雞腿是góa chi̍t世人siōng ià-siān ê chia̍h-mi̍h, 因為i代表--ê是góa細hàn得bē tio̍h ê疼kap受傷ê疼.
Ta̍k pái過年過節, 看tio̍h a母koh teh thâi雞thâi鴨款牲禮teh拜, tō ē hō͘ góa想tio̍h khah早真chē tāi-chì. 特別是a母若開始khû tī chàu-kha teh tok雞á鴨á ê時, góa ê心情tō bē平靜.
細hàn ê時, a母lóng是kā雞腿giâ hō͘小弟(另外1支是留hō͘ a公chia̍h), 叫góa chia̍h翅股. 倔強ê góa為tio̍h 1支雞腿受盡委屈kap不服. Góa kan-taⁿ是想無是án-chóaⁿ cha-po͘--ê chiah ē-tàng chia̍h雞腿, cha-bó͘ gín-á tio̍h-ài認本份. Góa若討無雞腿, tō ē khioh恨, 不平kap kui腹tó͘ ê委屈.
小弟是a母連續生3 ê cha-bó͘ gín-á了chiah生--tio̍h ê cha-po͘--ê. Góa kap小弟差1歲外, a母生小弟了後, 所有ê關愛tō lóng tùi小弟hia去. Góa相信雖bóng是âng-eⁿ-á, i ê心靈oan-na對「被剝奪ê感受」chiâⁿ敏感, hōan若有變化, i求生存ê本能tō ē抗議kap抵抗. 想想--leh, 3歲gín-á tō ē反抗, 人被壓迫被剝削, 為生存ē反抗是真本能koh自然ê tāi-chì.
小弟生--落-來, 受傷siōng大--ê tō是góa. 小小ê年紀tō是想無是án-chóaⁿ ta̍k項ài niū kap góa年歲差1歲外ê小弟, góa tō是m̄甘願, 本能tō拚性命kap小弟搶, kap小弟cheⁿ. Góa jú cheⁿ, tō jú bē得人疼; jú無得tio̍h人ê關愛, góa tō jú愛鬧jú愛烏白hoe. M̄-koh日子久--來, góa mā無討tio̍h siáⁿ-mih好--處, 顛倒chia̍h bē-chió竹á絲. A母雖bóng是chheⁿ-mê牛, m̄-bat半字, soah mā知「棍á kap紅菜頭ê理論」. I ē開始落軟hō͘ góa khah認份--ê, tng小弟有2粒糖á, i ē苦勸小弟hō͘ góa 1粒, góa mā ta̍uh-ta̍uh-á ē配合, 知iáⁿ乖乖--a tō khah好過日. Ta̍uh-ta̍uh-á, góa ê心態變做chiok驚小弟, 驚i po̍ah倒, 驚i háu, ta̍k項自動beh niū小弟, 無beh cheⁿ無beh吵tō是beh hō͘ a母歡喜. Góa總算知iáⁿ小弟是a母ê心肝寶貝, góa是生來保護i ê寶貝.認命koh認份, 講話行動lóng看人面色, 因為góa是「cha-bó͘ gín-á-phí」. Tng góa cheⁿ bē贏ê時, tō開始展現góa ê奴才性格, ùi反抗到完全配合, 對góa來講, che tō是生存ê道理.
Chit-má ê gín-á一定想lóng無為tio̍h 1支雞腿, 有siáⁿ-mih thang好cheⁿ thang好受傷--ê, m̄-koh góa soah chiok清楚i tī góa性命中, 留落長長暗暗ê影jiah.
留言列表