Tòa tī溪邊ê外má, 是góan a母ê養母, 細hàn ê時, góan lóng ē kap a母tńg去溪邊ê a-má hia. A母tiāⁿ-tiāⁿ講:「生--ê且1邊, 養--ê功勞khah大天.」A母嫁ang了後, iáu是kap養母關係khah親.
外má tòa tī宜蘭平洋溪北1條真大條ê溪邊, 大hàn了後, góa chiah知iáⁿ chit條溪叫做「得子口溪」. 外má tō tòa tī得子口溪中chat, hit-pêng ê田叫做「lòm田18甲」, 種作kap收tiū-á tio̍h kò船á, hia塗質khah軟, choh-sit人雙kha踏入去lòm田ē沉--落, 田塗ē im到胸坎, 外公ê田差不多tō是án-ne.
外má ê厝內真簡單, m̄-koh是有樓頂ê厝, m̄是有錢chiah起chit棟樓á厝, 是hia ē做大水, 一定ài有2樓thang bih大水, 雖bóng厝真無好勢, m̄-koh對細hàn ê góa來講, a-má in tau真正是gín-á ê天堂.
Koh有, 厝前1條細hàn看--起-來ná海hiah-nī闊ê溪, tō有夠好sńg--a. A母tńg去後頭厝, tio̍h先ùi厝--nih騎1點鐘鐵馬, 了後, kā車chhah tī溪邊ê橋頭, chiah koh kò鴨母船半點鐘, chiah ē到外má in厝. 鴨母船真長, a母khiā tī船尾, góan gín-á分配坐tī船身kap船頭, a母用1枝真長ê竹篙, 真有pān kā插入去溪底, ǹg前出力, 船tō ē tī溪水頂面快速ǹg前行, 竹篙koh抽--出-來, koh插--落, 看a母theⁿ kah chiok輕鬆--ê.
Ta̍k-pái坐船góa to真好玄beh摸船外口冷冷ê溪水, 頭想beh貼tī水面看溪底ê魚á, 小小ê身軀bē認份, m̄ tiām-tiām-á坐hō͘好烏白tín動, chit時khiā tī船頭ê a母tō大聲罵--人, 因為烏白tín動ē péng船, chiok危險--ê.
溪底有真che生物, 有南洋tāi-á (吳郭魚), 鯽á魚, tāi-á魚, koh有毛蟹á, 蝦á hām lô͘-môa, thô͘-sat, 厝前ê埕--nih tún kui堆a公lia̍h魚, 電魚(用陷阱) ê ke-si. 溪邊ê pa̍t-á欉, 竹á欉chhìn-chhái看lóng有外公khǹg ê陷阱. 當然, kan-taⁿ lia̍h魚, sńg魚tō chiok趣味--a.
另外, bán果子mā真心適, 外公菜園有種木瓜, 柚á, 溪邊koh有1欉pa̍t-á樹, chit欉生--出-來-ê是紅心pa̍t-á, 細粒koh bái-bái, m̄-koh真phang koh真好食. Ta̍k-pái tńg--去, 紅心pa̍t-á一定lóng走去góan gín-á ê腹tó͘內.
厝後piah koh有真chē毛蟹á孔, in ē出來sì-kè sô, 毛蟹ê管á真厲害, ta̍k-pái góan gōng膽空手tō beh kā lia̍h, 結果hō͘咬kah ki-ki叫, iáu是a母khah厲害, a母用i ê大頭母kap中cháiⁿ ùi毛蟹ê後piah tēⁿ--落-去, ta̍k隻毛蟹lóng走bē去.
外公koh有teh飼鴨á, 鴨á是飼來生卵thang賣hō͘人做鹹卵--ê. Kā鴨á lêng-tī mā真心適, 用竹篙kā kui-tīn鴨á趕來正pêng koh趕去tò邊, 到尾--a koh kā in趕落去溪底, 看鴨á「á~ á~」叫, 實在chiok好sńg--ê. Chit-chūn若hō͘外má看--tio̍h, tō ē大聲hoah:「鴨á hō͘ lin驚驚--leh, 卵lóng生bē出--來!」「Koh趕鴨á, liam-mi kā lín lia̍h去溪底tū水.」
去外má hia, ùi船頭sńg到溪邊, koh sńg tùi菜園去, kui工sńg kah無想beh tńg--去, lóng tio̍h a-má用趕鴨á ê方式, the̍h 1枝長長ê竹篙, chiah ē-tàng kā góan ah chiūⁿ船, 乖乖á tòe a母tńg厝.
A母是新婦á, 細hàn tō真認份, 做khang-khòe kha手真liú-lia̍h, 外má ê親生gín-á lóng有去學校受教育, kan-taⁿ m̄是親生ê a母bē-tàng去讀冊, kui工tī厝--nih做khang-khòe. A母講 i 6歲ê時聽a舅講--tio̍h, tō知iáⁿ ka-tī m̄是外má親生--ê, m̄-chiah ē受tio̍h委屈, i lóng chiâⁿ認命.
Góan a母in村--nih ê人lóng叫 i「紅毛--ê」, 到今á日, 有tang時á有人khà電話來góan tau, mā是叫 i「紅毛--ê」. A母siōng重要ê khang-khòe tō是顧『唐氏症』ê細hàn舅kap顧鴨á, khioh鴨卵.
A母有1台la-jí-o͘h ē-tàng聽, i ē-hiáu唱文夏, 洪一峰ê台語歌, 聽歌, 唱歌是a母19歲嫁a-pa chìn前, 消磨 i青春唯一ê gī-niū.
留言列表
