Chēng相思á裝點kui-châng粉圓á黃ê花蕊, 鹿á樹mā接續吐出1粒1粒紅kì-kì koh tiⁿ-but-but ê球形花果, 經過苦楝á kui-phiàn茄á色ê花蕊kap黃黃ê樹籽掛tī樹á頂, 一直到看tio̍h苦楝舅用黃ê花蕊hām紅ê kó͘-á燈苞hō͘ phú色ê城市加添色緻, 顧組長, 柯組長, 呂組長主持ê「愛台灣指數特別工作小組」taⁿ mā籌備半冬--a.
拜1 e-tàu 3點, 秘書處召開工作會議.
「Lán “愛台灣指數” ê籌備khang-khòe進行kah差不多--a, chit段時間ta̍k-ê辛苦--a, 先kā lán ka-tī phah-pho̍k-á好--無?」主持會議ê陳秘書長講.
「好!」Ta̍k-ê hoah聲. 1 chūn pho̍k-á聲了, 陳秘書長續leh講,「Tī ta̍k-ê報告工作進度chìn前, lán先請董事長講話, 董事長今á日特別留--落-來, lán pho̍k-á聲kā歡迎!」
「Ta̍k-ê辛苦--a, 為tio̍h獎勵ta̍k-ê為tio̍h台灣chiah-nī phah-piàⁿ, góa chit-má宣佈今年ê年終獎金ta̍k ê人lóng 3月日. Lín講án-ne好iah m̄好?」
「好!」Koh是1 chūn pho̍k-á聲.
「Chit-má台灣是行證照制度, “愛台灣”當然mā tio̍h經過認證chiah ē-ēng--chit, 若無, chhìn-chhái人hoah 1句“愛台灣”, 私底下soah lām-sám做, 對台灣ê傷害顛倒大. 柯組長當初時ē想tio̍h chit步實在真khiáu, 頭殼tńg kah有夠緊! Lán phah-pho̍k-á kā o-ló--1-ē.」
柯組長hō͘蕭董--ê po 1 ē心花開, khiā起來接受pho̍k-á聲.
「陳秘書長mā真辛苦, chhōa頭teh chông. Koh有顧組長kap呂組長, in kap柯組長為tio̍h chit-ê認證khang-khòe, kui半冬來走chia chông hia, koh ta̍k工加班, lán koh 1 pái kā in mā kā ka-tī phah-pho̍k-á, 好--無?」
Ta̍k-ê chhùi-á lī-sai-sai, pho̍k-á聲直直chhui.
「Lán基金會是全台灣siōng有公信力ê組織, lán sak chit-ê “愛台灣指數”, 無論toh 1黨toh 1派, ta̍k-ê lóng真肯定koh重視, 希望工作同仁好好á表現. 續--落-來ê時間交hō͘陳秘書長主持, ta̍k-ê繼續phah-piàⁿ, 台灣出頭天!」
「出頭天!」Ta̍k-ê齊聲呼hoah, khiā起來送董事長離開會議室.
