Sim-chêng si̍t-chäi chiok ak-chak......
Kin-á-ji̍t khì chhōe『課外組』ê chú-jīm kóng siā-thôan ê tāi-chì, i sèⁿ "Kán", góa lóng kiò i "Kàn-chú-jīm". I kā góa kóng 1 kóa 5-4-3--ê, it-ti̍t kā góa tiau, chó͘-tòng góa sêng-li̍p siā-thôan, koh kiò góa m̄-thang chit-má hèng-hèng, chiok siūⁿ beh cho͘ siā-thôan, 2 tang āu siáⁿ-mih to bô, chhun kúi-ê bú kah kiōng-beh tó-siā......
I kap góa kóng-ōe lóng iōng China ōe, góa lóng iōng Tâi-gí kā ìn. M̄-koh góa thiaⁿ i China ēe kóng kah chiok pháiⁿ thiaⁿ, chiok bē liàn-tńg--ê, i iáu sī bòai kóng Tâi-gí. Jú khòaⁿ jú siān.
Ū lâng kā góa kóng,『學務主任』kî-si̍t sī ka-lé-á, chin-chiàⁿ ê kôan lóng tī『學務處』ê『課外組』chit-ê Kàn-chú-jīm chhiú-thâu.
I koh kiò góa ài hō͘ i hó ìn-sióng, kán!
Góa khiâ o͘-tó͘-bái beh tńg-lâi sok-siā ê sî, beh kòe 1 ê lō͘-kháu, khiâ kàu lō͘ tiong-ng, góa chiàⁿ-chhiú thâu-chêng-pêng soah hiông-hiông ū 1 tâi kiau-á sái--kòe-lâi, bêng-bêng tō âng-teng, i soah siūⁿ beh chhiúⁿ tiàm góa chìn-chêng sái--kòe, góa kā pi jú tōa-siaⁿ, i sái jú hiông, kā góa lòng 1 ē poe--chhut-khì, lō͘-piⁿ ê lâng lóng ū khòaⁿ--tio̍h, m̄-koh bô lâng chhap-siâu--góa.
Hit-tong-sî góa kám-kak kha chiok thiàⁿ chiok thiàⁿ--ê, bián-kióng peh--khí-lâi, sái-kiau-á--ê ū lo̍h-chhia, ká-ná 50 hòe lâng, kóng Tâi-gí. I mn̄g góa ū iàu-kín--bô, góa khòaⁿ-khòaⁿ--leh lóng chhè-siong khah chē, i tiàm phôe-pau-á jîm--leh jîm--leh, góa siūⁿ kóng i beh the̍h chîⁿ hō͘--góa-leh, i soah kā góa kóng i bô chah mè-sih, koh kóng góa lâng bô án-chóaⁿ tō hó.
Góa kā siū-siong ê ou-tó͘-bái khan--khí-lâi, chin bû-nāi khiâ tńg-lâi sok-siā.
留言列表
