今á日chái-khí上班, 經過ta̍k工ài行--過ê幼稚園門口, hn̄g-hn̄g tō聽tio̍h gín-á大聲哀叫ê哭聲, 1 ê趕beh上班ê爸爸, 頭mā無oa̍t tō ùi幼稚園緊行--出-來, chit-chūn hông留tī幼稚園內底ê gín-á, 看tio̍h爸爸走--去ê身影, i ê哭聲jú hiông jú大聲. 親目chiu看tio̍h chit 1幕, hiông-hiông想tio̍h ka-tī éng-kòe mā bat án-ne, 原來tī台灣, 大人一直用粗魯koh暴力ê方式teh傷害gín-á ê心靈.
Cha-bó͘-kiáⁿ ê暗影
Cha-bó͘-kiáⁿ 4歲ê時, 無koh hō͘奶母chhōa, 換試讀khiā-ke附近ê幼稚園, 過團體生活. Tō ná像大多數ê gín-á, tī無se̍k-sāi ê環境, 面對chheⁿ-hūn ê人, 接觸經驗外ê tāi-chì, 會不止á無適應, cha-bó͘-kiáⁿ ta̍k工beh去學校chìn前tō一直chiok不安, thèng-hāu到學校門口i tō開始哭, 需要一直安tah, 甚至tio̍h kap i chò-hóe入去教室陪--i, i chiah願意入--去.
Tō án-ne陪i讀kúi工了後, ē記得ká-ná第5工ê時, hoān-sè幼稚園認為góa ta̍k工tī教室陪cha-bó͘-kiáⁿ, 顛倒hō͘ cha-bó͘-kiáⁿ無法度khah緊適應學校, hit 1工園長竟然tī大門口無tiuⁿ-tî tō ùi góa chia kā cha-bó͘-kiáⁿ hiông-hiông抱--去, 無chhap cha-bó͘-kiáⁿ驚人ê哭聲, 園長kā想beh liòng--開ê cha-bó͘-kiáⁿ ngē抱tiâu--leh, ná走ná oa̍t頭kā góa講無問題, i來處理, koh叫góa趕緊離開, 了後i緊跑入去教室. Góa m̄知beh án-chóaⁿ反應, tī幼稚園門口khiā chi̍t-ē-á, chiah ta̍uh-ta̍uh-á駛車離開, 心內chiâⁿ不安.
Boeh暗á去接cha-bó͘-kiáⁿ ê時, 園長kā góa講:「Chái-khí抱--入-去了後, cha-bó͘-kiáⁿ ná哭koh ná chhoah ka-tī ê頭毛, 個性chiâⁿ ngē!」Góa完全m̄知影1 ê 4歲ê gín-á, 竟然ē用chiah-nī失控koh暴烈ê方式來傷害ka-tī, chiah有thang表達i ê憤怒! Chit ê tāi-chì góa一直khǹg tī心內, 驚對gín-á產生暗影. 10冬後, 有1 pái kap cha-bó͘-kiáⁿ khai-káng ê時講tio̍h chit項tāi-chì, i講hit工chái-khí tī幼稚園發生ê tāi-chì i記kah chiok清楚, mā ē記得ka-tī有出力chhoah頭毛, i講he是i siōng傷心ê tāi-chì之一. 天ah! 因為大人ê粗魯對待, soah造chiâⁿ gín-á久長ê暗影!
今á日chái-khí, koh 1 pái看tio̍h kāng款ê畫面, 心內iáu是chiâⁿ艱苦. 對大人來講, kan-taⁿ是短短kúi點鐘ê分離, m̄-koh gín-á感受--tio̍h-ê, soah是hông pàng-sak ê驚惶kap不安.
小弟去幼稚園
Góa ê大hàn小弟去讀幼稚園是35冬前ê tāi-chì--a. I讀國校chìn前, mā bat讀過1冬ê幼稚園, 因為是厝內ê大kiáⁿ, sī大人專工kā i送去隔壁庄新開ê幼稚園. Hit-tang-chūn, 庄腳gín-á lóng chiok欣羡ē-sái讀幼稚園ê gín-á, 因為ta̍k工有好chia̍h ê點心kap中tàu-tǹg thang chia̍h, m̄-koh小弟chēng細hàn tō無受sok-pa̍k自由koàn-sì, chiok無愛坐tī教室內底hông限制行動, ta̍k工lóng無想beh去幼稚園.
有1工, i總算偷走o̍h成功, ka-tī走出幼稚園, 1 ê人走tńg厝, m̄-koh pháiⁿ運tī半路經過厝邊tau ê時, hō͘ goán老父ê朋友發現i phāiⁿ冊包á偷走o̍h, chit-chūn chit ê厝邊soah熱心過頭beh替goán老父教kiáⁿ, 直接the̍h soh-á kā goán小弟pa̍k tī in tau門口路邊ê電火柱, pa̍k tī hia hō͘人看, hō͘ goán小弟永遠m̄敢koh偷走o̍h, chit條新聞koh tī庄頭hông當做笑詼tāi teh傳.