「若無lán tō先請顧組長報告“愛台灣指數” ê工作進度.」
「Ta̍k-ê手頭lóng有企劃書kap考試題庫, chit份題庫是經過歷史學者kap chē-chē台灣相關研究ê專家學者共同制訂--ê. 為tio̍h考試題目bē漏洩出--去, 考試前1工lán ē召開記者會, lán ê理事莊律師ē koh chhōe kúi-ê律師朋友tàu-tīn來見證, ùi題庫lóng總1萬ê題目內底, 抽100條出--來. 228 hit工邀請總統候選人kap其他社會團體頭人來考試, 電視台ē全程轉播. 當然lán mā歡迎民間人士chiūⁿ網考試, chit部份sió等--leh請網路組洪組長報告. 70分算入格. 3月初1公佈考試結果, 當然mā ē召開記者會, 有律師見證. 3月15舉辦頒獎典禮. Chit-má總統候選人lóng答應beh參加--a, 社團ê部份chiah請柯組長報告.」
「政治性ê社團lóng聯絡好--a, 228 hit工頭人lóng ē參加認證. In mā有tàu宣傳, o͘-ián群眾tī 228 hit工chiūⁿ網考試. 非政治性ê社團, 目前iáu無確定ē參加--無, 月底in ē回消息.」
「Góa補充報告民間認證ê部份.」組織組張組長接續報告. 「Lán lóng知影“教育”是建國chiok重要ê部份, 特別是台灣ê教育界過去是黨國體制栽培--出-來ê特權階層, chi̍t-sut-á台灣意識to無, ka-chài chit kúi冬來ta̍uh-ta̍uh-á teh改善. 為tio̍h台灣ê kiáⁿ孫, 教育界參加lán ê認證是chiok要緊ê tāi-chì. 經過半冬ê聯絡拜訪, taⁿ全台灣有1半ê中小學校長答應beh叫學校ê老師參加, 228 hit工lán ē tī各縣市舉辦老師ê認證考試. Hit工了後, beh得tio̍h認證ê老師iah是民間人士, tio̍h-ài參加lán ê “愛台灣教育班”, 修36 ê學分了後chiah the̍h ē tio̍h證書.」
「研習時數kám申請好--a? 蕭董--ê有去拜訪過教育部長, 228考試hit工教育部mā是合辦單位, hit-chūn有講好參加考試mā有36點鐘ê研習時數.」陳秘書長問.
行政組紀組長趕緊報告,「有--lah, 申請好--a, 教育部ê人有講lán直接發函hō͘學校tō ē-sái, 公文2禮拜前lóng發--出-去-a. 228 hit工參加考試--ê, iah是事後參加lán ê教育班--ê lóng ē-sái有36點鐘ê研習時數.」
「教授界ê部份, 理事林教授mā tī教授界o͘-ián--過-a, 特別是教授協會ē全體參加. 高醫師mā有o͘-ián醫界參加. 另外,」呂組長補充說明,「“愛台灣教育班” ê師資kap課程mā安排好--a, 今á日開始連續2月日lán tī各大報lóng有半版ê廣告, 邀請全體台灣人參加lán ê認證.」
「網路組ê部份, chit-má koh teh加強安全性, mā tio̍h預防hacker, àn-sǹg koh 1月日tō ē-sái完成kui-ê khang-khòe.」網路組洪組長報告狀況.
* * *
愛台灣基金會秘書處無閒chhih-chhah, taⁿ刺桐開花--a, 大日子mā到--a.
2月27, 有莊律師kap其他4 ê律師ê見證, 蕭董--ê ùi題庫內底抽100條出來, chiah-ê題目sûi koh用箱á封tiâu--leh, 一直到bîn-á-chài 9點tháu開封條, 趕印100份ê考試紙, 赴10點總統候選人kap社團頭人考試beh用. 11點開放網路考試.
2月28, iáu-bōe 8點, 電視台ê SNG車lóng chiâu到--a. 愛台灣基金會工作人員mā早tō tī現場佈置, kui-ê台大體育館lāu-jia̍t滾滾.
「Oah, 有影ta̍k台lóng來--a neh.」李秘書kap黃秘書雙手teh無閒, chhùi mā無停khùn, ná做ná khai-káng.
「He是lán kā in買時段neh, 1點鐘10萬, che koh是有算lán khah sio̍k neh.」黃秘書細聲kā李秘書講.
「Hâⁿ...... án-ne m̄-tō ài khai chiok chē chîⁿ? Oah, 買新聞台時段koh報紙廣告, kan-taⁿ chiah-ê tō ài khai jōa chē--a......」李秘書ná講ná áu chéng頭á teh算.
「M̄-koh khai chē, 入--來ê chîⁿ mā chē, 若無lán nah有thang領tio̍h 3月日ê年終.」黃秘書聽tio̍h in teh khai-káng, mā chhu óa--來.「Lín kan-taⁿ看chit kúi月日lán koh ke chhiàⁿ 5 ê秘書kap 2 ê會計tō知--a, 辦chit場認證, ē-sái講是選總統ê預算neh. Lán ê認證絕對是有『錢途』--ê.」
時間ná來ná óa, 9點chi̍t到, 陳秘書長gia̍h mài-khuh出現tī台á頂.
