Tōa-thâu-liân lí hó:
Chin hoaⁿ-hí siu-tio̍h lí ê Mail. Tùi lí ê jī-kù lāi-té mā ē-tàng thé-hōe hit-chióng bô-nāi kap ut-chut. M̄-koh láu-si̍t kóng, che sī siáⁿ-mih lâng ia̍h bô hoat-tō͘ ê tāi-chì. Góa ê ì-sù sī kóng jīn-hô lâng lóng bô èng-kai sūⁿ beh khì kái-piàn pa̍t-lâng. Che pún-chiâⁿ tō-sī Mission Impossible. Che sī chòe-kīn ka-tī ê tām-po̍h-á thé-hōe.
Góa siūⁿ, lán lóng sī kiâⁿ kāng chi̍t-tiâu lō͘ ê lâng. Lán ê sim-lāi mā ū chi̍t-ki lán siūⁿ beh peh ê soaⁿ-thâu. Lán ē-sái éng-óan thiau-chiàn kāng chi̍t-ê lí-sióng, khiok-sī bô èng-kai sí-siú chi̍t-ê hong-hiòng. Kî-si̍t kap chit-má ê TGB kāng-khóan ê būn-tê, góa mā bat tú--tio̍h, kóng khah chèng-khak--ê, èng-kai kóng che chiū-sī lán só͘ bīn-tùi ê siā-hōe ê sok-iáⁿ. Kám m̄-sī? Lán ta̍k-kang chhut-mn6g, tī tiān-sī khòaⁿ--ê, tī lō͘--ê tú--tio̍h-ê, chha-put-to lóng-sī kāng-khóan ê lâng kap sū. Che tio̍h-sī seⁿ lán chhī lán tōa-hàn ê Tâi-ôan siā-hōe ê chin-siòng. Chit-chióng tāi-chì m̄-sī chi̍t-kang nn̄g-kang ē kái-piàn--ê, nā bô chá tō kái-koat--a. Sīm-chì hō͘ lán ka-tī koh khah kan-khó͘--ê sī, tī lán ka-tī ê sim-lāi, lán mā ta̍k-put-sî ài bīn-tùi ka-tī ê put-an, bóng-tōng, kiau-ngō͘, mô͘-tún kap tô-phiah. In-ūi lán ē-tàng thé-hōe chit-kóa tāi-chì ê khó͘, só͘-í lán mā hi-bāng ē-tàng chiong lán ka-tī kā chit-ê siā-hōe tùi che lāi-té lī-thoat--chhut-lâi, kám m̄-sī? Khó-lêng án-ne lí ē kám-kak kî-kòai, kóng kàu bóe--á, m̄-sī kāng-khóan ài chō-sêng kái-piàn? Bô m̄-tio̍h! Chí-sī chit-ê kái-piàn ài ùi lán ka-tī khai-sí. Iau-kiû pa̍t-lâng kái-piàn sī siōng kán-tan iā-sī siōng khùn-lân ê tāi-chì. Lâng só͘ ē-tàng 100% khak-si̍t ū pá-ak chò ē kàu--ê, chiū-sī kái-piàn ka-tī. Che sī góa ka-tī ê chi̍t-sut-á keng-giām. Lán bô khó-lêng iōng lán ê la̍t khì kái-piàn sè-kài, tān-sī tong lán kái-piàn ka-tī, kái-piàn ka-tī ê hong-hiòng, kái-piàn ka-tī ê kak-tō͘ liáu-āu (góa m̄-sī kóng kái-piàn lí-sióng kap bo̍k-phiau), chi̍t-ba̍k-nih, lí ē hoat-hiān lēng-gōa chi̍t-ê ôan-chôan bô-kâng ê sè-kài. Hit ê khì-hun, iah-sī hit-tang-chūn ê lí, chū-jiân ū kái-piàn seng-khu-piⁿ ê lâng ê le̍k-liōng. Iōng bu̍t-lí-ha̍k ê kak-tō͘ lâi khòaⁿ mā kài chū-jiân, tong chi̍t-ê kín-tiuⁿ ê Closed System kái-piàn jīn-hô chi̍t-ê tiâu-kiāⁿ ê sî, put-kóan chit-ê piàn-hòa hoat-seng tī siáⁿ-mih só͘-chāi, kui-ê System tio̍h ē hoat-seng piàn-hòa, m̄-thang bē-kì-lih lán mā sī chit-ê hiān-chōng kap būn-tê ê chi̍t pō͘-hün. Beh kái-piàn sè-kài, thâu-chi̍t-pō͘ tō-sī tùi kái-piàn ka-tī khai-sí.
Che sī gún bó͘ kā góa kà ê tō-lí. M̄-chai kap lí siūⁿ beh thiaⁿ--ê chha jōa-chē, hi-bāng tùi lí ū tām-po̍h-á chham-khó ê hāu-kó. Chòe-kīn SARS tng liû-hêng, ta̍k-ê lóng ài pó-tiōng.
Chheng-sioong
留言列表
