Pòaⁿ-mê 3 tiám, góa iáu teh kek thâu-khak siá TGB Thong-sìn 59 kî ê bûn-chiuⁿ, soah ū lâng lâi lòng-mn̂g. Chit chióng tāi-chì kan-taⁿ Uichì chò ē chhut--lâi, m̄-koh i chit-má lâng tī peng-iâⁿ, to bô thiaⁿ i kóng beh tô-peng--leh, tō chún beh tô-peng, mā bē gōng kah cháu lâi Tām-chúi bih. Mn̂g chi̍t ē khui, chiah chai sī Noya, khòaⁿ i chhiú koh kōaⁿ 2 kòan bì-luh, sǹg i iáu ū liông-sim.

 

Góa siūⁿ lí mā bē hiah chá khùn.” Noya kiâⁿ góan chhù ná teh kiâⁿ in tau ê chàu-kha--leh, góa mā chiâⁿ kòan-sì--a. Góa chò góa kiâⁿ ji̍p-khì pâng-keng kè-sio̍k kek thâu-khak, chit kî nā bô siá 1 phiⁿ-á chhut--lâi, góa ē hō͘ góan chóng--ê pak-phôe.

 

Lí teh chhòng siáⁿ? Siá lī-chit-su--o͘?” Noya phâng 2 au bô bì-luh phang-bī ê mi̍h-kiāⁿ ji̍p--lâi.

 

Bô--lah, lī-chit-su chá tō siá hó--a, chit-má teh siá bûn-chiuⁿ. Oeh, lí m̄-sī kōaⁿ bì-luh--o͘? Au-á lāi-té té siáⁿ?”

 

Heh! Heh! Che sī góa te̍k-pia̍t ūi lí tiâu--ê, lí cho̍at-tùi ioh bē chhut--lâi, che sī『酪梨牛奶』, lí kín lim khòaⁿ-māi--ê, koh khǹg,『維他命Ctō cháu-cháu--khì-a.”

 

Bô, lí iōng bì-luh kan-á té sī té sim sng--ê-o͘, sī kóng lí ê『酪梨牛奶』ê sek nah ē kòai-kòai, bô sêng gōa-kháu teh bē--ê.” Góa kā lim 1 chhùi, iáu-siū! Ū-kàu pháiⁿ lim--ê. “Bô, lí sī lām siáⁿ--lah, pháiⁿ lim kah beh sí.”

 

Góa kan-taⁿ chham gû-leng kap le-bóng-chiap niâ, siáng chai-iáⁿ ē pìⁿ án-ne, kâng tàu lim--lah, tùi sin-thé bô pāi-hāi--lah.” Khòaⁿ Noya teh kan-sîn-á-chhiò, góa tō chai-iáⁿ it-tēng sī i koh o͘-pe̍h chhì, chò hāi--khì ê mi̍h-á chiah ē the̍h lâi hō͘--góa. Góa bô chhap--i, kè-sio̍k chò góa kek thâu-khak siá bûn-chiuⁿ.

 

I khì peng-siuⁿ chhōe ē lim--tit ê mi̍h-kiāⁿ, koh oat ji̍p-lâi pâng-keng khòaⁿ góa chìn-chêng siá ê lī-chit-su, ná khòaⁿ ná teh se̍h-se̍h-liām.

 

Khòaⁿ i án-ne, góa seng kā pàng-tiau kóng: “Lí nā hāi góa kin-á-ji̍t siá bē chhut--lâi, góa nā hông pak-phôe, ē seng chhōe lí tú-siàu.”

 

Bûn-chiuⁿ kám bô kàu? Chìn-chêng m̄-sī ū kúi-nā ê hoah beh siá?”

 

Kóng bóng kóng, kàu taⁿ a̍h bô siu--tio̍h-a.”

 

Lí beh siá siáⁿ-mih chú-tê?”