小弟偷走o̍h事件, 無意中góa pìⁿ受益者──陪讀. A-pa a母hō͘ góa陪小弟去學校讀冊, 一直到i完全適應幼稚園ê生活.
一直無問過小弟, i hông pa̍k tī電火柱ê tāi-chì kám有對i後--來ê人生產生siáⁿ-mih款ê暗影? Góa想無--ê是, 無論是30 kúi冬前ê小弟, 10 kúi冬前ê cha-bó͘-kiáⁿ, iah是今á日經過ê幼稚園, ùi khah早到chit-má, 幼稚園門口iû-goân有gín-á kap父母bē-su beh永遠辭別ê tāi-chì發生, 是án-chóaⁿ大人bē耐心安tah gín-á ê情緒, 同理gín-á tī新環境ê不安kap驚惶ê感受?
Gín-á無m̄-tio̍h, m̄-tio̍h--ê永遠是自私ê大人.
今早上班，走過每天要經過的幼兒園門口，遠遠就聽見小孩尖聲地哀叫，只見一個趕著上班的爸爸，頭也不回地快步走出門口，這時已被制伏在幼兒園內的孩子，望著爸爸離去的背影，她的哭聲更加淒厲了。親身看到這一幕，不禁勾起自己也經歷過相同的往事，原來在台灣，大人一直用粗暴的方式在傷害孩子的身心靈。
女兒的陰影
女兒4歲時，沒再給保母帶，嚐試讓她上住家附近的幼稚園，過團體生活。就像絕大多數的孩子面對陌生環境的人事物會非常的不適應，每天上學前她就一直很不安，等到達學校門口她就開始哭鬧，需要不斷的安撫，甚至得跟她一起進教室陪讀，她才願意進去。
就這樣伴讀幾天後，依稀記得第5天時，或許園方認為我每天進教室陪女兒，反而讓女兒無法迅速適應學校，那天園長竟然在大門口無預警地直接從我懷裡把女兒強行抱走，不顧女兒聲嘶力竭的哭號，園長抱著亟欲掙脫的女兒，邊跑邊回頭跟我說沒問題，她來處理，還催促我趕快離開，然後快速跑進教室。我有點不知所措，在幼稚園門口呆立了好一會兒，最後才在不安中緩緩發動車子離去。
然而待我傍晚去接女兒時，園長跟我說：「早上抱她進來後，女兒哭鬧中還猛扯自己的頭髮，個性還真剛烈！」我完全不知道一個4歲的孩子，竟然會用這麼失控和暴烈的方式來傷害自己，才能表達她的憤怒！這件事我一直放在心裡，生怕對孩子留下陰影。然而10年後，偶然間跟女兒聊天，她說她清清楚楚記得那天在幼稚園早上發生的事，還有她用力拉自己頭髮的事，她說那是她最傷心的事之一。天啊！因為大人的粗魯對待，卻讓孩子留下長久的陰影！
今天早上，再目睹同樣的場景，心裡還是揪緊了一下。對大人來說，只不過是幾小時短暫的別離，但對孩子的感受，那是種被遺棄時極度的恐懼和不安。
弟弟上幼稚園
我大弟上幼稚園是35年前的事了。他上小學前，也上過一年的幼稚園，因為是家中的長子，父母特地將他送去隔壁村子新開辦的幼稚園就學。當時，每個鄉下小孩都好羨慕可以上幼稚園的小孩，因為每天有好吃的點心和午餐可吃，然而無拘無束自由習慣的大弟，卻對呆坐在教室內被限制行動，非常的抗拒，每天都不想去上幼稚園。
有天，他終於逃學成功，獨自跑出幼稚園，一個人逃回家，然而運氣不好在半路經過鄰居家時，被爸爸的朋友發現他背著書包逃學，這時這位鄰居竟然熱心過頭要幫我爸管教起我弟，直接拿繩子把我弟綁在他家門口馬路上的電線桿上，綁手示眾，讓我弟永遠不敢再逃學，而且這則新聞還在村子當成趣事廣為流傳。
弟弟的逃學事件，無意中我成了受益者──陪讀。爸媽讓我陪弟弟上學，直到他完全適應幼稚園的生活才停止。
一直沒問大弟，這個綁電線桿事件有沒有對他日後人生產生任何陰影？我只是納悶，無論30幾年前的弟弟、10幾年前的女兒，還是今天經過的幼兒園，從過去到現在，幼稚園門口還是不斷上演孩子與父母如生死離別般的場面，為什麼大人從不會耐心安撫孩子的情緒，以及同理孩子在新環境裡的不安與恐懼？
孩子沒錯，錯的永遠是自私的大人。
──《TGB通訊》第173期(2014/2)
留言列表
