8月初9暗時, 無意無意看tio̍h電視台teh放送《台灣心聲》, hit-kang節目訪問李筱峰先生, chit-ê有代表性ê台派教授, tī節目--nih講tio̍h in teh chhui-sak ê「台灣正名」有2項選擇: 1項是台灣共和國, 另外1 ê是「中華台灣國」(自由中國『雷震』以早提出--ê); 李--先-生koh特別強調, 台灣1949年tō事實獨立--a, hit-chūn sa China hia ê國名kap憲法來台灣用, chit-má kan-taⁿ主張kā名換--1-ē niâ, m̄免看做是「變更主權」ê大tāi-chì.
Chiah-ê台派學者頭人nah ē反形kah chiah-nī緊? China ê國名kap憲法是台灣人ka-tī去sa來用--ê? Iah是China人ngē搬來壓tī台灣頭殼頂--ê?
台灣人反體制ê民間運動力量, kám m̄是beh追求「出頭天」? Kám m̄是beh kā外來體制ián hō͘倒? Kám m̄是beh反抗chit-ê體制無公平ê民族kap階級差別政策? Lán運動ê動力kap目標, kám m̄是beh瓦解/消滅中華民國舊體制, 透過社會進步力量ê對話, 起造新ê體制?
Chit 10冬來, chiah-ê頭人1 pái koh 1 pái kā lán an-tah講, 改變體制ài 1步1步ta̍uh-ta̍uh-á來, chiah bē食緊lòng破碗, 結果--leh? Lán ê運動soah teh倒退lu? Lán soah愈niū愈chē?
自90年代初期民進黨新潮流hoah「進入體制反體制」了後, kā反體制ê運動力量收編做in進入體制換利益kap權力ê kho͘-jí-á, m̄-koh in進入體制了後, m̄-tāⁿ無beh「反體制」, koh顛倒一直ǹg既得利益集團àⁿ頭屈服; 本chiâⁿ是beh kā外來體制ián hō͘倒, soah變做teh爭取外來體制--nih ê「政黨輪替」; 本chiâⁿ大聲chhui-sak「終結外來體制」, chit-má soah變做teh『捍衛中華民國』......
是án-chóaⁿ lán ê理想一直kiu水--去? 是án-chóaⁿ lán tio̍h一直顧慮舊勢力kap既得利益者ê感受? 是án-chóaⁿ lán顛倒一直放棄歷史ê清算? 是án-chóaⁿ lán bōe-chêng戰tō一直niü, niī kah ta̍k項道理都tio̍h phah折, ta̍k項訴求都tio̍h kap舊勢力hoah價?
政治頭人向體制投降--a, 台派學者頭人mā tòe leh kiu--去, in m̄敢呼召群眾抵制政治頭人, 顛倒koh動員群眾來hō͘政客騙選票; in pìⁿ kah無齣頭--a, soah ia̍t「正名」ê旗á beh kā中華民國改名. In kám知iáⁿ:「正名」是teh替舊體制ê延續走chhōe出路! 是teh替hō͘體制iam--去ê政客背書! Mā是teh替學客投機kap妥協ê行為脫罪!
1999年chiah-ê學者頭人kám m̄是大聲批判許信良「三通賣台」? Chit-má陳水扁宣佈môa年beh開放通航, in soah kek tiām-tiām! 1996年in kám m̄是呼召台灣人支持彭明敏, thang實現台灣獨立? Chit-má soah講台灣1949年tō事實獨立--a! 1995年in kám m̄是呼籲台灣人ài phah破「李登輝情結」? Chit-má soah kā李登輝當做是台灣ê救世主! 1992年in kám m̄是chiah teh強調「制憲建國」? Chit-má soah hām「中華台灣國」都ē-tàng接受!
In立場不時徙來徙去, lóng m̄免顧慮歷史ê事實, m̄免kap群眾對話, mā m̄免對運動有合理ê交帶?
Chiah-ê台派學客一直批判舊統治勢力, m̄-koh soah the̍h體制ê價值觀teh鞏固in ê權威! In主張ài有在地認同, m̄-koh in頭殼內soah kan-taⁿ知有唐山公, m̄-bat beh認同平埔má! In反對「獨尊國語」, m̄-koh m̄敢批判「華語漢字霸權」! In反對特權, m̄-koh m̄敢批判軍公教階層ê優待政策! In反對「外來統治」, m̄-koh m̄敢批判「民族差別政策」! In反對「烏金」, m̄-koh m̄敢批判「階級統治」!
In靠勢群眾對in ê「權威崇拜」, 靠勢in是「清流」, 有免受批判kap檢驗ê特權, 無beh tòe in行--ê, 是m̄知thang覺醒; 無beh thīn「正名」--ê, 無beh參加『政權保衛戰』--ê, 是歷史ê罪人; 敢挑戰in ê權威--ê, tō是外來政權ê phah手!
若koh繼續tòe tī chit-tīn台派China讀冊人kha-chhng後, lán kám知iáⁿ ka-tī到底ē hō͘ in chhōa tùi toh位去?
留言列表
