「請借問播田ê田庄a伯--á, 人teh講繁華都市台北tùi toh去, gún就是無依óa可憐ê女兒, 自細hàn就來離開父母ê身邊, 雖然無人替gún安排將來tāi-chì, gún想beh來去都市做tio̍h女工渡日子, ia̍h thang來安慰自己心內ê稀微......」
Chit條歌是teh寫台灣60年代庄kha作sit人tī農村pháiⁿ thàn食, 包袱á款款--leh去台北都市phah拚ê hō-jiah. Góan chit代(tē) m̄-bat食過苦ê少年人, kiám-chhái khah oh體會hit款離鄉出外討thàn ê心chiâⁿ, 雖bóng有人keng-thé講chit-má ê大學生出業就失業, 總--是若厝--nih有夠力, gín-á出路早就安排好勢; 其他--ê tio̍h-ài怨嘆生m̄-tio̍h時代, tī 21世紀ê台灣, koh tio̍h像〈孤女ê願望〉寫--ê, tī繁華ê台北城sì-kè pōng壁, chiah有thang thàn食.
A-hūi是20 thóng歲ê高雄gín-á, tī高雄實踐大學讀服裝設計. Óa出業ê時, 學校老師tī台北辦座談會, A成衣廠kap B服裝代理商lóng趁機會招新手, A-hūi頭殼gâu tńg-se̍h ê表現hō͘ A公司chiâⁿ欣賞, 當場就kā錄取, 出業了後, A-hūi sûi就去A公司食頭路, 1月日28000 kho͘, 員工福利lóng照步來, A-hūi teh學koh緊, hō͘頭家不止á肯定.
雖bóng beh繼續tòa tī A公司無問題, 總--是對iáu koh熱phut-phut beh ǹg前衝ê A-hūi來講, B公司chiah是 i想beh發展ê所在, mā khah有挑戰.
Tī A公司做1月日了後, A-hūi接tio̍h B公司ê錄取通知, i無tiû-tû就kā A ê頭路辭掉, 去B公司做. Chhím頭á A-hūi做1 ê經理ê助理, 試用期3月日, chit-ê經理bòai chhōa新手, A-hūi m̄知teh行siáⁿ-mih狗屎運, 公司hiah-nī chē經理--leh, i偏偏á hông分配tio̍h chit-ê m̄願chhōa新人--ê. 做無jōa久, 經理就開始tiau, thèng候試用期到, 經理迫 i寫離職書主動離職. A-hūi chiâⁿ m̄甘願, 想beh kā告, m̄-koh對普通人來講, tī台灣若chiūⁿ法院˜是teh講理, 是看siáng bakuh khah在, 尾--á choaⁿ-á準soah.
Chit-má A-hūi tòa--ê是第3間公司, 頭家是香港á, 算是成衣代理商, chit種公司tī台灣北部khah chē, 試用期kāng款3月日, 月給25000 kho͘, chit-ê價siàu是ka-tī簽--ê, chit-chūn講--來mā iàn-khì, 各人ê薪水公司放hō͘各人ka-tī簽, hit-chūn A-hūi想講ka-tī是菜鳥á, mā m̄知地頭行情án-chóaⁿ, 就kan-taⁿ簽25000 kho͘, 尾--á kap kāng期入--來-ê sio比phēng, chiah知iáⁿ了chē--leh.
Koh khah hō͘ A-hūi怨嘆--ê是第1工上班就加班, 公司紙面訂ê上班時間是chái起9點到暗時6點半, m̄-koh若beh食chit-ê頭路, 公司lóng chhiàng明--ê tiõh加班, m̄-chiah A-hūi ùi第1工做到taⁿ, iáu m̄-bat"準時"下班--leh, siōng hàm--ê是無thang領加班費, 本底想講ka-tī是新手chiah án-ne, 尾手問同事kap人事處, chiah知iáⁿ公司kan-taⁿ補貼100 kho͘車錢niâ.
Tī A-hūi試用期beh滿hit kha踏á, tú好óa lán-lâng過年, hit-chūn i lóng khut tī公司做到beh翻點chiah有thang下班, tńg到厝, siáⁿ-mih都無才tiāu做, 連là-sap衫mä chek kah chiâⁿ禮拜--a koh無時間洗. 雖bóng有健保, mā kāng款hioh拜6禮拜, m̄-koh tio̍h做滿1冬chiah有7工ê年假thang hioh, chit款生活, hō͘本底身體就無kài勇健ê A-hūi koh khah gâu感冒, 嗽chiâⁿ月日--a koh teh thiah藥á.
