Chit 1工, 台北落雨天, koh濕koh冷. M̄-koh iáu是有chiok chē父母chhōa gín-á行街頭, 有ê家庭全家出動, mā有ma-ma ka-tī嚴重感冒koh chhōa 3 ê gín-á來參加, 有ê ma-ma ná行ná飼gín-á suh奶, 有ê kā幼eⁿ-á āiⁿ--leh抱--leh, koh有chiok chē chiok chē細hàn gín-á坐sak車á, iah是騎腳踏車, pushbike, 甚至用步lián--ê行全程, 宣示廢核ê主張, ǹg望ē-tàng tī無核電威脅ê環境--nih平安健康大hàn.
做人父母對gín-á siōng基本ê ǹg望tō是ē-tàng平安健康大hàn, m̄-koh chit ê ǹg望soah不時受tio̍h威脅, 其中siōng大ê威脅tō是台灣有4座核電廠. 台電為tio̍h減少核廢料ê量, tī核電廠燒核廢料, tòe leh飛去空氣中ê輻射, hō͘台灣空氣中ê輻射量phēng有核災ê日本koh-khah koân. Khǹg tī核電廠內底ê核廢料bē-su無定時炸彈, chiah-ê核廢料beh án-chóaⁿ處理, 到taⁿ iáu無châi-tiāu解決. 台灣若發生核災, 人民beh án-chóaⁿ避難, 政府ē án-chóaⁿ應變, ē-sái講完全bē ǹg望--chit. 台鐵1 pái事故tō無châi-tiāu疏開旅客--a, koh-khah免講若台北發生核災, beh án-chóaⁿ疏開人民去中南部避難?時到tō是無政府狀態--a.
1項mi̍h-kiāⁿ koh-khah便利, i ê影響kap威脅若是無châi-tiāu解決, koh-khah好用mā是無kha-choa̍h, koh再講台灣有chiok好ê條件thang發展綠色能源, 核電m̄是無thang替代.
核電ê bái--處, 替代方案, chiah-ê環保團體kap學者專家, 有研究ê人lóng講chiok chē--a, 是án-chóaⁿ政府iáu是無chùn無būn, 堅持核能發展ê政策? Che後piah牽涉ê利益siuⁿ過頭大, 大kah做官--ê ē-sái am-khàm資訊, 講pe̍h-chha̍t, kā台灣人ê性命安全裝siáu--ê. Kap chit款政府有影m̄是講道理, ē-tit-thang照phín照行--ê, lán tio̍h聚集koh-khah大ê社會力量, chiah有thang改變現狀.
核電廠若爆炸, 空氣, 水, 土地, 植物, 動物, lán ê chia̍h-mi̍h, 全面性lóng ē受tio̍h輻射污染, lán ē破病, bē-tàng koh自由自在tī外口sńg, 甚至ài離開khiā起ê所在, kap朋友分開, 對大人gín-á來講, 是siōng大ê威脅kap驚惶. 大人kā gín-á講chiah-ê, chhōa in行街頭反核, m̄是beh製造gín-á ê驚惶, 輻射看bē tio̍h mā phīⁿ無, m̄-koh chiah-ê威脅kap驚惶是確實存在--ê, mā是做人父母chiok大ê不安, hō͘ góa m̄知beh án-chóaⁿ面對i, kā i講是án-chóaⁿ lán ē-tàng容允起核電廠, 無kā擋--落-來.
風雨中, chhōa gín-á行街頭反核, 是goán對gín-á負責, 對in交代, mā是gín-á beh保護ka-tī成長ê土地ê心意.
Beh án-chóaⁿ kap gín-á講核電? 新竹ê光合人文教育工作室舊年有寫過kúi-nā篇相關ê文章, hō͘ ta̍k-ê參考.
〈多麼方便啊！〉
〈帶孩子去遊行〉
故事冊:
《當風吹來的時候》, Raymond Briggs, 英文漢聲, 2001
《我沒有哭》, 陶樂蒂, 玉山社, 2013
《好東西》, 黃郁欽, 小魯文化, 2013
《綠色能源島》, Allan Drummond, 天下雜誌, 2013
《看不見的炸彈》, Takahashi Yoshiko, 玉山社, 2014
《總有一天想回去，我的故鄉》, Atsuko Otsuka, 天下雜誌, 2014
這一天，台北落雨天，又濕又冷。然而還是有很多父母帶著孩子上街頭，有的家庭全員出動，也有媽媽自己重感冒還帶三個孩子來參加，有的媽媽邊走邊哺乳，有的將幼兒背著抱著，更有許許多多的小孩坐娃娃車、或是騎腳踏車、pushbike，甚至用走的走完全程，宣示廢核的主張，期望可以在無核電威脅的環境下平安健康長大。
做人父母對孩子最基本的期望就是得以平安健康長大，然而這個願望卻不時受到威脅，其中最大的威脅莫過於台灣有4座核電廠。台電為了減少核廢料量，在核電廠內燃燒核廢料，隨著飄散到空氣中的輻射塵，使得台灣空氣中的輻射量比起有核災的日本還要高。暫放在核電廠內的核廢料就像是不定時炸彈，這些核廢料要如何處理，至今還無法解決。台灣若發生核災，人民要如何避難，政府會如何應變，可以說完全令人失望。台鐵一次事故就無法疏散旅客了，更何況若台北發生核災，要如何疏散人民到中南部避難？到時候就成無政府狀態了。
一樣東西再怎麼便利，它的影響和威脅若無法解決，再好用也是枉然，更何況台灣有很好的條件可以發展綠色能源，核電不是不能替代。
核電的壞處、替代方案，這些環保團體和學者專家、有研究的人都講很多了，為何政府還是無動於衷，堅持核能發展的政策？這背後牽涉的利益太過龐大，大到做官的可以隱匿資訊，公然說謊，無視台灣人的生命安全。和這種政府真不是講道理，可受約束的，我們必須聚集更大的社會力量，才得以改變現狀。
核電廠若爆炸，空氣、水、土地、植物、動物、我們的食物，全面性都會受到輻射污染，我們會生病，無法自由自在在外頭玩耍，甚至得離開家園，和朋友分開，對大人小孩來講，是最大的威脅和驚惶。大人和小孩講這些，帶他們上街頭反核，不是要製造孩子的恐懼，輻射看不見也聞不到，可是這些威脅和恐懼是確實存在的，也是為人父母最大的不安，令我不知該怎麼面對孩子，跟他說為什麼我們能容許蓋核電廠，沒有將它擋下來。
風雨中，帶著孩子上街頭反核，是我們對孩子負責，對他們交代，也是孩子要保護自己生長的土地的心意。
該怎麼和孩子談核電？新竹的光合人文教育工作室去年有寫過幾篇相關文章，供大家參考。
〈多麼方便啊！〉
〈帶孩子去遊行〉
繪本:
《當風吹來的時候》, Raymond Briggs, 英文漢聲, 2001
《我沒有哭》, 陶樂蒂, 玉山社, 2013
《好東西》, 黃郁欽, 小魯文化, 2013
《綠色能源島》, Allan Drummond, 天下雜誌, 2013
《看不見的炸彈》, Takahashi Yoshiko, 玉山社, 2014
《總有一天想回去，我的故鄉》, Atsuko Otsuka, 天下雜誌, 2014
──《TGB通訊》第174期(2014/3)
留言列表