 

M̄-chai ā, siá chiok kú--a iáu-sī koh siá bē chhut--lâi, kā góa tàu siūⁿ--1-ē-lah, kiōng beh chak--sí-a.”

 

Lí tō-sí sim chēng bē lo̍h--lâi, bûn-chiuⁿ m̄-chiah siá bē chhut--lâi. Seng-o̍ah-iâⁿ chìn-chêng kap kiat-sok liáu-āu lí ka-tī ê sim-kéng piàn-hòa, koh ū Tâi-bûn-iâⁿ chìn-chêng kap kiat-sok kàu taⁿ hoat-seng ê tāi-chì, chiah-ê tāi-chì hō͘ lí ut tiâu--leh, hō͘ lí tn̄g-tio̍h khùn-kéng, lí beh koh peh--khí-lâi, beh koh khàng--khí-lih, tio̍h-ài ùi chin lāi-té khì chhōe, TGB teh kiông-tiāu ê chū-ngó͘ sêng-tióng kám m̄-sī tō che?” Noya ná sńg i si̍t-giām sit-pāi ê『酪梨牛奶』ná án-ne kóng.

 

M̄-koh nā ut tiâu ê in-sò͘ sī tī lâng--leh? Bô kā in chhò-chhò mē-mē--leh sī beh án-chóaⁿ tháu?”

 

Che tong-jiân mā tio̍h tháu, m̄-koh ài khòaⁿ lí beh ēng siáⁿ-mih khóan hong-sek khì siau-tháu. Lí beh hiān khà tiān-ēe kiò in khí-lâi pàng-jiō, iah-sī bîn-á-chài sûi chhiong khì in bīn-thâu-chêng kā khàm pò͘-tē, che tong-jiân lóng ē-sái, būn-tê sī án-ne chò lí tit-tio̍h siáⁿ? Ū hoat-tō͘ kái-piàn siáⁿ? In iû-gôan hiah-nī ti-náu, bô su-sióng, bô Logic, bô hong-hiòng. Lí kám m̄-sī beh chò ūn-tōng? Chit-tiám-á tāi-chì nā thun-lún bē lo̍h--lâi, lí sī beh chò siáⁿ-mih ūn-tōng? Lán chò ūn-tōng sī beh kiâⁿ tùi lán jīn-ûi tio̍h ê hong-hiòng, lán jīn-ûi tio̍h ê kè-ta̍t-koan--khì, in chiah-ê lóng sī pêng-iú, kin-á-ji̍t lán khòaⁿ in chò tāi-chì ê hong-hoat kap su-khó tāi-chì ê Logic bē thong, tong-jiân su-iàu kā in tiâu hō͘ hó-sè, nā tiâu ē hó-sè, tùi in, tùi lán, tùi ūn-tōng lóng sī hó tāi-chì, m̄-koh nā-sī lán án-chóaⁿ chhiâu to chhiâu bē tú-hó, in beh tùn-teⁿ tī hia mā bô hoat-tō͘, le̍k-sú bē án-ne tō thêng--lo̍h-lâi, lán mā-sī tio̍h it-ti̍t kiâⁿ ǹg chêng khì. Lí nā khòaⁿ khah hn̄g--leh, tō ē hoat-hiān chit chūn kap in gô͘ che si̍t-chāi ē hō͘ lâng khí-ài-chhiò, lán sī beh po̍ah āu-piah siōng tōa-tù--ê, chit-má kap in chiàn che ū khah-cho̍ah? Beh chiàn mā tio̍h chhōe khah tōa-bóe--ê chiàn.” Noya kóng soah koh kòan 1 chhùi-á『酪梨牛奶』, mā bô bē-kì tu 1 au-á hō͘--góa.

 

Khó͘-te̍h-te̍h ê『酪梨牛奶』hiám-á hō͘ góa thò͘--chhut-lâi, m̄-koh góa iáu-sī ngē kā thun--lo̍h-khì, khó͘-bī sûi tī chhùi--nih thòaⁿ--khui, hō͘ góa khòaⁿ-tio̍h ka-tī.