有1工加班soah, A-hūi tú tńg到tī公司附近稅ê厝, 就接tio̍h故鄉a-pa ê電話, kioh-sī A-hūi出去kap人teh koa, chiah òaⁿ chiah tńg--來, soah知cha-bó͘-kiáⁿ m̄是出去hong-so, 是加班到chín. 直直khù-khù嗽ê A-hūi, tī電話--nih聽tio̍h a-pa ê聲, 目屎choaⁿ-á liàn--落-來, kā ka-tī ê委曲lóng háu--出-來, in a-pa m̄甘i tī台北chiah艱苦, 叫 i搬tńg去高雄. 總--是chit條路是A-hūi ka-tī kéng--ê, 目屎chhit ta了後iû-gôan tio̍h koh au--落-去.
A-hūi tī chit間公司iû-gôan ùi助理開始做, tī辦公室負責接tiāⁿ單, 大部份是ùi米國來--ê, 接tio̍h tiāⁿ單chiah koh phoe hō͘下手ê成衣工場做. In公司chhòan是接外國牌子ê設計圖, thàn kho͘-mí-sióng--ê. 台灣chē-chē做代理--ê, 本身無ba̍uh設計, chit款"商業機密" ê設計技術, 總公司lóng la̍k-ân-ân, 設計好勢chiah發包代工, 人興買ê外國牌子, chiâⁿ chē都台灣代工--ê.
A-hūi雖bóng免tī外口走業務, m̄-koh kui工tī辦公室處理tiāⁿ單oan-na chiâⁿ thiám頭. 1份tiāⁿ單用30 thé做單位, 其中15 thé ba̍uh hō͘ China hit-pêng ê工場, koh來ba̍uh hō͘東南亞, chhun ê 5 thé chiah hō͘台灣ê下手工場, 大部份tī中南部.
以1 ê牌子來講, cháng頭ê總公司phoe hō͘各國代理商有固定ê配額, chit-má WTO開放了後, 配額限制khah chió, 相對--ê各代理商就會盡量kā成本開銷壓低, China hit-pêng雖bóng做ê工不止á粗, koh會拖soa, 總--是工錢chiah台灣ê 1/4, m̄-chiah接--tio̍h ê tiāⁿ單有1半會hō͘ in做, ah若絲質--ê, 就一定走China. A-hūi tio̍h-ài按設計圖ê設計, kā布料, 花色, liú-á......chit-kóa材料款款chhōe-chhōe--leh交hō͘下手工場完成.
A-hūi chhiâng-chāi teh講ê笑khoe-tāi是kap China chih接ê經驗, i講tiāⁿ-tiāⁿ時間到--a, China工場koh iáu-bōe做--出-來, 電話chhui--去, in無iàu無意應講:『好! 好! 馬上給您辦.』A-hūi kiàn-pái都氣kah tī心內chhoh:「叫lí去死lí mā應好......」
Chit-má經濟khah soe-sap, oan-na衝tio̍h chit-kóa做衫á公司, éng過1 thé siōng無mā有1000~10000領, chit-má 1 thé chiah 300領, m̄-koh kiàn-pún oan-na tio̍h做到beh 50領, 相對--ê下手工場就chiâⁿ bē hô.
論真講, 台灣ê成衣市場mā m̄是chiám然無台灣人ka-tī設計kòa做ê牌子, 講--起-來, 台灣牌子ê工kap外國牌有tè比phēng--leh, kan-taⁿ精差台灣kiàn用都棉--ê, khah無國外--ê gâu變khiàu.
A-hūi tī做衫á公司前前後後tòa beh半冬khah ke, 看tio̍h chit-kóa情形oan-na chiâⁿ感慨, 若bòai走China, 成本相對就khah kôan, 人teh買衫koh重有過鹹水--ê, chiok chē公司就算koh khah堅持, 尾--á lóng tio̍h面對關門食ka-tī ê危機.
「請借問門頭ê辦公a伯--á, 人teh講chit間工場有beh採用--人, gún雖然iáu少年lóng m̄知半項, 同情góa地頭生疏以外無希望, 假使chió錢也tio̍h忍耐3冬5冬, 為將來為tio̍h幸福甘願受苦來活動, 有1日總會得tio̍h心情ê輕鬆.」
A-hūi ê同事大部份是40 kúi歲iáu-bōe結婚ê cha-bó͘人, tī chit種公司, ta̍k日tio̍h做到半暝, koh無時間kap機會thang tī外口行踏, 莫怪A-hūi tú入--去ê時, chiâⁿ chē同事lóng giau疑 i是án-chóaⁿ會來chia做.
過年了, A-hūi過試用期--a, kúi-nā-ê kap i kāng時間入--來-ê, lóng包袱á款款--leh beh另外chhōe頭路, beh走chìn前, koh勸A-hūi mài khut tī chit間無出脫ê公司, A-hūi kan-taⁿ笑笑無應, 心內想講ka-tī就親像台灣kāng款, hō͘外國seng-lí人kap China拖磨--去, 走到toeh mā kāng款......
留言列表