台灣組合

Ē記得讀大學ê時有1 pái台語生活營, 台文作家陳明仁講tio̍h: ta̍k ê人to有名有姓, 植物mā kāng款, 樹á, 花, 草á oan-na有ka-tī ê名, ta̍k-ê kioh是樹á tō號做樹á, 草á tō叫做草á, m̄-koh lán見面互相ai-sat-chuh ê時bē講「hái, 人, lí好」.

Chit段話hō͘ góa chiok chē反省kap思考, tō án-ne, góa kap kúi ê朋友開始進行植物台灣名ê計畫. Ta̍k-ê ùi m̄ bat半項, 到chhōe資料, hip相, 對圖鑑, 問人, khai 2冬半ê時間收集整理出chi̍t-kóa成果(http://taioan-chouhap.myweb.hinet.net/y0_sitbut.htm). Hit-tang-chūn數位相機iáu無普遍, goán用傳統相機, kan-taⁿ買oān-pán, 洗相片ê chîⁿ tō m̄知khai jōa chē--去, m̄-koh soah chiok甘願koh價值, 因為goán kap植物開始有互動, in對goán來講已經m̄是chheⁿ-hūn無se̍k-sāi ê樹á草á.

Asiâng出世了後, ta̍k pái kap i出門散步, góa總--是ē chhōa i se̍k-sāi沿路ê樹á草á, kā thô͘-kha ê葉á khioh起來看看--leh, phīⁿ看無kāng季節開ê花, tam看樹籽iah花蜜ê滋味, bán花iah草á sńg goán做gín-á時sńg--ê, chhōe看hioh tī樹á頂ê鳥隻kap i ai-sat-chuh, kā lak tī thô͘-kha ê樹籽tàn tī thô͘--nih期待i有機會koh puh 1欉樹íⁿ--出-來......

Tng lán期待gín-á ē-tàng關心參與公共議題, lán tio̍h-ài ùi hō͘ i對生活kho͘-á有感受有互動開始. Khiā-ke附近ê小路á, 菜園, 河岸步道, 淡水古蹟園區, 海邊á, 觀音山......, tī iáu-bōe參加共學chìn前, goán ê活動範圍lóng tī淡水, siōng hn̄g到Kan-tāu, 八里, goán ǹg望gín-á ùi se̍k-sāi ka-tī生長ê所在開始, 1步1步ta̍uh-ta̍uh-á ǹg外口拓展i ê眼界. Goán ǹg望用siōng省chîⁿ soah siōng富裕ê方式chhōa gín-á體驗性命, tng gín-á kap土地有實實在在ê感情, lán kám tio̍h koh煩惱後pái i ē無要無意tō chhoh樹á, thiah歷史建築, 山林海邊圈地BOT, pun bē清楚ka-tī是toh 1國人?

是án-ne ê思考, góa m̄-chiah bē去干涉gín-á bán花chhoah葉á ê行為, che是gín-á觀察, 想像, 創作ê天地. 若是過頭解說做是「傷害性命」, án-ne lán beh án-chóaⁿ解說3 tǹg chia̍h ê豬雞魚菜? Phah báng-á, tī草埔踏ê行為? Kāng款lóng是性命, 是án-chóaⁿ lán ē-sái為tio̍h生活來犧牲其他動物植物ê性命? Tō準gín-á sa棍á ùi樹kho͘出力kòng, góa mā盡量boài做傷害性命iah暴力ê解說, he過程中hoān-sè有挑戰koân度, 反抗強權(投射tī堅固ê樹身面頂), 練習發洩情緒, 實驗反作用力......

若是有影認為無妥當, ē-sái chhōa gín-á se̍k-sāi花kap樹á草á, 建立情感連結, kiám-chhái ē-sái ùi問i ê名開始.

記得大學時有一次台語生活營，台文作家陳明仁提到，每個人都有名有姓，植物也一樣，樹、花、草都有各自的名字，大家以為樹就叫做樹，草就叫做草，我們總不會互相打招呼時說「嗨，人，你好」吧。 

這段話給我很大的反思，就這樣，開啟了我和幾位朋友為期不短的認識植物台灣名的計畫。大家從一知半解，到找資料、拍照、對圖鑑、問人，花了兩年半的時間收集整理出一些些成果(http://taioan-chouhap.myweb.hinet.net/y0_sitbut.htm)。那時候還不是數位相機爆炸的時代，我們用傳統相機，光是買底片、洗照片的錢就不知道花了多少，可是卻很甘願很值得，因為我們和植物建立了連結，他們對我們不再是陌生的花草樹木。 

Asiâng出生後，每次和他出門散步，我總會帶著他認識沿路的花草樹木，撿起落葉看一看，聞聞不同季節開的花，嚐一嚐成熟果食或花蜜的滋味，摘朵花拔根草玩玩小時候的遊戲，尋找樹上鳥隻的蹤影試著和他打招呼，撿起掉落地上的種子丟進土裡期待他有機會長成大樹...... 

當我們期待孩子能關心參與公共議題，我們就該從讓他對生活週遭有感開始。住家附近小徑、菜園、河岸步道、淡水古蹟園區、海邊、觀音山......，在還沒有參加共學前，我們的活動範圍都鎖定在淡水，最遠到關渡、八里，我們希望孩子從認識自己生長的地方開始，一步一步慢慢向外拓展探索。我們期望用最省錢卻是最富有的方式帶著孩子體驗生命，當孩子和土地有了情感連結，我們還擔心以後他會無感地砍掉大樹、剷平歷史建築、山林海邊圈地BOT、分不清楚自己是哪一國人嗎？ 

因此，對於孩子採摘花草樹葉的行為，我一向不干涉，這是孩子觀察、想像、創作的天地。如果過度延伸成「傷害生命」的解讀，那我們該如何自圓其說三餐食用的豬雞魚菜？打蚊子、在草地跑走跳的行徑？同樣都是生命，為什麼我們可以為了存活而犧牲其他動植物的生命？就算是孩子拿著棍子往樹木身上砍打，我也盡量不作傷害生命或暴力的詮釋，這當中或許隱含了挑戰高度、反抗強權(投射在堅固的樹幹上)、練習發洩情緒、實驗反作用力...... 

如果真的覺得不妥，可以帶著孩子認識花草樹木，建立情感連結，或許從問問他的名字開始吧。

──《TGB通訊》第163期(2013/4)