 

Tāi-ha̍k sî-tāi, chih-chiap ūn-tōng liáu-āu, kám-siū tio̍h chi̍t-kóa sianpai ê cheng-sîn ì-chì, hō͘ góa sóan-tek chhut-gia̍p liáu-āu ta̍h ji̍p-lâi Tâi-gí-kài chia̍h thâu-lō͘, jia̍t-phut-phut ê sim ǹg-bāng tī chit ê ki-chhó͘ tīn-tē ná si̍t-chiàn ná chò su-sióng bú-chong. M̄-koh hiān-si̍t seng-o̍ah chóng--sī ū i ê hān-chè, tn̂g sî-kan teh chhú-lí hêng-chèng sū-bū, soah hō͘ ka-tī tiâu tī sū-bū-sèng ê khang-khòe--nih, thâu-khak jú lâi jú bô teh ká, mā jú lâi jú bô teh kap ka-tī lōe-sim tùi-ōe. It-ti̍t kàu kū-nî tī Po͘-lí pān Tâi-gí Seng-o̍ah-iâⁿ, kui-sian lâng chiah koh o̍ah--khí-lâi, tī hia tit-tio̍h Lōa bo̍k-su ê su-sióng chhì-khek, mā khòaⁿ-tio̍h Taⁿ-bí-kheⁿ siā-khu chū-chú ê le̍k-liōng.

 

Tī Tâi-gí-kài chò khang-khòe ê koan-hē, chiâⁿ chē pêng-iú lóng jīn-tēng góa sī “chò Tâi-gí--ê”, sui-bóng án-ne kóng bô hó-pháiⁿ-ì, m̄-koh kú--lâi, góa soah jú lâi jú m̄-gōan hō͘ lâng án-ne tēng-ūi. Kin-nî ê Seng-o̍ah-iâⁿ, góa kāng-khóan kî-thāi ka-tī ē-tàng tit-tio̍h chhì-khek kap o̍ah-le̍k, thang kái-koat ka-tī chit-chām-á ê tiuⁿ-tû hām khùn-kéng. Hit 5 kang tī Sai-lê Pi-thâu-pòe, TGB tī hia kám-siū chiâⁿ chē, ta̍k-ê iû-gôan kā móa-móa ê chhì-khek chah tńg-khì chhù, kan-taⁿ góa iáu teh gōng-sîn, kan-taⁿ góa kā chiah-ê chhì-khek seng tàn tī piⁿ--á, ká tī ka-tī ê khùn-kéng--nih, bô tì-kak tio̍h tī Pi-thâu-pòe hit 5 kang ê kám-siū, hoan-sè thang thê-kiong ka-tī chhōe-tio̍h chhut-lō͘.

 

Ah, góa bē-kì 8 tiám ài khì chē-chhia, góa beh seng tńg--khì-a.” Noya mā teh sòaⁿ-hêng, to bô chhun kúi tiám-cheng--a, chit chūn tńg-khì khùn m̄-kiaⁿ peh bē khí--lâi. “Bīn-tùi khùn-kéng, ū ê lâng sī iōng siá--ê, ū ê lâng sī iōng hoah--ê, m̄-koh chit-má TGB bô tiān-tâi thang hō͘ lí kóng, góa khòaⁿ lí iáu-sī koai-koai-á siá bûn-chiuⁿ khah iâⁿ--lah.” Noya beh cháu chìn-chêng koh tàn chit kù hō͘--góa.

 

Góa khòaⁿ tùi toh-á-téng hit kòan kòai-sek koh khó͘ ê『酪梨牛奶』, i kèng-jiân kā khǹg--leh chò i cháu.

 

──TGB通訊》59(2004/8)


arrow
arrow
    全站熱搜

    台灣組合 發表在 痞客邦 留言(0) 人氣()