台灣組合

9月底Babuza醫師推薦góa參加「李登輝學校」ê「菁英師資班」, hō͘ góa有機會hiah-nī óa近國民黨式ê價值核心, thang了解in án-chóaⁿ teh操作kap掌握台派ê解說權.

去李登輝學校上課, góa感受--tio̍h-ê, 是權威, 封建kap家長式ê價值信仰!

Tī李登輝學校上課, ta̍k節課開始lóng規定tio̍h-ài『起立, 敬禮, 坐下』; 李登輝上課ê形式, 是叫學員唸課文, 唸1段李登輝解說1段......「菁英師資班」講是beh傳播李登輝ê民主化信念kap經驗, 用--ê soah是chhōa國校á學生ê模式, in hōan-sè是beh用chit款輕鬆心適ê方式做包裝, m̄-koh心態soah chiah-nī驕狂, 根本kā chiah-ê「社會菁英」當做白癡!

李登輝講, 台灣(中華民國?) 1996年tō本土化--a, chhun國家認同ê問題iáu-bōe解決, i koh講, 中華民國無存在, 講1 pái無人信無要緊, 講10 pái tō ē變真--ê......

李登輝講, hiah-ê tī街頭hoah台獨--ê lóng無khah-cho̍ah mā無實際, lóng是狗吠火車, 若m̄是 i考慮「政治現實」, 看時勢hoah出民主化, 本土化, 台灣優先, 修憲, 正名, 公投......chiah-ê議題, 到taⁿ iáu是統派teh大聲......; i講, i做過中華民國總統, siōng了解中華民國; i koh講, 台灣若beh有出路tio̍h-ài「follow me」, koh強調che tō是認同ê問題, tō是百姓beh tòe--i-無ê問題......

『成王敗寇』「贏--ê有解說權」......i講出chiah-ê話, tú-tú好直接kā i心肝底China價值觀現--出-來! 台灣人若無「脫漢」, 若無「去中國化」, beh án-chóaⁿ起造主體立場? 李登輝chit款China價值觀kám有可能引chhōa台灣人chhōe-tio̍h出路?

Kāng hit-ê時代, jōa chē台灣人用性命kap熱情kap統治體制鬥爭, jōa chē台灣人用自由kap尊嚴ê代價, 逼統治體制一直倒退; ah李登輝--leh? I選擇bih入去國民黨統治體制內底, i teh享受榮華富貴, chit-má chiah-ê成果soah lóng變做是李登輝ê功勞, i 1-sut-á to bē感覺kiàn-siàu! I kám m̄免向台灣人會失禮?

中華民國到taⁿ iáu有效teh統治台灣社會, i soah緊beh替「中華民國」正名, 替外來體制chhōe繼續存在ê活路, mā替ka-tī消除歷史ê責任, koh ē-tàng繼續做台灣人「權威崇拜」ê頭人. M̄-koh, 歷史ê是非kám chiah-nī輕鬆tō póe ē lī? 歷史ê事實kám據在i teh解說? 歷史ê清算kám是 i teh選擇--ê?

李登輝kā國民黨內底chhńg無利頭ê台派政客kho͘ óa--來, 叫台灣人tio̍h支持chiah-ê 3流「人才」; 台灣人運動逼kah國民黨ê統治霸權一直崩盤, i soah用本土化ê口號, hō͘國民黨chhōe-tio̍h存在ê新性命; 台灣人總結歷史ê kha步, hō͘ i 1句「新台灣人」阻擋--落-來; 台灣人ta̍uh-ta̍uh-á teh重建ê是非價值, hō͘ i利用藍綠權力鬥爭koh lā亂--去!

李登輝m̄知反省mā m̄知kiàn-siàu! I享受中華民國體制ê榮華富貴了後, koh繼續beh收割台灣人ê反抗運動, beh kā台灣人用性命代價換--來ê成果, lóng變做 i個人ê功勞, i teh扭曲歷史ê事實! 李登輝是台灣歷史ê大賊kó͘ !

是siáⁿ-mih人teh kā李登輝phô͘做台灣人ê「神」? 是李友會chiah-ê台派資本家! 過去40~50冬, 黃崑虎, 許文龍......chiah-ê財團資本家teh chhòng siáⁿ? In kám bat出過力teh對抗中華民國外來體制? In kám bat出過錢teh起造台灣ê主體? 無! In tiām-tiām利用體制ê特權teh thàn錢, in用體制法律ê保護teh破壞環境, teh剝削勞工, teh維持中華民國ê統治霸權! 今á日in tòe tī李登輝身軀邊teh大聲siáⁿ-hòe?

是siáⁿ-mih人hō͘李登輝chit-kho͘大賊有機會割稻á尾? 是hiah-ê台派政客, 學客kap社客! Chit-tīn人用in ê發言權teh加強李登輝ê權威! Kāng 1 tīn人1996年óa去彭明敏邊--á hoah beh『打破李登輝情結』, 2000年khû tī陳水扁身軀邊beh『終結中華民國』, chit-má ku tī李登輝kha-chhng後beh『對抗舊勢力』.

Siáng掌握台派運動ê解說權, siáng hō͘人民群眾當做是「救世主」, in tō緊óa--去, che tō是China讀冊人ê性格, 投機kah隨時to是台派ê主流; in立場徙來徙去mā lóng免向群眾交帶, 人民群眾一直to m̄是in得tio̍h權力ê源頭; siáng若敢懷疑in ê「救世主」, in tō趕緊用智識權威kā ah落底, 若ah bē落, tō直接kā批做『泛藍的打手』!

Tō是chit-tīn人teh決定lán ê出路, 是in teh chau-that lán ê熱情! 群眾ê力量hām反抗ê理念, hō͘ in當做是in lak-tē-á內底ê棋jí-á, beh用ê時chiah the̍h---出-來, 用soah隨koh收--tńg-去, 若無in允准, 人民群眾bē-tàng chhìn-chhái the̍h去用!

In是án-chóaⁿ有才tiāu chiah hiau-pai? 是lán ka-tī造chiâⁿ--ê! 是lán beh崇拜權威, 是lán beh接受頭人文化, 是lán甘願tiām-tiām hō͘ in sái-lōng, chit-tīn歷史ê賊chiah有thang chiah驕狂teh決定lán ê運命!

Chiah-ê歷史ê賊若繼續hiau-pai繼續sái-lōng, lán ê歷史tō無thang清算, lán社會ê是非tō無thang重建, 平等koh有尊嚴ê新體制tō繼續是夢!

──《TGB通訊》第50期(2003/11)