若是性命ê火星爆發是瞬間--ê
Án-ne lí tio̍h-ài把握機會
Kā靈魂燒hō͘ lī-lī-lī
半暝, 濛霧--nih ná sió-khóa-á thàu-lām『催淚瓦斯』ê味.
台北街頭, 石頭, 玻璃, 汽油矸á 四散tī塗腳, 黃黃ê路燈chhiō--leh, 有真siān真thiám ê感覺. Tī『綺夢酒廊』oat角ê巷á內, 耳孔邊傳來cha-po͘人chiâⁿ急ê喘氣聲.
豬肝色ê血ùi cha-po͘人ê手骨一直puh--出-來, 順手骨滴落塗腳, ta̍uh-ta̍uh-á積做1 ê窟á. 看ē出--來, 孔嘴真疼, cha-po͘人強迫ka-tī忍--leh, 拚勢beh hō͘ ka-tī保持清醒, m̄-koh tú-chiah拚命chông ê喘氣聲soah無法度停--落-來, 隨時有可能hō͘人發現ka-tī chit-má ê所在.
若無靈魂, tō bē bú到chit-má chit款地步, cha-po͘人án-ne teh想.
血ta̍uh-ta̍uh-á kian--起-來, 喘氣 mā開始正常--a. Kúi台警備車siú--過, 濛霧--nih ê『催淚瓦斯』hō͘ hàiⁿ tín動.
Tāi-chì是án-chóaⁿ發生--ê?
其實, i早tō知影答案--a.
1985年ê龍台社區, e-po͘時ê日頭溫暖kah hō͘人真清爽.
社區ê人大部份lóng去隔1條基隆河ê振榮工業區上班, 街á看--來真曠闊, 人mā tòe leh懶--落-來, 連路邊果子擔ê頭家娘mā借機會tī『陽傘』ē-kha tuh-ku.
M̄-koh有chi̍t-kóa人soah熱phut-phut. 大概有5~6 ê偷走學(o̍h) ê國中生行chò-hóe, ná 1 tīn無骨頭ê人tī街á亂hàiⁿ, 不時koh用輕浮ê口氣teh khoe路--nih ê少年小姐.
「Oeh, án-ne亂hàiⁿ若hō͘訓導主任chang--tio̍hbeh án-chóaⁿ?」其中1 ê叫做「正旗」--ê án-ne講, 看--來有tām-po̍h-á緊張, che hōan-sè是i第1 pái tòe ta̍k-ê偷走學.
「Aih-ioh, beh出來sńg tō mài驚, 若無, lán去A勝in厝開ê電動間, án-ne總bē koh hông lia̍h--tio̍h-lah!」1 ê漢草khah矮, m̄-koh真精光ê人án-ne應, i叫做「王奇」.
提議隨得tio̍h其他人ê贊同, in kui-tīn chhōa--leh行入去1間kám-á店, chit間店因為『便利商店』ê競爭chiah改做電動間. In kúi ê kālân-san--ê換好勢, 興phut-phut坐tī電動機á頭前sńg--起-來.
Tī chit種場合, 正旗tiāⁿ-tiāⁿ bē tòe leh phah電動, 厝--nih m̄-bat hō͘ i『零用錢』, i kan-taⁿ khiā tī邊--á看. Hiông-hiông, i發現kāng班ê沈能信mā坐tī店--nih teh phah電動.
正旗真歡喜, 走去i邊--á:「A弟á, lí mā偷走lán導師ê課--o͘h?」A弟á是沈能信ê小名.
沈能信taⁿ頭看tio̍h正旗, 面á有tām-po̍h-á歹勢ê笑容:「橫直除去數學, góa mā無1科ē看--得, 上a婆á ê課m̄是kāng款ài hông phah, 不如走出來chhit-thô.」續--落koh問:「Lí是án-chóaⁿ bòai chò-hóe sńg?」
「O͘h, 無要緊--lah, góa無siáⁿ愛sńg電動.」
「騙--人, 正旗是無錢thang sńg, no͘h, 無要緊, góa請--lí, chit-kóa money sa--去.」M̄知siáⁿ-mih時chūn, 王奇óa近in 2人, 手--nih tēⁿ kúi-nā-ê銀角á.
