TGB台語生活營 , 今年選tī西螺ê Pi-thâu-pòe社區舉辦, 5工4暝, 有真深刻ê感受kap觀察.
Chit pái tī Pi-thâu-pòe行踏, 有1工kap tī門嘴teh peh phok-á籽ê a-má開講, chit ê a-má無意無意講tio̍h今年ê總統選舉, i強調講當然mā ài kā票tǹg hō͘台灣人, hō͘ góa hiông-hiông tì覺, 10冬來台灣基層本土化意識ê成長, 有iáⁿ超過góa本底ê認知, lán iáu tiâu tī權位鬥爭kap議題辯論ê思考層次, 基層soah直接tī góa面頭前, 展現出自主ê性命力.
面對民間社會chiah-nī直接ê刺激, góa iáu teh思考án-chóaⁿ來調整ka-tī ê認知, iáu teh走chhōe運動接續ê步調, Pi-thâu-pòe soah無beh停khùn, 問題1項1項tàn入來góa心肝底, 逼góa去面對kap回應chiah-ê koh khah直接koh khah具體ê困境.
Beh去Pi-thâu-pòe chìn前, góan有先chhōe資料, mā chhōe teh做環保運動ê Kiàn-chì兄討論, 事先tō按算beh問焚化爐, 農會kap社區發展chit kúi ê議題. Tī Pi-thâu-pòe庄--nih, 無論是teh kā田--nih ê a姨tàu khau菜, iah是kap庄--nih ê a-sáng開講, lia̍h-tio̍h機會tō beh問, in soah lóng應講he是cha-po͘人ê tāi-chì, in m̄知, góan chit tīn慣勢都市iah是學院智識kho͘-á生活ê讀冊人, soah choaⁿ-á嘴á開開心肝ut-ut:「Nah ē án-ne?」
田岸邊ê a伯ná洗èng菜ná提醒góan:「讀冊m̄-thang讀tùi kha-chiah-phiaⁿ去!」A伯kàn-kiāu官僚kap農會, 講hiah-ê人做ê決定, hām in實際生活經驗án-chóaⁿ teh衝突,「In kám bat choh過田? Kam bat來問góan是án-chóaⁿ ài燒稻草?」是to tio̍h--m̄, 冊--nih讀--來-ê, 老師教--ê kap人民實際生活到底有siáⁿ-mih關係? Tī智識khou-á teh想--ê teh討論--ê, 到底是beh chhòng siáⁿ-mih?
田庄生活ná像chiâⁿ有氣味, 宜蘭ê Siông--哥tō hō͘ góan chit款印象, Pi-thâu-pòe soah hō͘ góan chit-lō夢pìⁿ-chiâⁿ幻想.「田khah choh mā了錢, m̄-koh koh m̄願田地放hō͘荒.」「農產價siàu kē, lóng mā販á teh控制, lín都市sông食米m̄知米價!」In bē鼓勵少年人留tiàm草地所在,「Tńg--來? 失業--ê chiah ē tńg--來-lah, 留tī庄--nih無前途, thàn che m̄-chiâⁿ錢koh無夠本--lah.」農村資源chió, 資訊無通, 生活品質無好, 菜蔬罕得好價, 有mā lóng hiah-ê販á公司teh thàn, ta料--ê koh kiōng-kiōng beh hō͘ China--ê拚--去, 像chit-má lán chia ê蒜頭to無市場--a.
Chit kúi冬teh強調「拚經濟」, 講--ê全工業商業服務業高科技, 早前hoah發展經濟, 犧牲--ê是choh-sit人kap做工á人, chit-má kám有siáⁿ無kâng? 農業是台灣ê根本chiah tio̍h, choh田若bē過日--得, m̄-tāⁿ都市失業--ê無退路, m̄-tāⁿ lán社會ê根ē ta-lian, 若到有1工lán ài靠China進口菜蔬, lán是beh án-chóaⁿ來kap人大小聲--leh?
M̄是有農會? 藍厝庄á路邊ê a伯講農會無siáⁿ lō͘用, 納農保kap借錢niâ, 農會收ê稻á價siàu比市價khah kôan, m̄-koh收ê量有限, 幫chān無大. 農會m̄是有組產銷班? Kám bē主動來規畫iah是走chhōe農村ê出路? A伯講hōaⁿ農會--ê ia̍h無teh choh-sit--a, koh叫góa mài想想hiah chē, góa soah愈sa無, 農會應當是choh-sit人ê組合, 照a伯án-ne講--來, 是án-chóaⁿ ài有農會?
Góan chit chōa koh去參觀豆ki皮工場, 木耳寮á, 米ká工場, khan-só͘工場kap豆油工場, che ài感謝Pi-thâu-pòe ê Chì-hun兄熱心安排, mā hō͘ góan對勞動生活有sió-khóa體驗. Tī豆ki皮工場, 4 pêng無壁kan-taⁿ khàm厝kòa, 溫度55度, 做2點鐘ài出來hioh喘, 若無, 百面ē昏--去, Chì-hun兄講chit-lō khang-khòe 1工工錢800 kho͘, 「Lín大學生kám有人beh做? 庄--nih人mā是做, 無, beh án-chóaⁿ? Tńg去choh田ia̍h bē thàn khah有.」
行出來豆ki皮工場, Chì-hun兄叫góan注意看田溝, 水白白黃黃, 是ùi工場流--出-來-ê, 流tùi田岸ê圳溝, 流tùi田--nih. 以早庄--nih抗議真久, 工場chiah有做廢水處理設備, m̄-koh為beh省成本, 做好罕得用, 庄--nih koh m̄敢siuⁿ反對, 驚工場bòai koh chhiàⁿ庄--nih ê人, 講--來mā真矛盾.