「Ta̍k-ê gâu早, 9點--a, liam-mi tō beh tháu封條--a, 替lán見證ê律師mā坐tī台á頂--a, lán先請愛台灣基金會董事長kā lán講kúi句á話.」
「各位鄉親sī大, 記者先生小姐, 台灣出頭天!」
「出頭天!」台á-kha tòe leh hoah.
「“愛台灣指數” ê認證khang-khòe teh-beh開始--a, 真感謝ta̍k-ê支持. Lán今á日ê認證題目是cha-hng ùi 1萬條ê題庫內底抽100條出--來, chiah-ê是請專家學者訂--ê, 有台灣歷史, 地理, 文學, 音樂, 藝術, 電影, 軍事, 外交, 經濟, 教育10方面, 比例lóng kāng款, ta̍k類lóng 1千ê題目, lóng是選擇題, cha-hng抽tio̍h siáⁿ-mih款ê題目, 等--leh lán tō知. 好, sió等--leh工作人員ài koh趕印考試紙, góa tō無koh ke講, lán chit-má來tháu封條.」
Kui-ê基金會秘書處pun做2批, 1批tī現場, 1批tī辦公室, 雙pêng互相配合, 現場ê工作人員趕tī 10點chìn前印考試紙, 辦公室hit-pêng ài赴tī 11點kā網路設定hō͘好勢.
過9點半, 總統候選人kap社團頭人sûi-ê-á chiâu到--a. Beh入來試場chìn前, 記者問2 ê候選人àn-sǹg ka-tī ē考kúi分.
「85分.」K án-ne講.
「Góa想90分應該無問題.」D án-ne講.
10點, 蕭董--ê mài-khuh gia̍h--leh, khiā tī台á頂:「Lán考試ê時間是10點到12點, 等--leh聽tio̍h鑼á聲了後, tō ē-sái kā桌頂ê考試紙hian--開, 請ta̍k-ê把握時間. Góa chit-má宣佈, “愛台灣指數”認證考試開始!」講soah, 蕭董--ê khà 1聲鑼, ta̍k-ê sûi注神tī考試紙.
時間1分1秒過--去, 台大體育館外口pan-chi mā lak kah kui thô͘-kha.
Ta̍k-ê對chit-pái認證不止á téng-chin, 一直到12點蕭董--ê khà鑼chiah交考試紙.
「Lán chit-kài有總統候選人參加認證, 為tio̍h公平, in 2人ê考試紙chit-má用牛皮紙lông té--leh, kā封條貼--起-lih, khǹg tī góa邊--á chit-kha保險箱, 有4 ê保全ē tī chia顧, koh有10台機á teh錄影監視, bîn-á-chài chái-khí 10點, lán tī chit-ê所在公佈結果. 在場ê人, 包括律師kap媒體記者, lóng ē-sái做證. Bîn-á-chài mā請ta̍k-ê來做見證人.」蕭董--ê講soah, 工作人員kā總統候選人ê考試紙鎖tī保險箱內底.
隔tńg工iáu-bōe 9點, 電視台ê SNG車chiâu到, 愛台灣基金會工作人員mā tī現場teh無閒,「見證人」1批1批一直入--來.
Jú óa 10點, 體育館人jú chē, ta̍k-ê lóng teh ioh 2 ê候選人toh 1 ê分數khah kôan.
「免講mā是D khah愛台灣, 分數一定比K khah kôan. In hit黨--ê nah有愛台灣? Kan-tann siàu想beh賣台灣!」Chē-chē人án-ne講.
「時間差不多--a, lán是m̄是先請律師kā錄影帶調出來檢查.」蕭董chi̍t開chhùi, 現場sûi tiām--落-來.
5 ê律師檢查監視錄影帶, lóng總有10支帶á, 檢查了後確定無問題. 續--落-來tō是開保險箱改考試紙--a.
Kui-ê體育館tiām-chih-chih.
Hit 2張考試紙用電腦走--過了後, koh經過2 ê教授校對--過, 確定無問題了, kā分數交hō͘蕭董--ê.
