 相信ka-tī ê心就chhōe會tio̍h出路, tī chia, m̄免煩惱tio̍h tòe toh 1 ê sianpai後piah, ka-tī ê心tio̍h會準chat beh行siáⁿ-mih向.
運動hō͘ góa看tio̍h水--nih tiām靜ê世界, mā hō͘ góa聽tio̍h ka-tī siāng內心ê mi̍h-kiāⁿ, chit-chōa路行--來有笑有háu有怨chheh, ka-chài身軀邊有1 tīn朋友teh tàu注意, chò-hóe thuh--起-lih, chit-chūn chiah知運動m̄是hām主流社會切離--ê, 是lán beh án-chóaⁿ用ka-tī ê信念, tī現實社會hām人行, 是tī水流--nih chhōe tio̍h身軀ê感覺, m̄是完全接受iah是放i去, 若無, 穩死無活, ài放, m̄-koh求生ê意志bē-tàng放, án-ne chiah chhōe會tio̍h生路.
TGB ê朋友, lín若感覺tio̍h chiah-ê美麗ê光景, mài tiuⁿ-tû, 相信ka-tī ê Feeling, lán互相勉勵, chò-hóe khàng--起-lih, án-ne好--無?
留言列表
