有1 ê朋友, góan lóng叫i『小江』iah是江--ê.
Hām i是1996年tī電台熟sāi, i總--是tiām-tiām坐tī邊--a, tiām-tiām聽人討論, 無siáⁿ ē開chhùi, i teh chia̍h siáⁿ頭路, 生活án-chóaⁿ, lóng無siáⁿ beh講, góa mā到taⁿ lóng無kài清楚, kan-taⁿ知iáⁿ i身體有koh-iūⁿ, tòa tī新店, 頭路無kài穩定.
Lō͘尾góa koh tòa過kúi-nā ê無kâng ê團體, i不時ē來sio-chhōe, 若辦活動kā招, i mā lóng ē來, kāng款tiām-tiām tī邊--á, tiām-tiām tàu-saⁿ-kāng. 雖bóng運動ê事工tiāⁿ-tiāⁿ bú kah真thiám, m̄-koh若看tio̍h i ê形影出現, sûi tō感受tio̍h i誠懇koh堅定teh支持, ka-tī tō koh ke-thiⁿ真大ê khùi力.
Góan tī電台熟sāi ê 1 tīn朋友, 離開了後固定ta̍k冬年初ē sio招聚會1 pái. 舊年年初聚會, 是siōng尾1 pái kap i見面, koh來雖bóng bat講過kúi-nā pái電話, m̄-koh 4~5月á了後tō無koh聯絡, 到今年beh koh招聚會teh聯絡, chiah知i 5--月tō過身--a, 無聲無說tō chò i離開.
運動keng ē起--來, siōng重要tō是像江--ê chit款, tiām-tiām teh做, tiām-tiām teh thīn, koh tiām-tiām-á做工, 用行動來表示i teh sio-thīn, 無愛出聲, mā無beh sio-cheⁿ利益, 地位, 名聲iah頭銜, 甚至ē-sái講kap hiah-ê chèⁿ beh出頭--ê, kap hiah-ê gâu出chhùi--ê sio比phēng, 江--ê算是無名無姓. In tī運動--nih siōng無hông重視--ê, m̄-koh若無in, siáⁿ-mih運動to bú bē起--來.
江--ê號做江維宗, lō͘尾改名做江承霖.
有chit-ê朋友, góa真驕傲.
留言列表