運動, 是beh反抗kā lán蹧躂ê體制, mā是beh改變chit-ê扭曲ê社會, koh-khah是teh挑戰ka-tī ê性命!
Lán tī ROC體制--nih大hàn, mā tī chit-ê體制--nih接收意識洗腦. Lán tī chit-ê體制--nih形成ê道德觀kap價值觀, 無tiuⁿ-tî tú-tio̍h chhiàng-suh, 舊意識kap價值觀受tio̍h挑戰, 心肝底會懷疑kui-ê世界.
Lán若káu-kòai性, 無kā心肝底ê ngiau疑chhìn-chhái tàn tiàm邊--á, 心肝內會一直beh chhōe答案, 會一直問ka-tī, 續--落, 舊價值會崩盤, 會一直思考lán個人性命kap運動, kap台灣社會, kap chit-ê世界ê關係. 尾--á lán會發見, lán ài反抗chit-ê蹧躂lán人性ê體制, chit-ê「體制」, m̄-tāⁿ有ROC體制, koh有中國, 有美國......lán會懷疑kui-ê世界!
若繼續koh想--落-去, siáⁿ-mih是體制? Lán soah會發見, lán tio̍h反抗--ê, soah是lán社會整體ê人性狀態!
是án-chóaⁿ án-ne講--leh?
意識, 思想, 權威, 規則, 常識, 道德........chit-ê具體ê ROC體制就是用chiah--ê teh統治--lán-ê, lán嘴--nih hoah beh反抗, soah顛倒koh用體制chiah-ê規範teh約束ka-tī, mā約束其他beh反抗ê人, kám m̄是?
體制講, 若有不滿, tio̍h-ài用合法正當ê管道反映; lán ê運動頭人就kui心爭取開放選舉!
體制講ài理性, 專業, 尊重; lán ê頭人就kap KMT拚siáⁿ人第1名--ê khah chē (工人是放牛班--ê, 當然tio̍h tiām-tiām khiā tī邊--á)!
體制講ài尊重主流民意; lán ê頭人就拚性命爭取tī (統派)媒體發聲浮頭ê機會, 順續遵守媒體ê約束, ta̍k-ê都變kah理性妥協有風度!
體制講ài安定, ài用選舉來ta̍uh-ta̍uh-á推動改革; lán ê頭人就開始「造神」, ǹg望有機會chiâⁿ做政治明星, 講話chiah會/敢大聲!
體制講選舉贏--ê chiah是大--ê; lán ê頭人就趕緊phô͘財團, 外省權威, 台派地方派系kap中產階級, kui心順in ê意, soah叫lán thǹg赤kha--ê mài iau飽吵!
體制講選舉beh贏, tio̍h-ài爭取主流認同; lán ê頭人就開始爭取體制ê舊勢力sio-thīn, koh kā本底ê支持者交帶講mài hiah計較是非!
體制講選舉結果證明民意ǹg望「維持現狀」mài變動; lán ê頭人soah se̍h翻頭來控制/製造/改變「反抗陣營ê民意」!
體制講和平理性chiah有氣質; lán ê頭人soah 1 ê 1 ê變做豬公面, kui年thàng天ná講話koh ná練咬柑á!
體制講改革需要協商, 需要協調; lán ê頭人協調到尾--á, soah kap體制tàu-tīn分贓, 享受剝削人民ê快樂!
體制講bē-tàng製造衝突, ài互相尊重chiah會『雙贏』; lán ê頭人就kap體制chò-hóe phìⁿ-siùⁿ『台客』, 教示『台獨死硬派』, 「提醒」lán m̄-thang破壞族群感情, hông食--去-ê mā mài koh計較!
Lán kúi百冬來反抗ê歷史經驗就是án-ne, ah lán kám有才tiāu理解chiah-ê「智慧」? Lán kám敢「違背」chiah-ê意識, 思想, 權威, 規則, 常識kap道德?
前kúi工, TTL chiah ùi屏東厝--nih tńg--來. Tī厝--nih ê時, in pa-pa一直ko͘-chiâⁿ i tio̍h tńg去做老師, 做老師福利jōa好tú jōa好, 薪水kôan hioh假chē koh免納稅, 有食koh有lia̍h; m̄-koh in細hàn叔--á teh縛鐵á, 艱苦做儉儉á開, khioh稅金lóng bē走閃--得, sió-khóa艱苦無順事, 厝--nih食飯就隨有問題. TTL講, ka-tī若去做老師, kám m̄是teh suh in細hàn叔--á chit種艱苦人ê血汗? 做老師kám正港有才tiāu造chiâⁿ siáⁿ-mih改變?
Lán運動kho͘-á內底, 大部份sianpai, 有志kap朋友, lóng真無理解TTL是án-chóaⁿ無愛做老師, in想無, 認為siōng無, 老師ê待遇會tàng hō͘ ka-tī免煩惱生活, 生活無問題chiah來「實踐」理想......
了解真chē人án-ne苦勸是好心, 是m̄-kam TTL生活pháiⁿ àn-sǹg. m̄-koh lán若認為chit種吞忍是正當--ê, án-ne lán是teh反siáⁿ-mih? Lán是teh追求siáⁿ-mih? Lán是teh實踐siáⁿ-mih?
Óaⁿ-ko--lah! 越南ê胡志明伯--á bat講: 「若tio̍h kui世人食China人ê屎, góa甘願暫時phīⁿ法國人ê臭屁!」越南民族爭取tháu放ê志氣, 尾--á hām法國kap美國mā無法tō͘阻擋.
做奴隸--ê, kui工siàu想beh升級做奴才! Lán就是chit種心態, kám m̄是? 體制ê糖á khǹg tī面頭前, 若bē-giàn去chhńg, bē-giàn去chī, 會hō͘人講是「頭殼pháiⁿ--去!」Che就是lán社會「整體ê人性狀態」!
Kúi百冬來, lán到底teh反抗siáⁿ?
若無才tiāu mā m̄願挑戰che, 台灣人有siáⁿ-mih資格beh起造一流ê國家? 台灣人有siáⁿ-mih資格beh chiâⁿ做有尊嚴ê民族? 台灣人有siáⁿ-mih資格beh享受平等ê社會? 台灣人koh有siáⁿ-mih資格beh追求人性ê tháu放?
若m̄是beh追求chiah--ê, 「運動」是beh chhòng siáⁿ? 若beh追求chiah--ê, 「運動」kám m̄是tio̍h-ài ùi chia開始?
「道德」是teh要求ka-tī, m̄是teh要求別人--ê, kám m̄是? 若beh「實踐」「運動」ê理念, kám m̄是tio̍h tùi ka-tī ê身軀/頭殼/心性開始? Kám m̄是tio̍h先自我革命, 體制hām lán頭人kā lán洗腦--ê ài先kā革命?
Lán kám m̄是tio̍h-ài徹底kap chit種扭曲ê人性狀態堅決鬥爭?
若有chit款反省, 若有chit款自覺, 若beh án-ne實踐, 性命會重新puh-íⁿ, 會比其他台灣人活kah khah khùiⁿ-o̍ah, mā是án-ne, lán活--leh chiah會koh-khah有意義, chiah會koh-khah有價值!
留言列表