「Góa想, ta̍k-ê lóng chiok期待緊看tio̍h結果, 包括2 ê候選人mā是, góa chit-má tō來公佈分數.」
蕭董--ê kā té分數ê phoe-lông tháu--開......「Che......」I sió tùn--1-ē.
「K--先-生ê分數是91分!」
台á-kha ê pho̍k-á聲kiōng-beh kā厝頂kòa hian--開, 是講mā lio̍h-á聽ē tio̍h chi̍t-kóa hngh-hngh聲.
「D--先-生ê分數是......」蕭董--ê看tùi台á-kha ê D.
「89分!」
「Hâⁿ......?」台á-kha ê群眾hiông-hiông m̄知beh án-chóaⁿ反應.
蕭董--ê緊接話講,「2 ê候選人ê分數lóng不止á kôan, kan-taⁿ增差2分niâ, góa cha-hng tńg--去ka-tī考, 結果chiah考tio̍h 80分niâ. Ta̍k-ê kā in phah-pho̍k-á鼓勵--1-ē, 好--無?」
台á-kha ê pho̍k-á聲pun做2 pêng, 1 pêng人雙手phah kah紅kòng-kòng, 歡喜kah lia̍h-bē-tiâu, 另外1 pêng ê pho̍k-á聲soah li-li-lak-lak.
「Lán先請D--先-生kā lán講kúi句á話.」
D ta̍uh-ta̍uh-á行chiūⁿ台,「89分, chit-ê分數kap góa ka-tī àn-sǹg--ê增差1分. 各位鄉親sī大, 免替góa感覺失望, góa chiâⁿ歡喜得tio̍h chit-ê分數, góa chiâⁿ歡喜是89分, m̄是90分, mā m̄是91分. 差1分表示lán人m̄是完美--ê, mā m̄是siáⁿ-mih lóng bat, lán tio̍h-ài一直保持學習求進步ê心. Che 1分表示台灣ê súi góa bat iáu-bōe透, 表示koh有chiok chē台灣寶貴ê價值kap美好ê人事物thèng-hāu góa去發現. 感謝“愛台灣基金會”舉辦chiah-nī有意義ê活動, mā感謝ta̍k-ê支持.」
「實在無簡單, 得tio̍h chiah-nī kôan ê分數koh chiah-nī固謙, 鄉親ah, lán koh 1 pái pho̍k-á聲大力kā鼓勵, 好--無?」蕭董--ê講話súi-khùi, 台á-kha ê pho̍k-á聲1 chūn接1 chūn.
「續--落-來lán請K--先-生發表i ê感想.」
「多謝ta̍k-ê!」K用無kài liàn-tńg ê台語講,「Góa想, 今á日chit-ê分數代表愛台灣是無分黨派--ê, lán lóng tòa tī台灣chit-tè土地頂kôan, lán ta̍k-ê lóng chiok愛台灣! 另外hit-kóa無抽--tio̍h ê題目, 希望“愛台灣基金會” ē-sái出版, hō͘ ta̍k-ê koh-khah了解台灣. 多謝ta̍k-ê!」
「感謝K--先-生ê建議, 本基金會ē tī月中出版chiah-ê題目, 提供hō͘ ta̍k-ê參考. Ta̍k-ê若beh知影ka-tī ê分數, 請chiūⁿ網iah是khà電話來基金會問, góan有專人服務. 另外, 基金會有chhôan豐富ê獎品beh hō͘ cha-hng來參加認證有合格ê朋友, 3月15 e-po͘ 4點tī圓山á飯店有頒獎典禮, 請ta̍k-ê poah工參加. Koh 1 pái感謝ta̍k-ê來參加認證, 台灣出頭天!」
Hit暗ê新聞評論節目, ta̍k台lóng teh分析2 ê候選人ê分數, 有kúi台ê講法是: 抽--tio̍h ê 100條題目內底, 文學, 音樂, 藝術kap電影類--ê佔60%, K ê幕僚chit方面ê人才ke chiok chē, chiah ē贏D 2分. 除去che, ta̍k-ê mā chiâⁿ hò͘ⁿ-hiân kám有人考100分?
隔tńg工報紙頭條是:『兩人最愛台灣! 一人是中國台灣研究室人員, 一人為工人!』
留言列表