Góan mā發現庄--nih chiâⁿ chē田地有tah網á, tī濁水溪埔, koh kui phiàn lóng有tah, che góan iáu m̄-bat看--過, 問--落chiah知tah 1 khu田ài khai 10 kúi萬, 是chit kúi冬chiah khah有teh tah網á. Choh田thàn to m̄-chiâⁿ錢--a, nah koh beh khai hiah大筆錢tah網á? 有--ê講tah網á菜蔬ē khah súi, khah bē hō͘日頭曝害--去, 有--ê講khah bē有蟲來咬......, kám是beh擋焚化爐ê火hu? 聽講焚化爐ê火hu, 稻á, 菜蔬, 牛奶kap魚á lóng污染有tio̍h? Chhōe人問看māi, soah lóng thi-thi thu̍h-thu̍h, m̄是應「m̄知」tō是講「bē」. 抗爭?「抗爭kám有效?」Góan隨ê-á變é-káu.
麥寮hit phiàn『六輕』, chhiàⁿ--ê是外勞iah是在地人? 工場ê污染siáng teh受? 錢siáng teh thàn? 頭家是án-chóaⁿ有減稅優待? Án-ne kám合理? 工場óa海hit pêng有做港, 三通了後, in ē-tàng直接通, 船chhia--leh tō過? 工場kā濁水溪ê水食了了, 田beh食ê水beh ùi toh來? 土地kám bē ta--去? 環境kám bē改變? Tòa tī chia ê人kám bē出問題? Chhōa góan看豆油工場ê廖--ê 問題一直khian--來, 到taⁿ iáu tiâu tī心肝頭.
田庄--nih厝邊隔壁感情好, 暗頭á ta̍k-ê tī廟口大樹kha phò-tāu......「Lín teh hām眠--lah!」Chit-má ta̍k-ê無tāi-chì lóng kiu tī厝--nih看電視, êng-á-tāi mài chhap khah bē惹tāi-chì; 田庄人本底tō gâu結冤仇, 頭人為tio̍h選舉 iah是利益, koh造chiâⁿ庄--nih pun派系, hām中人mā無人beh做, ke做ke結怨,「隨人公má隨人chhāi顛倒khah有iáⁿ.」
Beh來田庄學台語? 有--lah, 庄--nih有iáⁿ台語khah ē通, 出外--ê tō無--a, in ê gín-á lóng bē-hiáu台語--a, kap都市tńg--來ê孫講話ná鴨á聽雷--leh, 留tī庄--nih ê gín-á是ē講--lah, m̄-koh mā ta̍uh-ta̍uh-á hō͘學校老師牽--去-a. Che kám kan-taⁿ是語言iah文化ê問題? Che kám是社會關係, 社會倫理kap價值體系ê轉變? Che kám是主體性teh流失? Che kám是無法tō͘阻擋ê社會潮流? Kám tio̍h擋? Tio̍h án-chóaⁿ擋?
Koh, 庄--nih外國新娘愈來愈chē, 外國新娘kap庄--nih語言bē通beh án-chóaⁿ? 外國新娘ê gín-á kap在地ê gín-á互動kám無問題? 身體kap心理ê發展kám bē有問題? 外國新娘若làu-phâu, gín-á beh án-chóaⁿ?
Chiah-ê田庄實際tú--tio̍h ê困境beh án-chóaⁿ處理? 社區營造kám有才tiāu解決? 社區營造kap在地人有siáⁿ-mih關聯? 社區營造ê「書面計劃」kap「社區參與」「社區自主」koh有siáⁿ-mih關聯? 里長kap社區發展koh是siáⁿ-mih關係? 社區營造若ài靠社區發展協會來sak, án-ne里長kap發展協會是sián-mih 關係? 若án-ne, beh里長chhòng siáⁿ?
營隊結束ê時, 學員Chùn-iân in pa-pa來載--i, soah kap góan káng--起-來, koh是kui tho͘-lá-kuh tio̍h kek頭殼ê問題. 母語運動重點是社會人iah是老師? 母語是社會問題iah是教育kap學術問題? 若無妥當ê社會環境, 靠學校1~2點鐘甚至5點鐘10點鐘母語課程kap母語師資有siáⁿ效? Che m̄是良心 iah是覺醒ê問題, 是政策ê問題, 是社會趨勢ê問題, beh改變--ê是siáⁿ? 是án-chóaⁿ beh kā母語khioh--tńg-來? Chit-má華語是主體mā是優勢, che chiah是問題, che m̄-tāⁿ是語文, 族群 iah是文化chit款單純層次ê問題, chit ê問題kap多元, 尊重hām民主mā有牽連, kám m̄是?
營隊結束--a, soah chah tńg來chiah chē問題, chit-má, chiah是開始, 開始ài來走chhōe chiah-ê問題ê答案.
留言列表