「Kā lí講góa bòai sńg--mah......」正旗話iáu-bōe講soah, tō有1 ê衫á破破ê國中生衝--入-來, 大聲嚷:「害--a! 隔壁庄介壽國中ê人走--來, 看tio̍h人tōphah!」
Ta̍k-ê gāng 1 ē. 少年gín-á活動ê場所lóng有分地盤--ê, ka-tī ê地盤叫做「lán庄」, 其他--ê叫做「in hit庄--ê」, 雖bóng有時á ē因為看bē爽, iah是為tio̍h sio-cheⁿ teh jiok cha-bó͘ gín-á來sio-phah, m̄-koh lóng bē侵門踏戶到對方ê地盤. 介壽國中chit-tīn人chông--來, 正經hō͘ in真意外.
「Kán! Nah ē-sái hō͘ in chiah hiau-pai! Ke-si chhôan-chhôan--leh, tòe góa行!」王奇代先hoah聲, 眾人choaⁿ-á ùi店--nih壁邊神明桌腳, sa 1綑用報紙包--leh ê鐵棍á kap野球bá-tah, 衝出去街á.
正旗mā續手sa 1枝, m̄-koh i ê手lio̍h-á ē chhoah, beh sio-phah, i iáu是菜鳥á, m̄-koh i猶原認為保護ka-tī庄ê行為是tio̍h--ê.
Chiah行出店á無kúi步, tō有5~6 ê人手gia̍h ke-si, tùi in chia衝--過-來. In是社區--nih另外1批chhit-thô gín-á, 大部份lóng無讀國中iah是讀到1半tō無koh讀--ê, 因為tiāⁿ-tiāⁿ un tī社區--nih ê撞球間kap電動間, kap王奇in chit-tīn--ê lóng真熟.
「Lín mā聽tio̍h消息--a o͘h? 有看tio̍h人--無?」Chhōa頭ê青--á面歪歪teh問.
「無--lah! Sì-kè chhōe看māi chiah koh講--lah!」王奇應--tńg-去, kui-tīn人馬tō開始tī社區--nih se̍h, 路邊擔á kap店á ê頭家看tio̍h chit種情形, 心內加減了解發生siáⁿ-mih tāi-chì, lóng當做無看--tio̍h, iah是緊閃--開, 假影teh無閒. Chit-chūn, 正旗hiông-hiông感覺ka-tī ná tio̍h-che, 心肝íⁿ-á有1種奇怪koh艱苦ê感覺.
「Tī hia! Ah! In tng teh bok 2年4班ê A賓.」
正旗順發現ê人ê手勢看--過-去, hông phah--ê是學校放牛班ê陳文賓, 印象中, A賓人真好, 真tiām koh真有孝, tiāⁿ kā厝--nih鬥做加工, bē-tàng kap in chò-hóe chhit-thô. Chit-má i hông phah倒tī塗腳teh liàn.
Ta̍k-ê看--tio̍h緊衝--過-去, 2 pêng開始phah--起-來. 對方人數kap ka-tī chit-pêng差不多, mā lóng有chah鐵棍á chit類ê ke-si. Ná teh sio-kiat, 正旗心內ná teh驚惶, 真驚ka-tī hō͘人phah--死, 因為失神soah hō͘對方ê棍á bok kúi-nā ē.
Pi! Pi! Pi!『不要再打了!』遠遠ê所在, 訓導主任腹肚大khian大khian, 1 kho͘ thûi-thûi tè tī社區其他人kha-chhng後, ná pûn pi-á ná走--過-來.
2 pêng人馬聽tio̍h pi-á聲, sio-phah隨停--落-來, 隨人散--去, táⁿ-má-ka路是1 tah 1 tah ê血跡.
正旗用手kā hông phah tio̍h傷ê孔嘴om--leh, 食力食力走tńg厝--nih, i心內teh想, che絕對bē-tàng hō͘媽媽知影, 若無, tō慘--a.
留言列表
